Read Samoan Old Version Bible – O LE TUSI PAIA GALUEGA, 7 Bible Online

GALUEGA, 7 - Samoan Old Version Bible – O LE TUSI PAIA bible

GALUEGA, 7

¹Ona faapea mai lea o le faitaulaga sili, E moni ea, ua faapea na mea?

²Ona fai atu lea e ia, Soma e, le au uso e, ma tamā e, ina faafofoga mai ia. Na faaali le Atua e ona le mamalu i lo tatou tamā o Aperaamo, ina o i Mesopotamia o ia, a o lei oo i lona nofo i Karana,

³ua na fetalai mai foi ia te ia, Ina tuua ia o lou nuu ma lou aiga, a e alu atu i le nuu ou te faasino atu ai ia te oe.

⁴Ona tuua lea e ia o le nuu o Kaletaia, a e nofo i Karana; ua oti lona tamā, ona ia aumaia lea o ia nai lea mea e nofo i le nuu nei, ua outou nonofo ai.

⁵Ua na le avatu foi ia te ia se tofi i ai, e leai lava se mea e tusa ma se tulagāvae; a ua folafola mai, na te avatua ia te ia e fai mona fanua, atoa ma lana fanau pe a mavae atu o ia, a o leai sana fanau.

⁶Na faapea foi ona fetalai mai o le Atua, E āumau lana fanau i le nuu ese; latou te faapologaina ma faasaunoa ia te i latou i tausaga e fagalau.

⁷Na faapea mai foi le Atua. Ou te faasala i le nuu latou te nofo pologa ai; a mavae foi ia mea e o mai i latou, ma latou auauna mai ia te au i lenei nuu.

⁸Na ia tuuina atu foi ia te ia le feagaiga o le peritome; ona fanau ai lea o lona atalii o Isaako, ua ia peritomeina ai o ia i le aso valu; o le atalii foi o Isaako, o Iakopo; o atalii foi o Iakopo e toasefulu ma le toalua, o tupuga ia.

⁹O le au tupuga foi, ina o matataua ia Iosefa, ua latou faatau atu ia te ia i Aikupito; a ua ia te ia le Atua,

¹⁰ua na laveai foi ia te ia i ona puapuaga uma lava, ma foai mai ia te ia ia alofagia ma ta‘upotoina i luma o Farao le tupu o Aikupito; ua na tofia foi o ia e pule i Aikupito, atoa ma lona aiga uma.

¹¹Ua oo le oge ma le puapuaga tele i le nuu o Aikupito uma lava atoa ma Kanana; ua le maua foi ni mea e ‘ai e o tatou tamā.

¹²A ua faalogo e Iakopo ua i Aikupito saito, ona aau atu lea e ia o tatou tamā, o le muai o atu lea.

¹³O lo latou foi faalua ua faailoa ai Iosefa i ona uso, ua faaalia foi le aiga o Iosefa ia Farao.

¹⁴Ona feau atu lea e Iosefa, ua aami i lona tamā o Iakopo, atoa ma lona aiga uma lava, e toafitugafulu ma le toalima o tagata.

¹⁵Ona alu ifo lea o Iakopo i Aikupito, ua oti ai o ia, atoa ma o tatou tamā;

¹⁶ua molia foi i latou i Sukema, ma ua tuuina i le tuugamau na faatau e Aperaamo i le tau ario nai le fanau a Emoro le tamā o Sukema.

¹⁷A ua latalata le tausaga na folafolaina, sa tauto ai le Atua ia Aperaamo, ona tutupu lea o le nuu, ma ua faatoateleina i Aikupito,

¹⁸ua oo i le nofo mai o le tasi tupu, sa le iloa e ia Iosefa.

¹⁹Ua na togafitileagaina o tatou aiga, ma faasaunoa atu i o tatou tamā, ia tuulafoai a latou tama meamea, ina ne‘i ola i latou.

²⁰O ona po ia na fanau ai Mose, ua maeu le tino lelei; e tolu masina foi ua tausia ai o ia i le aiga o lona tamā;

²¹ua tuulafoaiina foi o ia, ua avae e le afafine o Farao, ua na tausi foi ia te ia e fai mana tama.

²²Na a‘oa‘oina foi Mose i le poto uma lava o Aikupito; ua malosi i ana upu ma ana mea na faia.

²³Ua oo i le fagafulu o ona tausaga, ona manatu ai lea o ia e asiasi atu i ona uso o le fanauga a Isaraelu.

²⁴Ua iloa atu foi e ia o le tasi ua agaleagaina, ua na fesoasoani i ai, ma taui atu i lona agaleagaina, ma fasi i le Aikupito.

²⁵Fa te ia e iloa e ona uso e faaola le Atua ia te i latou i lona lima; a ua le iloa e i latou.

²⁶O le taeao foi ua tu atu ai o ia i le toalua o i latou o tau, ua na pupulu ai ia lelei, ua faapea atu, Soma e, o le uso oulua; se a le mea ua feagaleagai ai oulua ia te oulua?

²⁷A o le na agaleaga atu i le tasi, ua na tetee atu ia te ia, ua faapea mai, O ai ea na fai oe ma alii ma faamasino ia te i matou?

²⁸Pe e te fia fasioti ea ia te au, pei ona e fasioti i le Aikupito ananafi?

²⁹Ona sola lea o Mose i lea upu, ua āumau ai i le nuu o Mitiana, ua fanau ai ona atalii e toalua.

³⁰Ua mavae foi tausaga e fagafulu, ona faaali lea ia te ia o le agelu a le Alii i le afi mumū i le laau talatala i le vao o le mauga o Sinai.

³¹Ua vaaia e Mose, ona ofo ai lea i le mea ua vaaia; ua faalatalata atu o ia e matamata i ai, ona tŭlei mai lea o le siufofoga o le Alii ia te ia,

³²O a‘u o le Atua o ou tamā, o le Atua o Aperaamo, o le Atua foi o Isaako, o le Atua foi o Iakopo. Ona gatete lea o Mose, ua le mafai ona faamalosi e matamata i ai.

³³Ona fetalai mai lea o le Alii ia te ia, Tatala ia ou seevae; auā o le mea ua e tu ai o le eleele paia lea.

³⁴Ua ou matuā vaavaai i le agaleagaina o lo‘u nuu o i Aikupito, ua ou faalogo foi i lo latou feoi, ua ou alu ifo foi e laveai ia te i latou. O lenei, sau ia, ou te auina atu oe i Aikupito.

³⁵O Mose lena sa teena e i latou, sa faapea atu, O ai se na faia oe ma alii ma faamasino? na auina o ia e le Atua e fai ma alii ma faaola, i le lima o le agelu sa faaali ia te ia i le laau talatala.

³⁶O ia lava na ta‘ita‘iina atu ia te i latou, a ua uma ona fai vavega ma faailoga i le nuu o Aikupito, ma le sami Ulaula, atoa ma le vao i tausaga e fagafulu.

³⁷O Mose lea, sa fai atu i le fanauga a Isaraelu, E faatuina e le Alii lo outou Atua le perofeta mo outou o so outou uso, pei o a‘u nei; tou te faalogo ia te ia.

³⁸O ia sa i le ekalesia i le vao faatasi ma le agelu na fetalai mai ia te ia i le mauga o Sinai, sa faatasi foi ma o tatou tamā; ua na talia foi afioga o le ola e au mai ai ia te i tatou.

³⁹Ua le loto o tatou tamā ina anaana ia te ia, a ua tetee atu ai, ma toe foi atu i o latou loto i Aikupito,

⁴⁰ua faapea atu ia Arona, Ina faia ia atua mo i tatou, latou te muamua atu ia i tatou; auā o lena Mose, sa ta‘ita‘iina i tatou nai le nuu o Aikupito, tatou te le iloa se mea ua oo ia te ia.

⁴¹Na faia foi e i latou i ia ona po le tamai povi, ua latou fai foi le taulaga i le tupua, ua olioli foi i latou i galuega a o latou lava lima.

⁴²Ona liliu ese lea e le Atua, ma tuu atu ia te i latou e auauna i ‘au o le lagi; pei ona tusia i le tusi a le au perofeta, Le aiga o Isaraelu e, na outou au mai ea manu ua fasia ma taulaga ia te au i ona tausaga e fagafulu i le vao?

⁴³Na tauave lava e outou le malumalu o Moloka, ma le fetu o lo outou atua o Refana, o faatusa na outou faia tou te ifo i ai; o le mea lea ou te avea ai outou e nonofo i tala atu o Papelonia.

⁴⁴Sa i o tatou tamā i le vao le fale fetafai sa i ai le mau, pei ona poloai mai ai o ia le na fetalai mai ia Mose, ia faia e ia pei o le faatusa na vaaia e ia.

⁴⁵Na talia lea e o tatou tamā atoa ma Iosua, ma latou aumaia i le laueleele o nuu ese, na tulia e le Atua i luma o tatou tamā, ua oo i ona po o Tavita.

⁴⁶O ia na alofaina e le Atua, ua na faatoga atu foi ia maua e ia se mea e afio ai le Atua o Iakopo.

⁴⁷A ua faia e Solomona le fale mona.

⁴⁸A e peitai o le Silisili ese, e le afio o ia i malumalu e faia e lima, pei ona fai mai le perofeta,

⁴⁹O le lagi o lo‘u nofoālii lea, o le lalolagi foi o le mea e tu ai o‘u vae lea; o loo faapea mai le Alii, pe faapefea se fale tou te faia mo a‘u? po o ifea se mea ou te nofo ai?

⁵⁰E le faia ea e o‘u lima nei mea uma?

⁵¹O outou, e ua maaa ua, ma ua le peritomeina o loto ma taliga, ua outou tetee atu pea lava i le Agaga Paia; pei o outou tamā ua faapea foi outou.

⁵²O ai so le au perofeta e lei saua i ai o outou tamā? ua fasiotia foi e i latou e na muai tala‘i i le afio mai o lē Amiotonu; o ia ua outou faalataina ma fasiotia nei;

⁵³o outou, e ua maua le tulafono i sauniga a agelu, a ua le taofia.

⁵⁴Ua faalogo i latou i ia upu, ona matuā lotoa lea o i latou; ua lilivau foi o latou nifo ia te ia.

⁵⁵A ua tumu o ia i le Agaga Paia, ua pulatoa i le lagi, ua iloa atu le pupula o le Atua, ma Iesu o loo tu i le itu taumatau o le Atua, ona fai atu lea,

⁵⁶Faauta, ua ou iloa le lagi ua avanoa, ma le Atalii o le tagata o loo tu i le itu taumatau o le Atua.

⁵⁷Ona alalaga lea o i latou ma le leo tele, ua pupuni o latou taliga, ma feosofi mai ia te ia ma le loto gatasi,

⁵⁸ua tulei atu foi ia te ia i tua o le aai, ona latou fetogi lea ia te ia i maa; ua tuu atu foi e molimau o latou ofu i le taulealea, o Saulo le igoa, e leoleo ai.

⁵⁹Ua fetogi foi i latou ia Setefano, o valaau o ia, ua faapea atu, Le Alii e Iesu, ia e talia mai lo‘u nei agaga.

⁶⁰Ua tootuli foi o ia, ma alaga atu ma le leo tele, Le Alii e, aua e te tuuina atu lenei agasala ia te i latou. Ua uma atu lea upu, ona moe ai lea o ia.