Read Samoan Old Version Bible – O LE TUSI PAIA GALUEGA, 9 Bible Online

GALUEGA, 9 - Samoan Old Version Bible – O LE TUSI PAIA bible

GALUEGA, 9

¹A ua mapugatamai pea o Saulo i le faamatau ma le fasioti i le au soo o le Alii, ua alu atu ia i le faitaulaga sili,

²ua faatoga atu ia te ia i tusi e ave i sunako i Tamaseko, pe afai na te maua ai nisi o lena lotu, o tane atoa ma fafine, ia fusifusi ma ta‘ita‘i mai i latou e ia i Ierusalema.

³Ua alu atu o ia ua latalata i Tamaseko, ona faafuasei mai ai lea ona pupula faataaliolio mai ia te ia o le malamalama mai le lagi;

⁴ona paū lea o ia i lalo i le eleele, ua faalogo atu i le siufofoga, o loo faapea mai ia te ia, Saulo, Saulo e, se a le mea ua e saua mai ai ia te au?

⁵Ona fai atu lea o ia, Le Alii e, o ai ea oe? Ona fetalai mai lea o le Alii, O a‘u o Iesu ua e saua mei i ai; o le mea faigata ia te oe ona aa i tui.

⁶Ua gatete ia, ma ua mata‘u, ua faapea atu, Le Alii e, se a le mea e te finagalo i ai ou te faia? Ona fetalai mai lea o le Alii ia te ia, Tu ia oe i luga, ina alu ia i le aai, ona ta‘uina atu lea ia te oe o le mea e tusa ona e faia.

⁷A ua tutū i luga tagata ua o malaga ma ia, ua le mafeganavai; ua lagona lava i latou i le siufofoga, a e le iloa atu se tasi.

⁸Ua tu i luga Saulo nai le eleele; ua pupula ona mata, a ua le iloa se tasi; ua fetagofi i latou i ona lima, ua ta‘ita‘i ia te ia i Tamaseko.

⁹Ua tolu foi aso e le o vaai ai o ia, ua le ‘ai, e lei inu.

¹⁰Sa i Tamaseko le tasi soo, o Anania le igoa; ua fetalai mai foi le Alii ia te ia i le faaaliga, Anania e. Ua tali atu o ia, Le Alii e, o a‘u lenei.

¹¹Ona fetalai mai lea o le Alii ia te ia, Ina tu ia i luga, ina alu i le ala o lona igoa o Sa‘o, ina saili le tagata i le fale o Iuta, o Saulo le igoa, o le Taso; auā faauta mai, o loo tatalo ia;

¹²ua na iloa atu foi i le faaaliga le tagata, o Anania le igoa, o loo ulufale atu, ma faaee lona lima i ona luga, ina ia toe vaai o ia.

¹³Ona tali atu lea o Anania, Le Alii e, ua ou faalogo i tagata e toatele i lena tagata, i mea leaga e tele ua na faia i ou tagata paia i Ierusalema;

¹⁴e ana foi le pule mai le au faitaulaga sili, e fusifusi uma lava i e ua valaau i lou suafa iinei.

¹⁵A ua fetalai mai le Alii ia te ia, Ina alu ia; auā o le ipu lava o ia ua filifilia ma‘u e momoli lo‘u igoa i luma o nuu ese, ma tupu, ma le fanauga a Isaraelu.

¹⁶Auā ou te faailoa atu ia te ia mea e tele e tusa ona tiga ai o ia ona o lo‘u igoa.

¹⁷Ona alu lea o Anania, ua ulu atu i le fale, ua na faaee atu foi ona lima i luga ia te ia, ua faapea atu, Lo‘u uso e Saulo, ua auina mai a‘u e le Alii o Iesu, sa faaali ia te oe i le ala na e sau ai, ina ia e toe vaai, ma ia faatumuina oe i le Agaga Paia.

¹⁸Ona pauu loa lea o mea nai ona mata peiseai ni una; ona toe vaai loa lea o ia, ua tu foi i luga, ma ua papatisoina.

¹⁹Ua ‘ai ona malosi ai lea o ia. Ua faatasi foi Saulo ma le au soo e na i Tamaseko i nai isi aso.

²⁰Ona tala‘i loa lea e ia i sunako o le Keriso, o ia lava o le Alo o le Atua.

²¹Ua matuā ofo i latou uma e na faalogo ai, ua faapea ane, E le o ia ea lenei sa saua i Ierusalema i e valaau i lea lava igoa, ma ua sau iinei ina ia fusifusi, ma ta‘ita‘i ia te i latou i le au faitaulaga sili?

²²A ua atili ai le faamalosi o Saulo, ua fememeai ai Iutaia sa nonofo i Tamaseko ina ua faaalitino atu e ia, o le Keriso lava lenei.

²³Ua fāi po, ona taupulepule lea o Iutaia e fasioti ia te ia;

²⁴ua iloa e Saulo la latou taupulepulega. A ua lamalama i latou i faitotoa o le aai i le ao ma le po, ina ia fasioti ia te ia.

²⁵A ua ave le au soo ia te ia i le po, ma tuu ifo i le pa o le aai, ua tuutuu ifo i le ato.

²⁶Ua oo Saulo i Ierusalema, ona taumafai lea se‘i faatasi atu o ia i le au soo; a ua fefefe i latou uma lava ia te ia, fa te i latou e le se soo o ia.

²⁷A ua ave e Panapa ia te ia, ma ta‘ita‘iina atu i le au aposetolo, ua na tala atu foi ia te i latou i lona iloa o le Alii i le ala, ma lona fetalai mai ia te ia, ma lana tautala faamalosi i le suafa o Iesu i Tamaseko.

²⁸Sa feoai foi o ia ma i latou i Ierusalema,

²⁹ma tautala faamalosi i le suafa o le Alii o Iesu; ua tautala foi o ia, ma fefinauai ma le au Elenisi; a ua latou taumafaia e fasioti ia te ia.

³⁰Ua iloa foi e le au uso, ona ave ifo lea e i latou ia te ia i Kaisareia, ona auina atu lea o ia i Taso.

³¹Ona fifilemu lea o ekalesia i Iutaia uma lava, ma Kalilaia, ma Samaria, ua faamafanafanaina i latou; ua savavali foi ma le mata‘u i le Alii, ma ua faatoateleina i le fesoasoani o le Agaga Paia.

³²Ua alu solo Peteru i mea uma lava, ua alu ifo foi o ia i le au paia ua nonofo i Lita.

³³Ua na iloa ai le tasi tagata o Ainea le igoa, e valu ona tausaga o taoto i lona moega, ua ma‘i o ia i le supa.

³⁴Ua fai atu foi Peteru ia te ia, Ainea e, ua faamaloloina oe e Iesu le Keriso; ina tu ia i luga, ma teu lou moega. Ona tu loa lea o ia i luga.

³⁵Ua iloa atu foi o ia e i latou uma e ua nonofo i Lita ma Sarona, ua liliu ai i latou i le Alii.

³⁶Sa i Iopa le tasi soo fafine o Tapita le igoa, e ta‘ua pe a faamatalaina, o Toreka; ua tele ana galuega lelei ma mea alofa na ia faia.

³⁷O ia ona po ua ma‘i o ia, ua oti ai; ua uma foi ona latou mulumulu ia te ia i le vai, ona tuu lea ia te ia i le afeafe aupitoaluga.

³⁸Ua fetalai Lita ma Iopa, ua faalogo le au soo o i ai Peteru, ona latou aau atu ai lea o tagata e toalua ia te ia, ua ole atu aua le faatuai ona alu atu ia te i latou.

³⁹Ona tu lea o Peteru i luga, ua o ma i laua. Ua oo atu o ia, ona aveina ae lea o i latou ia te ia i le afeafe aupitoaluga; ua tutū mai foi fafine uma lava ua oti a latou tane, o fetagisi mai, ma faaali mai ofu tino ma ofu tetele sa faia e Toreka, ina o ia te i latou o ia.

⁴⁰A ua tuli atu Peteru ia te i latou uma lava i fafo, ona tootuli lea o ia, ma tatalo; ona faasaga atu lea o ia i le oti, ua faapea atu, Tapita e, ina tu ai i luga. Ua pupula o ia; ua na iloa Peteru, ona nofo lea i luga.

⁴¹Ona tago atu lea o Peteru i lona lima, ua na faatu ia te ia; ua valaau foi o ia i le au paia ma fafine ua oti a latou tane, ua tuu atu ia te ia ua ola.

⁴²Ua iloa ai e Iopa uma lava; ua faatuatua foi tagata e toatele i le Alii.

⁴³Ona nofo ai lea o ia i Iopa e tele aso i le tasi tagata o Simona le igoa, o le fai pa‘u o manu.