Read Samoan Old Version Bible – O LE TUSI PAIA ROMA, 14 Bible Online

ROMA, 14 - Samoan Old Version Bible – O LE TUSI PAIA bible

ROMA, 14

¹Ia outou talia le ua vaivai i le faatuatua, a e le ina ia faamasinoina o masalosaloga.

²O le taofi o le tasi, e ‘aina mea uma lava; a e ‘aina e le ua vaivai na o mea e tutupu i le laueleele.

³Aua ne‘i ta‘ufaatauvaaina lē ‘ai i le le ‘ai ma le ua le ‘ai, auā ne‘i faasala o ia i le ua ‘ai; auā ua talia o ia e le Atua.

⁴O ai ea oe lē faasala atu i le auauna a le tasi? E tumau ia pe paū i lona lava alii; a e faatumauina lava ia, auā e mafaia e le Atua ona faatumau ia te ia.

⁵O le manatu o le tasi, e sili le tasi aso i le tasi aso; a o le manatu o le isi, ua tutusa aso uma lava. Ia taitoatasi ma mautinoa lona lava manatu.

⁶O lē anaana i le aso, e anaana o ia i ai ona o le Alii; o le le anaana foi i le aso, e le anaana i ai o ia ona o le Alii; o lē ‘ai, e ‘ai o ia ona o le Alii, auā ua faafetai i le Atua; o le lē ‘ai foi, e lē ‘ai o ia ona o le Alii, ua ia faafetai foi i le Atua.

⁷Auā e leai so tatou e ola mo ia lava, e le oti foi se tasi mo ia lava;

⁸auā afai tatou te ola, tatou te ola mo le Alii, pe afai e oti, e oti mo le Alii; o lenei, pe ola pe oti i tatou, o tagata lava o le Alii i tatou.

⁹Auā o le mea lava lea na maliu ai Keriso, ma ua toe tu mai ai, ma ua soifua ai, ina ia faia o ia ma Alii i e ua oti atoa ma e o ola.

¹⁰O oe na, se a le mea e te faasala ai i lou uso? o oe na foi, pe se a le mea e te ta‘ufaatauvaaina ai lou uso? auā tatou te laulaututū uma lava i luma o le nofoa faamasino o Keriso.

¹¹Auā ua tusia, Ua fetalai mai le Alii, Ou te ola a‘u, e tootuli mai ia te au o tulivae uma lava, e ta‘uta‘u mai foi o laulaufaiva uma lava i le Atua.

¹²O lenei, e taitasi i tatou ma tala i lana amio i le Atua.

¹³O lenei, aua ne‘i tatou toe fefaasalai; a e lelei ina ia manatu i lenei lava mea, aua ne‘i tuu ane e se tasi se mea e tausuai ai, po o se mea e tautevateva ai lona uso.

¹⁴Ua ou iloa ma ou mautinoa i le Alii o Iesu, e leai se mea e leaga fua; peitai o se ua manatu ua leaga le mea, ona leaga ai lea ia te ia.

¹⁵A e afai e faatigaina lou uso i au mea e ‘ai, ua e le toe amio alofa; aua le fano i au mea e ‘ai o ia na maliu ai Keriso.

¹⁶O lenei, aua nei ta‘uleagaina lo outou lelei.

¹⁷Auā o le malo o le Atua, e le o mea e ‘ai ma mea e inu; a o le amiotonu, ma le filemu, ma le olioli i le Agaga Paia.

¹⁸Auā o le ua auauna atu ia Keriso i ia mea, ua fiafia i ai le Atua, ua ta‘uleleia foi o ia e tagata.

¹⁹O lenei, ia tatou tausisi i mea e tupu ai le filemu, ma mea e fefaamafanafanai.

²⁰Aua le lepetia le galuega a le Atua ona o mea e ‘ai; e mamā mea uma a e leaga i le tagata o lē ‘ai ma le tausuai.

²¹E lelei pe a le ‘ai ni aano o manu, ma ia le inu uaina, po o se tasi mea e tausuai ai lou uso, pe tautevateva ai, pe vaivai ai.

²²Ua mau ea lou taofi? ia ia te oe lava ia i luma o le Atua; amuia le ua le faasalaina o ia e ia i le mea ua manatu o ia e tatau.

²³A o lē masalosalo, ua faasalaina ia pe afai e ‘ai, auā e le o lana taofi lea; o mea uma lava e le ala mai i le taofi, o le agasala lea.