Read Samoan Old Version Bible – O LE TUSI PAIA ROMA, 13 Bible Online

ROMA, 13 - Samoan Old Version Bible – O LE TUSI PAIA bible

ROMA, 13

¹Ia usiusitai tagata uma i faipule silisili; auā e leai se pule pe a le mai le Atua; o pule uma lava o loo fai nei, ua faatuina e le Atua.

²O lenei, o le na te tetee i le pule, ua tetee e ia i le sauniga a le Atua; o e tetee foi e sala lava i latou.

³Auā o alii, e le se faamatau i latou i e amio lelei, na o e amio leaga. O lou manao ea, ia e le fefe i le pule? ia e amio lelei, ona ta‘uleleia mai lea o oe e ia.

⁴Auā o le auauna ia a le Atua ia te oe, ia lelei ai; a e afai e te amio leaga, ia e fefe ai, auā e le fai fua e ia lana pelu; auā o le auauna o ia a le Atua, o le na te taui atu le toasa i lē amio leaga.

⁵O lenei, e tatau ona usiusitai, e le gata ona o le toasa, a e peitai ona o le loto fuatia ifo.

⁶O le mea foi lea tou te avatu ai taulaga, auā o auauna i latou a le Atua, o loo finafinau i lenei lava mea.

⁷O lenei, ia avatu i tagata uma lava a latou mea; o le taulaga i e ua tatau i ai le taulaga; o le telo i e ua tatau i ai le telo; o le mata‘u i e ua tatau i ai le mata‘u; o le faaaloalo i e ua tatau i ai le faaaloalo.

⁸Aua ne‘i ia te outou se mea e tasi a se tasi tagata; a e tau lava o le fealofani; auā ai sē alofa atu i se tasi tagata, ua atoatoa ona faia e ia o le tulafono.

⁹Auā o upu ia, Aua le mulilua, Aua le fasioti tagata, Aua le gaoi, aua le molimau pepelo, Aua le tu‘inanau; afai foi ua toe se isi poloaiga, o loo ua aofia lava i lenei upu, Ia e alofa atu i lē lua te tuaoi, ia pei o oe lava ia te oe.

¹⁰E le agaleaga atu le alofa i lē la te tuaoi; o lenei, o le alofa o le atoatoa lea o le tulafono.

¹¹Ia faapea foi, ina ua tatou iloa ona po, ua oo i le itu po e ala ai e na momoe; auā ua latalata nei ia te i tatou le ola, sa mamao ina o tatou uluai faatuatua.

¹²Ua leva le po, ua lata mai le ao; o lea ia tatou faatea ese ai galuega o le pogisa, a ia tatou oofu i ofu tau o le malamalama.

¹³Ia tatou savavali ma le matagofie e tusa i le ao; aua le poula ma le onā, aua le faitaaga ma le matāitu, aua le femisai ma le mataua.

¹⁴A ia outou oofu i le Alii o Iesu Keriso; aua foi le sauniuni mo le tino, e oo ai ona tu‘inanau.