Read Samoan Old Version Bible – O LE TUSI PAIA ROMA, 12 Bible Online

ROMA, 12 - Samoan Old Version Bible – O LE TUSI PAIA bible

ROMA, 12

¹O lenei, le au uso e, ou te aioi atu ia te outou, ona o le alofa mutimuti vale o le Atua, ia outou tuuina atu o outou tino i le Atua, o le taulaga ola, ma le paia, ma le mālie, o le mea lea e tatau ai ona outou faia.

²Aua foi tou te amio faatasi ma lenei lalolagi, a e peitai ia liliuina i le toe fuataiina o outou loto, ina ia outou suesue pe se a le finagalo o le Atua, o mea ua lelei, ma le mālie, ma le atoatoa.

³Auā o le alofa tunoa ua tuuina mai ai ia te au, ou te fai atu ai ia te outou uma, aua le faasili le manatu o se tasi i le mea ua tatou ona manatu ai, a ia māmā le manatu, ia tusa ma le tofiga o le faatuatua ua taitasi ma tofu ai mai le Atua.

⁴Auā faapei o itu tino e tele i le tino e tasi, a e le tasi se faiva i itu tino uma;

⁵e faapea i tatou nei le toatele, ua tino e tasi ia Keriso, ma ua fefaafeagaiai itu tino.

⁶O loo eseese foi a tatou mea e tufaina mai i le alofa tunoa ua foaiina mai ia te i tatou; po o le perofeta, ia faatatauina ma le tofi o le faatuatua;

⁷po o le tiakono, ia faia le faiva o le tiakono; po o le a‘oa‘o, ia a‘oa‘o atu ia;

⁸po o le apoapoai, ia apoapoai o ia; o le foai mea ia faia ma le matamau; o lē pule, ia faia ma le filigā; o le fai mea alofa, ia faia ma le loto fiafia.

⁹Aua ne‘i faatagā alofa; ia ‘ino‘ino i le leaga, ia pipii i le lelei.

¹⁰Ia fefaapelepeleai i le fealofani o uso; ia tausolomua ona ava o le tasi i le tasi.

¹¹Aua le faavaivai i le filigā, ia malosi le loto, ia auauna i le Alii.

¹²Ia olioli i le faamoemoe, ia onosai i le puapuaga, ia finafinau i le tatalo.

¹³Ia tufatufa atu ni a outou mea i le mativa o le au paia, ia tausisi i le alofa i tagata ese.

¹⁴Ia faamanuia atu i e faasaua mai ia te outou, ia faamanuia lava, a e aua le fetuu.

¹⁵Ia outou olioli faatasi ma e ua olioli, ia outou tagi foi faatasi ma e ua fetagisi.

¹⁶Ia gatasitasi o outou manatu; aua le manatu i mea silisili, a ia feoai ma e ua faamaulalo; aua le faafiapopoto.

¹⁷Aua le taui atu le leaga i le leaga i se tasi; ia sauniuni mea e tusa i luma o tagata uma lava.

¹⁸Afai e mafaia ia te outou, ia outou nofo lelei ma tagata uma lava.

¹⁹Le au pele e, aua le taui atu ma sui, a ia outou tuu atu i le toasa; auā ua tusia, Ua faapea mai le Alii, O ia te au le taui ma sui, ou te taui atu.

²⁰O lenei, a matelaina le ua ita mai ia te oe, fafaga ia te ia; a fia inu ia avatu ia te ia e inu ai; auā o le amio faapea e faafaupue ai malala ola i luga i lona ulu.

²¹Aua le faatoilaloina oe i le leaga a ia e faatoilaloina le leaga i le lelei.