Read Samoan Old Version Bible – O LE TUSI PAIA GALUEGA, 5 Bible Online

GALUEGA, 5 - Samoan Old Version Bible – O LE TUSI PAIA bible

GALUEGA, 5

¹Ao le tasi tagata o Anania lona igoa, ma Safaira lana avā, na ia faatau atu le fanua.

²Ua tuu faanānā foi māna nisi mea o le tau, ua iloa foi e lana avā, ua aumaia foi nisi mea ma tuu mai i le au aposetolo e pule.

³A ua fai atu Peteru, Anania e, se a le mea ua faatumu ai e Satani lou loto e te pepelo ai i le Agaga Paia, ma e tuu ai ma oe nisi mea o le tau o le fanua?

⁴A o tumau e lei faatauina, e le o lou lava ea? ua uma foi ona faatauina, e lei i lau pule ea? Se a le mea ua tuu ai lenei mea i lou loto? ua e le pepelo i tagata, a o le Atua.

⁵Ua faalogo Anania i ia upu, ona paū lea o ia i lalo, ua to lana mānava; ona oo ai lea o le mata‘u tele ia te i latou uma o e na faalogo i nei mea.

⁶Ona tutū lea i luga o taulelea, ua teuteu ia te ia, ma ave i fafo ua tanu ai.

⁷Ua mavae atu ona itu aso pe tolu, i le ulufale mai ai lana avā, e lei iloa e ia le mea ua faia.

⁸Ua fai atu Peteru ia te ia, Fai mai ia te au, pe na oulua faatau atu ea le fanua i ia lava mea? Ua fai mai ia, Ioe, o lea lava.

⁹Ona fai atu lea o Peteru ia te ia, Se a le mea ua oulua loto gatasi ai e tofotofo i le Agaga o le Alii? faauta, o tutū mai i le faitotoa i latou e na tanu lau tane, latou te ave foi ia te oe i fafo.

¹⁰Ona paū loa lea o ia i ona vae, ua to lana mānava; ua ulufale mai taulelea, ma latou iloa o ia ua oti, ona latou ave lea ia te ia i fafo, ua tanu ai i tafatafa o lana tane.

¹¹Ua oo foi le mata‘u tele i le ekalesia uma lava, ma i latou uma e na faalogo i nei mea.

¹²Ua faia e lima o le au aposetolo faailoga ma vavega e tele i luma o le nuu. Sa i le faapaologa o Solomona foi i latou uma lava ma le loto gatasi.

¹³A o isi tagata, ua leai so latou ua faamalosi e faatasi ma i latou; a ua viia i latou e le nuu;

¹⁴ua atili ai ona faaopoopoina i le Alii e ua faatuatua, o taumafa, o tane atoa ma fafine;

¹⁵ua oo ina au mai e i latou i e mamai i malae, ma faataooto ai i moega ma fata, tau lava ina ia faapaoloina ai nisi o i latou i le ata o Peteru pe a ui ane.

¹⁶Ua o mai foi le motu o tagata mai aai ua vagavagai Ierusalema, ua au mai e i latou e ua mamai ma e ua tigaina i agaga leaga; ua faamaloloina i latou uma lava.

¹⁷Ona tutū lea i luga o le faitaulaga sili, ma i latou uma ua ia te ia, o le itu aiga lea a le au satukaio, ua matuā matataua lava i latou;

¹⁸ua latou pupue atu foi i le au aposetolo, ma tuu atu ia te i latou i le fale puipui o le nuu.

¹⁹A ua to mai puipui o le fale e le agelu a le Alii i le po, ua na ta‘ita‘i ia te i latou i fafo, ma faapea atu,

²⁰Ina o ia outou, ina tutū i le malumalu ma tautala atu i le nuu i upu uma lava o lenei olataga.

²¹Ua faalogo ai i latou, ona latou ulufale lea i le malumalu i le tafa o ata, ma a‘oa‘o ai. Ona sau lea o le faitaulaga sili ma i latou sa ia te ia, ua faapotopoto e i latou le fono, atoa ma le taupulega uma lava o le fanauga a Isaraelu, ona aau atu lea nisi i le fale puipui e ta‘ita‘i mai ia te i latou.

²²Ua oo atu auauna, ua latou le maua ia te i latou i le fale puipui; ona toe foi mai lea, ma tala mai,

²³ua faapea mai, Na matou iloa le fale ua puipui ma ua mausali lava, ma leoleo ua tutū i fafo i luma o faitotoa; ua matou to atu, a ua le maua e i matou se tasi i totonu.

²⁴Ua faalogo i nei upu le faitaulaga, ma le ta‘ita‘i o le ‘au o le malumalu, atoa ma le au faitaulaga sili, ua latou masalosalo i nei mea, pe iu i ni a.

²⁵Ona sau lea o le tasi, ma tala mai ia te i latou, ua faapea mai, Faauta, o tagata sa outou tuu i le fale puipui, o loo i le malumalu i latou, o tutū ma a‘oa‘o atu i le nuu.

²⁶Ona alu lea o le ta‘ita‘i o le ‘au, o ia ma auauna, ua ta‘ita‘i mai ia te i latou, a e lei faia ma le faamalosi; auā ua fefefe i latou i le nuu, ina ne‘i fetogia i latou i maa.

²⁷Ua latou ta‘ita‘i mai ia te i latou, ona tuu atu ai lea i luma o le fono; ona fesili mai lea o le faitaulaga sili ia te i latou,

²⁸ua faapea mai, Pe na matou le matuā fai atu ea ia te outou ia soia le toe a‘oa‘o i lena igoa? faauta foi, ua outou faatumu i Ierusalema i la outou mataupu, ma outou fia faaoo mai i luga ia i matou le toto o lena tagata.

²⁹Ona tali atu lea o Peteru ma le au aposetolo ua faapea atu, E tusa ona sili o lo matou anaana i le Atua i lo matou anaana i tagata.

³⁰O le Atua o tatou tamā ua na toe faatu mai ia Iesu, le na fasiotia e outou i lo outou faatautau i le laau.

³¹O ia ua aveina ae e le Atua i lona aao taumatau o le Alii i le ma le Faaola, na te avatua ia Isaraelu le salamo ma le faamagaloina o agasala.

³²O ana molimau foi i ia mea o i matou, atoa foi ma le Agaga Paia, le ua foaiina atu e le Atua i e anaana ia te ia.

³³Ua faalogo i latou, ona matuā lotoa ai lea, ua latou taupulepule; ule e fasioti ia te i latou.

³⁴Ona tulai loa o le tasi faresaio i le fono, o Kamalielu le igoa, o le a‘oa‘o i le tulafono, ua viia e le nuu uma lava, ua fai atu o ia, ia tuu atu le au aposetolo i fafo seia toe itiiti ane;

³⁵ona fai atu lea o ia ia te i latou, Outou Isaraelu e, ia outou ma mea a outou faia i nei tagata.

³⁶Auā o aso ua mavae na tu mai ai Tiuta, sa fai atu e sili lava o ia; na pipii foi ia te ia o tagata pe toafagalau pe a faitauina; na fasiotia o ia, na taapeape foi, ma iu vale i latou uma lava e na anaana ia te ia.

³⁷Ua mavae lea tagata, ona tu mai lea o Iuta o le Kalilaia i ona po na tusia ai le nuu; ua na ta‘ita‘i ese le nuu e toatele ua mulimuli ia te ia; ua oti foi o ia, ua faasalalauina foi i latou uma lava e na anaana ia te ia.

³⁸O lenei, ou te fai atu ia te outou, faamamao ia ma nei tagata, ma ia tuu pea ia te i latou; auā afai ua tupu mai tagata lena sauniga ma lena galuega, e faaumatia ia;

³⁹a e afai ua tupu mai le Atua, tou te le mafai ona faaumatia; ina ne‘i iloa ua outou fai taua i le Atua lava.

⁴⁰Ua usiusitai i latou ia te ia; ua aami foi le au aposetolo, ua sasa ia te i latou, ma fai atu, ia soia le tautala i le igoa o Iesu; ona tuuina atu lea ia te i latou e ō.

⁴¹Ona ō lea o i latou nai luma o le fono, ua olioli ina ua ta‘uaogaina i latou ia faaleagaina ona o lona suafa.

⁴²Ua le mapu foi i latou i aso uma ona a‘oa‘o atu, ma tala‘i atu i le malumalu, ma lea fale ma lea fale le tala lelei ia Iesu Keriso.