Read Samoan Old Version Bible – O LE TUSI PAIA GALUEGA, 6 Bible Online

GALUEGA, 6 - Samoan Old Version Bible – O LE TUSI PAIA bible

GALUEGA, 6

¹O ona po ia ua faatoateleina ai le au soo, ua tupu ai le muimui o Elenisi ia Eperu, auā ua galo o latou fafine ua oti a latou tane i le tufatufaina o mea i aso fai soo.

²Ona tala‘iina lea e le toatinoagafulu ma le toalua o le toatele o le au soo, ua faapea atu, E le tatau ona matou tuua o le afioga a le Atua, a e tufatufa i oloa.

³O lenei, le au uso e, ina filifili ia ni o outou se toafitu e ta‘uleleia, e tutumu i le Agaga Paia ma le poto, ia matou tofia i latou i lenei faiva.

⁴A o i matou, matou te finafinau i le talotaloga ma le auauna i le upu.

⁵Ua lelei foi le upu i le toatele uma lava; ona filifili lea e i latou ia Setefano, o le tagata ua tumu i le faatuatua ma le Agaga Paia, ma Filipo, ma Pokoro, ma Nikanora, ma Timona, ma Pamena, ma Nikolao o le Anetioka sa lotu i le lotu a sa Iuta;

⁶ua latou tuu atu ia te i latou i luma o le au aposetolo; ona tatalo lea, ma faaee o latou lima i o latou luga.

⁷Ua tupu foi le afioga a le Atua; ua matuā faatoateleina le au soo i Ierusalema ua anaana foi faitaulaga e toatele lava i le faatuatua.

⁸A o Setefano, ua tumu o ia i le faatuatua ma le mana, ua na faia vavega ma faailoga tetele i luma o le nuu.

⁹Ona tutū mai lea o isi o le sunako e ta‘ua o le sunako o Lipetino, o Kurene foi, ma Alesania, ma i latou mai Kilikia ma Asia, ua fefinauai ma Setefano.

¹⁰Ua le mafaia foi e i latou ona tetee atu i le poto ma le Agaga ua na tautala ai.

¹¹Ona latou fai lemu atu lea i tagata, ia latou molia o ia, ia faapea, Ua matou faalogo atu ia te ia ua fai upu leaga ia Mose atoa ma le Atua.

¹²Ua latou faaoso i le nuu, ma toeaina, ma le au tusiupu; ona tutū mai lea o i latou, ma pue ma ta‘ita‘i ane ia te ia i le fono.

¹³Ua tuu atu foi e i latou molimau pepelo, latou te faapea atu, E le mapu lava lena tagata i le fai upu leaga i lenei mea paia ma le tulafono.

¹⁴Auā ua matou faalogo ia te ia, ua faapea mai, E faaumatia e lena Iesu o le Nasareta lenei mea, ma faaliliu e ia tu sa tuuina mai e Mose ia te i tatou.

¹⁵Ua pulatoa ia te ia o i latou uma ua nonofo i le fono, ua iloa e i latou ona mata, ua peiseai o fofoga o se agelu.