Read Samoan Old Version Bible – O LE TUSI PAIA GALUEGA, 26 Bible Online

GALUEGA, 26 - Samoan Old Version Bible – O LE TUSI PAIA bible

GALUEGA, 26

¹Ona fai mai lea o Akeripa ia Paulo, Faitalia oe ona e faatonu mai ia te oe. Ona faaloaloa atu lea e Paulo lona lima, ma faatonuina atu o ia e ia.

²Le tupu e Akeripa, ou te manatu ou te manuia ina a ou faatonuina atu ia a‘u nei i ou luma i lenei aso, i mea uma ua molia ai a‘u e Iutaia;

³amaise ua e silafia i tu ma suega uma lava o loo ia Iutaia. O le mea lea ou te aioi atu ai ia te oe ia e faafofoga mai ia te au ma le onosai.

⁴Ua iloa e Iutaia uma la‘u amio sa faia talu ina o ou itiiti, i lo‘u lava nuu o i Ierusalema, talu i le amatagata;

⁵ua latou iloa foi a‘u nei talu mai anamuā, pe afai ana fia molimau mai i latou, o le itu aiga e matuā faigata o la tatou tapuaiga sa ou i ai a‘u o le faresaio.

⁶Ua fonotia nei foi a‘u ona o le faatuatuaga na folafolaina e le Atua i o tatou tamā;

⁷o loo faamoemoe i ai o tatou itu aiga e sefulu ma le lua, ma latou auauna ma le naunau i le po ma le ao, ina ia latou maua. Le tupu e Akeripa, ona o lea faamoemoe ua molia ai a‘u e Iutaia.

⁸Afai ua toe faatuina mai e le Atua e ua oti se a le mea ua outou manatu ai e le mafai ona talia o lea mea?

⁹O au nei foi, na ou manatu ifo e tusa ona ou faatu‘ieseina o mea e tele i le suafa o Iesu le Nasareta.

¹⁰Sa ou fai ai foi i Ierusalema; na ou maua foi le pule mai le au faitaulaga sili, ona ou puipuia lea o le au paia e toatele i fale puipui; na fasiotia foi i latou, ua ou faaopoopo i ai.

¹¹Na ou taui soo atu foi ia te i latou i sunako uma lava, ma ou tauanau atu ai ia latou upu leaga ia Iesu; na ou faavalemalosi atu foi ia te i latou, ua ou saua atu ua oo lava i aai ese.

¹²O mea ia, le tupu e, na ou alu atu ai i Tamaseko ma le pule ma le feau mai le au faitaulaga sili,

¹³o le tutonu o le la, na ou iloa atu ai i le ala le malamalama mai le lagi, ua sili lona pupula i le la, ua pupula faataaliolio mai ia te au ma la matou au malaga.

¹⁴Ua pauu i matou uma i lalo i le eleele, ona ou faalogo atu lea i le siufofoga ua fetalai mai ia te au, ua faapea mai i le upu Eperu, Saulo, Saulo e, se a le mea ua e saua mai ai ia te au? o le mea faigata ia te oe ona e aa i tui.

¹⁵Ona ou fai atu lea, Le Alii e, o ai ea oe? Ona fetalai mai lea o ia, O a‘u o Iesu ua e saua i ai.

¹⁶A e tulai ia i luga o ou vae; auā o le mea lea ua faaali ai a‘u ia te oe, ia tofia oe e fai ma auauna ma molimau i mea ua e vaaia, atoa ma mea e toe faaali ai a‘u ia te oe;

¹⁷ma ou laveai ia te oe ai le nuu nei, atoa ma nuu ese, ou te auina atu ai nei oe,

¹⁸e faapupula i o latou mata, ia liliu mai mai le pouliuli i le malamalama, mai le pule foi a Satani ia liliu i le Atua; latou te maua ai le faamagaloina o agasala, ma le tofi faatasi ma i latou ua faapaiaina i le faatuatua ia te au.

¹⁹O lenei, le tupu e Akeripa, na ou le augata i le faaaliga mai le lagi;

²⁰a ua ou muai folafola atu ia te i latou i Tamaseko, atoa ma Ierusalema, ona oo lea i le nuu uma lava o Iutaia, atoa ma nuu ese, ina ia salamo i latou, ma liliu mai i le Atua, ma ia latou faia amio e tatau ma le salamo.

²¹Ona o nei mea ua pue mai ai Iutaia ia te au i le malumalu, ma latou taumafai ona fasioti ia te au.

²²O lea foi na maua ai e a‘u le fesoasoani mai le Atua, ou te tumau ai ua oo i lenei aso, o loo molimau i tagatānuu ma alii, ou te le fai atu se tasi mea na o ia mea ua ta‘u mai e le au perofeta ma Mose o le a taunuu;

²³e tiga le Keriso, e muai toe tu mai foi o ia i e ua oti, ma folafola e ia le malamalama i le nuu nei atoa ma nuu ese.

²⁴Ua faapea ona faatonuina atu o ia, ua fai mai ai Feso ma le leo tele, Paulo e, ua e valea; o le tele o lou sue i tusi ua avea ai oe ma vale.

²⁵A ua tali atu o ia, Le alii e Feso, ou te le valea, a ou te tautala atu i upu moni ma le faautauta.

²⁶Auā o loo silafia e le tupu nei mea ou te tautala faamalosi atu nei i ai; auā ua ou iloa lelei ua le lilo se tasi mea o ia mea ia te ia; auā na le faia faalilolilo lenei mea.

²⁷Le tupu e Akeripa, ua e talitonu ea i le au perofeta? Ua ou iloa lava ua e talitonu.

²⁸Ona fai mai lea o Akeripa ia Paulo, o se mea itiiti ona e faaliliuina lea o a‘u e fai ma Kerisiano.

²⁹Ona fai atu lea o Paulo, Ou te aioi atu lava i le Atua, ia le o se mea itiiti, po o se mea tele, a ia pei o a‘u nei, e le na o oe, a e atoa foi ma e o faafofoga mai uma lava ia te au i lenei aso, ia faapea lava outou, a e tuu pea ia o nei fusi.

³⁰Ua faapea atu o ia, ona tulai lea o le tupu ma le alii, ma Perenike ma e sa nonofo ma i latou.

³¹Ua o ane i latou, ona fetautalatalai lea, ua faapea ane, Ua le faia e lenei tagata se mea e tatau ai le oti, po o le fusifusia.

³²Ona fai atu lea o Akeripa ia Feso, Ana le valaau lenei tagata ia Kaisara, po ua mafai ona tuu atu ia te ia e alu.