Read Samoan Old Version Bible – O LE TUSI PAIA ROMA, 1 Bible Online

ROMA, 1 - Samoan Old Version Bible – O LE TUSI PAIA bible

ROMA, 1

¹O a‘u o Paulo, o le auauna a Iesu Keriso, na valaauina e fai ma aposetolo, ua tofia e tala‘i le tala lelei a le Atua,

²(na ia muai ta‘uina mai e ana perofeta i Tusi paia,)

³i lona Alo o Iesu Keriso lo tatou Alii, o le na fanau mai i le aiga o Tavita i la le tino,

⁴o le faasinotonuina mai o le Alo o le Atua o ia ma le mana, i la le agaga e paia lea, i le toe tu mai nai e ua oti;

⁵ua matou maua mai ia te ia le alofa tunoa ma le faiva o le aposetolo, ina ia iu ina anaana i le faatuatua o nuu uma lava, ona o lona suafa;

⁶e i ai foi outou o e ua valaauina e Iesu Keriso.

⁷O la‘u tusi lenei ia te outou uma lava o i Roma, o e ua alofaina e le Atua, o e ua valaauina e fai ma tagata paia; ia ia te outou le alofa tunoa ma le manuia mai le Atua lo tatou Tamā, atoa ma le Alii o Iesu Keriso.

⁸E muamua ona ou faafetai atu i lo‘u Atua ia Iesu Keriso, ona o outou uma, ina ua ta‘ua lo outou faatuatua i le lalolagi uma lava.

⁹Auā ua silafia mai e le Atua, o ia ou te auauna i ai i lo‘u agaga, i le tala lelei i lona Alo, e le aunoa ona ou ta‘uta‘ua outou,

¹⁰ua ou aioi atu ai i a‘u talosaga e fai soo, pe mafai lava ona ou manuia i le finagalo o le Atua, ia le pine ona ou alu atu ai ia te outou;

¹¹auā ou te naunau tele i le fia feiloai ma outou, ina ia ou avatu ia te outou se mea alofa i la le Agaga, e faatumauina ai outou;

¹²o lona uiga lenei, ina ia tatou fefaamafanafanai i lo tatou faatuatua, o outou atoa ma a‘u.

¹³Le au uso e, ou te loto ina ia outou iloa, ua tele o‘u manatu ou te alu atu ia te outou, (a ua taofia a‘u ua oo mai i ona po nei,) ina ia ou maua sina fua ia te outou, faapei o isi nuu.

¹⁴Ua ia te au mea a Eleni atoa ma nuu ese, o e popoto atoa ma e valelea;

¹⁵o le mea lea ou te naunau ai, ia ou folafola le tala lelei ia te outou foi o i Roma.

¹⁶Auā ou te le mā i le tala lelei ia Keriso; auā o le mana lava lea o le Atua e ola ai i latou uma o e faatuatua, e muamua le Iutaia, atoa ma le Eleni.

¹⁷Auā ua faaalia mai ai le amiotonu a le Atua i le faatuatua, ina ia faatuatua ai, pei ona tusia, E ola le tagata amiotonu i le faatuatua.

¹⁸Ua faaalia mai foi le toasa o le Atua mai le lagi i le amio faalematau ma le amio leaga uma lava a tagata, o e taofi i le upu moni ma le amioletonu.

¹⁹Auā o mea a le Atua e mafai ona iloa ua faaalia mai ia te i latou; auā ua faaalia mai e le Atua ia te i latou;

²⁰auā o ana mea e le vaaia talu ona faia o le lalolagi, e vaaia lava ia i le mafaufau i mea na faia, o lona mana lava lea e faavavau ma lona Atua; o lea foi ua le mautali ai i latou.

²¹Auā foi na iloa e i latou le Atua a ua le vivii ma faafetai atu ia te ia, ia tusa i le Atua; a e peitai ua faavaleleaina i latou i lo latou taumasalosaloga, ua faapouliuligia foi o latou loto vālea;

²²ua vālea i latou, a o faafiapopoto i latou,

²³ua latou fesuiai foi le mamalu o le Atua soifua pea lava ma le faatagata o le tino o le tagata iu vale, ma manu felelei, ma manu vaefa, ma mea fetolofi.

²⁴O lea foi na tuuina atu ai i latou e le Atua i le amio leaga, i le tu‘inanau o latou loto, latou te fefaaleagaina ai o latou lava tino;

²⁵o i latou ia o e ua fesuiai le upu moni i le Atua ma le upu pepelo; ua latou matatau foi ma auauna i mea na faia, a ua tuua o ia na na faia, o ia o lē viia e faavavau.

²⁶Amene. O le mea lea na tuuina atu ai i latou e le Atua i manao e masiasi ai; auā o latou fafine foi, ua latou fesuiai le tu tatau ma le tu e le tatau;

²⁷e faapea foi tane, ua tuua e i latou le tu e tatau i le fafine, ina ua mu i lo latou femanaoai; o tane ua fefaiai i latou i mea e masiasi ai; ua tauia foi i latou i o latou lava tino e tusa ma lo latou sese.

²⁸Ua latou le loto foi e taofi i le mataupu i le Atua, o lea ua tuuina atu ai i latou e le Atua i le loto leaga, latou te fai ai mea e le tusa;

²⁹o loo tutumu i latou i amio leaga uma lava, o le faitaaga, o le amio ulavale, o le manumanu, o le loto leaga; o loo tumu saisai i le mataua, o le fasioti tagata, o le misa, o le ‘ole‘olega, ma le faatāutala;

³⁰o tuaupua i latou, o e fai tala leaga, o e ‘ino‘ino i le Atua, o e faasiasia, o e faasaua, o e faafiasilisili, o e fia fai togafiti i mea leaga, o e le anaana i mātua, o e valelea,

³¹o e tuumavaega, o e le lotoaiga, o e le faamolemoleina, ma ē faalealolofa;

³²o i latou ia ua iloa le tonu mai le Atua, e tatau ai ona oti o e fai mea faapena, e le gata ona latou faia o ia mea, a e fiafia lava i latou i e ua faia.