Read Samoan Old Version Bible – O LE TUSI PAIA GALUEGA, 4 Bible Online

GALUEGA, 4 - Samoan Old Version Bible – O LE TUSI PAIA bible

GALUEGA, 4

¹O loo o tautala atu i laua i le nuu, ona tutū mai lea ia te i laua o faitaulaga, ma le ta‘ita‘i o le ‘au o le malumalu, atoa ma satukaio,

²ua tiga i latou ona ua la a‘oa‘o atu i le nuu, ma tala‘i atu le toe tu mai ia Iesu nai e ua oti.

³Ua pupue ia te i laua, ma tuu atu i le fale puipui seia oo i le taeao; auā ua afiafi lava.

⁴E toatele o e na faalogologo i le upu ua talitonu i latou; o le tau aofai foi o tagata po ua lima gaafe.

⁵Ua oo i le taeao, i le faapotopotoina i Ierusalema o latou alii, ma le au toeaina, ma leau tusiupu,

⁶ma Ana le faitaulaga sili, ma Kaifa, ma Ioane, ma Alesana, atoa uma lava ma le aiga o le au faitaulaga sili.

⁷Ua latou tuu ia te i laua i totonu, ona latou fesili mai lea, O le a ea le mana, po o le igoa o ai, na oulua fai ai lenei mea?

⁸Ona fai atu lea o Peteru ia te i latou, ua tumu o ia i le Agaga Paia, O outou alii o le nuu, ma toeaina o Isaraelu,

⁹afai e faamasinoina i maua i lenei aso i le alofa ua faia i le tagata ma‘i, po o le a ua malolo ai o ia;

¹⁰ia iloa e outou uma, atoa ma le nuu uma o Isaraelu, o le suafa o Iesu Keriso o le Nasareta, o le na faasatauroina e outou, o le ua toe faatuina e le Atua nai e ua oti, o ia lava ua tu mai ai lenei tagata ua malolo i o outou luma.

¹¹O le maa lenei na faaleaogaina e outou tufuga fai fale, ua avea ia ma tulimanu aupitoaluga.

¹²E leai foi se tasi ua i ai le ola; e leai lava se isi igoa i lalo o le lagi ua foaiina mai i tagata e mafaia ona faaolaina ai o i tatou.

¹³Ua vaai i latou i le faamalosi o Peteru ma Ioane, ma ua iloa o tagata e lei a‘oa‘oina i laua ma le valelea, ua latou ofo ai; ua latou iloa foi o i laua sa latou faatasi ma Iesu.

¹⁴Ua iloa atu foi e i latou le tagata ua faamaloloina ua tutū faatasi ma i laua, ua le mautali i latou.

¹⁵Ua fai mai ia te i laua e o ese ia i le fono; ona fetautalatalai lea o i latou,

¹⁶ua faapea, Se a se mea tatou te faia i nei tagata? auā ua matuā iloa e o nonofo i Ierusalema uma lava ua faia lava e i laua le faailoga sili; e le mafai foi sa tatou upu e toe fai atu.

¹⁷A e peitai ina ne‘i alualu ona salalau i le nuu, ia tatou matuā faamatau atu ia te i laua, ia soia lava le toe tautala i se tasi tagata i lena igoa.

¹⁸Ua aami atu ia te i laua, ona vavao lea ia te i laua, aua lava ne‘i tautala atu pe a‘oa‘o atu i le igoa o Iesu.

¹⁹A ua tali atu Peteru ma Ioane, ua faapea atu ia te i latou, Pe tonu i luma o le Atua, ona ma faalogo ia te outou, a e ma te le faalogo i le Atua, ina filifili ia outou.

²⁰Auā ma te le mafaia ona le tautala i mea ua ma vaai i ai ma faalogo i ai.

²¹Ua latou toe faamatau mai ia te i laua, ona tuu lea o i laua e ō, ua le maua e i latou se mea e faasalaina ai i laua, ona o le nuu; auā ua vivii tagata uma lava i le Atua, ona o le mea ua faia.

²²Auā ua fagafulu tausaga ma ona tupu o le tagata sa fai i ai lena faailoga ua malolo ai.

²³Ua tuuina mai i laua e ō, ona la o atu lea i o latoū, ma la faamatala atu ia te i latou mea uma lava na fai mai ai ia te i laua e le au faitaulaga sili ma toeaina.

²⁴Ua faalogo i ai i latou, ona latou valaau lea i le Atua ma le loto gatasi, ua faapea atu, Le Alii e, o le Atua oe, o le na faia le lagi, ma le lalolagi, ma le sami, ma mea uma lava o i ai;

²⁵o le na fetalai mai i le fofoga o lau auauna o Tavita, Se a le mea ua lilivau ai nuu ese, ma mafaufau ai nuu i mea e le aoga?

²⁶Ua tutū mai tupu o le lalolagi, ua faapotopoto faatasi foi alii e tetee atu i le Alii ma lona Keriso.

²⁷Auā e moni lava, na faapotopotoina o Herota, ma Ponotio Pilato, atoa ma nuu ese, ma le nuu o Isaraelu, i lau Auauna paia o Iesu, ua e faauuina;

²⁸latou te faia mea uma lava na tuu anamua i lou aao ma lau pule ia faia.

²⁹O lenei, le Alii e, ia e silasila i lo latou faamatau mai; ma ia e foai mai i au auauna, ina ia latou matuā tautala i lau afioga ma le faamalosi,

³⁰i le faaloaloa mai o lou aao e faamalolo ai, ina ia faia foi o faailoga ma vavega i le suafa o lau Auauna paia o Iesu.

³¹Ua mavae atu la latou tatalo, ona luluina lea o le mea ua faapotopoto ai i latou; ua tutumu foi i latou uma i le Agaga Paia, ma ua tautala atu i le afioga a le Atua ma le faamalosi.

³²Ua tasi lava le loto ma le manatu o e faatuatua uma lava; ua le fai mai foi e se tasi i se isi ana mea, o lana lea; a ua tuu tele a latou mea uma.

³³Ua molitino atu e le au aposetolo ma le mana tele i le toe tu mai o le Alii o Iesu; ua alofateleina foi i latou uma.

³⁴Ua leai foi so latou e mativa; auā o i latou ua i ai fanua po o fale, ua latou faatauina, ua au mai foi le tau o mea na faatauina,

³⁵ma tuu mai i le au aposetolo e pule; ua tufatufa ia te i latou taitoatasi e faatatau i le mativa o le tagata.

³⁶O Iose foi, ua faaigoaina e le au aposetolo o Panapa, (o lona uiga pe a faamatalaina, O le tagata faamafanafana,) o le sa Levī, o le tagata na fanau i Kuperu,

³⁷sa ia te ia le fanua, ua ia faatauina, ua aumaia foi tupe o le tau, ma tuu mai i le au aposetolo e pule.