Read Samoan Old Version Bible – O LE TUSI PAIA ROMA, 16 Bible Online

ROMA, 16 - Samoan Old Version Bible – O LE TUSI PAIA bible

ROMA, 16

¹Ou te faailoa atu ia te outou lo tatou tuafafine o Fipe, o le tiakono lea o le ekalesia o i Kenikerea;

²ina ia talia o ia e outou i le Alii, faapei ona tatau i le au paia, ia outou fesoasoani foi ia te ia i se mea a outou e aoga ia te ia; auā foi e toatele ua ia fesoasoani i ai, atoa ma a‘u nei.

³Ua ou alofa atu ia Pisila ma Akula, na la fai galuega faatasi ma a‘u i le galuega a Keriso Iesu.

⁴O i laua ia na la tuu atu o la ua e sui a‘i a‘u, ia a‘u ola; e le na o a‘u e faafetai ia te i laua, a e atoa ma ekalesia uma i nuu ese.

⁵Ua ou alofa atu foi i le ekalesia o i lo laua fale. Ua ou alofa atu ia Epaineto, o le pele a a‘u, o le faapolopolo o ia ia Keriso i Akaia.

⁶Ua ou alofa atu ia Maria, o le na galue tele mo i matou.

⁷Ua ou alofa atu ia Aneroniko ma Iunia, o o‘u aiga, sa matou faatasi ma a‘u i le fale puipui; ua logoleleia i laua e aposetolo, sa la i ai ia Keriso na muamua ia te au.

⁸Ua ou alofa atu ia Amepelia, o le pele a a‘u i le Alii.

⁹Ua ou alofa atu ia Upano, le na galue faatasi ma i matou i le galuega a Keriso; o Sataku foi o le pele a a‘u.

¹⁰Ua ou alofa atu ia Apele, ua ta‘uleleia o ia o ia Keriso. Ua ou alofa atu i sa Arisopulō.

¹¹Ua ou alofa atu ia Herotiona, mā te aiga. Ua ou alofa atu i e o sa Nakisō, o e ua i le Alii.

¹²Ua ou alofa atu ia Tufaina ma tufosa, o fafine na galulue i la le Alii. Ua ou alofa atu ia Peseti, o le pele, o le na galue tele i la le Alii.

¹³Ua ou alofa atu ia Rufo, na filifilia e le Alii, i le ma lona tinā, o lo‘u tinā foi lea.

¹⁴Ua ou alofa atu ia Asugerito, ma Fegona, ma Herema, ma Pateropa, ma Heremea, ma le au uso o ia te i latou.

¹⁵Ua ou alofa atu ia Filoloko ma Iulia, o Nereu foi ma lona tuafafine, ma Olumepa, ma le au paia atoa uma o ia te i latou.

¹⁶Ia outou fealofani i le feasogi paia. O loo alolofa atu ia te outou ekalesia a Keriso.

¹⁷Ou te aioi atu foi ia te outou, le au uso e, ia outou vaavaai i e faatupu fevaevaeaiga, ma mea e tausuai ai; o mea ia e le tusa ma le mataupu ua a‘oa‘oina ai outou; ia outou liliu ese foi ia te i latou.

¹⁸Auā o e faapea, e le auauna i latou i lo tatou Alii o Iesu Keriso, a o latou lava manava; ma latou faasese i loto o tagata ua le manatu leaga, i lo latou faaneenee ma alofa faavivii.

¹⁹Auā ua logo atu i tagata uma lava lo outou usiusitai; o lea ou te olioli ai ona o outou. Ou te manao foi ia popoto outou i mea lelei, a ia valelea i mea leaga.

²⁰E le pine foi ona solia o Satani i lalo o outou vae e le Atua e ona le manuia. Ia ia te outou le alofa tunoa o lo tatou Alii o Iesu Keriso. Amene.

²¹O loo alolofa atu ia te outou o Timoteo, ma te galulue faatasi ma a‘u; o Lukio foi, ma Iasona, ma Sosepatero, o o‘u aiga i latou.

²²O a‘u ne‘i o Tesio, o le ua tusi lenei tusi, ua ou alofa atu ia te outou i la le Alii.

²³O loo alofa atu ia te outou Kaio, o le talia a‘u atoa ma le ekalesia uma. O loo alolofa atu ia te outou o Erato o le tulafale sili o le aai, atoa ma Kuato le uso.

²⁴Ia ia te outou uma lava le alofa tunoa o lo tatou Alii o Iesu Keriso. Amene.

²⁵Ia viia le na te mafaia ona faatumau ia te outou, e tusa ma la‘u tala lelei, ma le tala‘iga o le tala ia Iesu Keriso, e tusa ma le faaaliga o le mea lilo sa natia i tausaga o le vavau;

²⁶a ua faaali mai nei i tusi a perofeta, e tusa ma le poloaiga a le Atua e faavavau, o loo ua faailoa mai i nuu uma, ia iu ina usiusitai i le faatuatua;

²⁷o le Atua poto ia e toatasi, ia ia te ia le viiga ia Iesu Keriso e faavavau. Amene.