Read Samoan Old Version Bible – O LE TUSI PAIA ROMA, 3 Bible Online

ROMA, 3 - Samoan Old Version Bible – O LE TUSI PAIA bible

ROMA, 3

¹O lenei, se a ea se mea e sili ai le Iutaia? pe aoga i ni a le peritome?

²E tele lava i mea uma; a e muamua lenei, ona ua tuuina atu ia te i latou o afioga a le Atua.

³A faapefea? Afai ua le faamaoni nisi, pe faaleaogaina ea le faamaoni o le Atua i lo latou le faamaoni?

⁴Aua ne‘i faapea; ia tuu le faamaoni i le Atua, a o le pepelo i tagata uma lava; pei ona tusia, Ina ia ta‘uamiotonuina oe i au afioga, ma ia e malo pe a faamasinoina oe.

⁵A e afai e faaalitinoina le amiotonu a le Atua i la tatou amioletonu, se a ea sa tatou upu e fai? Ua amioletonu ea le Atua, o le na te tuuina mai le toasa? (O upu a tagata ou te fai atu ai nei.)

⁶Aua ne‘i faapea; a faapea, pe faapefea ona faamasinoina le lalolagi e le Atua?

⁷Auā a faateleina le faamaoni o le Atua e tupu ai lona viiga ona o lo‘u pepelo e faasalaina a‘u i se a, pei o se ua agasala?

⁸A e le se‘i faapea ea, (pei ona upuleagaina i matou, pei ona fai ane foi e nisi, ua faapea la matou upu,) Ia tatou fai mea leaga, ina ia tupu ai mea lelei? E tusa ai la latou sala.

⁹O lenei, pe faapefea? ua matou silisili ea? E leai lava; auā ua uma ona molia e i tatou o Iutaia atoa ma Eleni, o loo nofo sala i latou uma lava;

¹⁰faapei ona tusia, E leai sē amiotonu, e leai lava se tasi, e leai se na te lagona,

¹¹e leai sē saili i le Atua.

¹²Ua latou o ese uma lava, ua leaga faatasi i latou, e leai se ua amio lelei, ua leai lava se tasi.

¹³Ua se tuugamau ua faamaga o latou faaī, ua ‘ole‘ole o latou laulaufaiva, o i o latou laugutu le mea oona o le asipi.

¹⁴Ua tumu o latou gutu i le fetuu ma le upu faafiufiu.

¹⁵Ua tele vavave o latou vae e sasaa ai le toto.

¹⁶O i o latou ala le olopalaina ma le puapuagatia;

¹⁷ua latou le iloa foi le ala o le manuia.

¹⁸E leai lava so latou mata‘u i le Atua.

¹⁹O lenei, ua tatou iloa, o mea uma ua fai mai e le tulafono, ua fai mai lava i e ua i ai le tulafono, ina ia punitia ai gutu uma lava, ma ia nofo sala le lalolagi uma i luma o le Atua.

²⁰Auā e le ta‘uamiotonuina se tagata e toatasi i ona luma i galuega o le tulafono; auā o le tulafono e iloa lelei ai le agasala.

²¹A o lenei, ua faaalia mai le amiotonu a le Atua, e le o i ai le tulafono, ua molimau i ai e le tulafono atoa ma le au perofeta;

²²o le amiotonu lea a le Atua i le faatuatua ia Iesu Keriso, e oo i tagata uma, mo tagata uma foi o e faatuatua; auā e le eseese lava.

²³Auā ua agasala tagata uma lava, ma ua le oo i le viiga mai le Atua;

²⁴ua ta‘uamiotonuina fua i lona alofa tunoa i le togiola e a Keriso Iesu,

²⁵o le ua tuuina mai i luma e le Atua, o le e finagalo mălie ai i le faatuatua i lona toto; ina ia faaalitinoina mai lana amiotonu i le le tauia o agasala ua mavae, i le faapalepale o le Atua;

²⁶ina ia faaalitinoina mai foi lana amitonu i ona po nei, ina ia iloa ai o ia o lē amiotonu, ma ua ta‘uamiotonu ina ie ia le ua faatuatua ia Iesu.

²⁷O lenei, o ifea le mitamita? Ua vaoia. I se fea tulafono? o le tulafono i galuega ea? E leai, a o le tulafono i le faatuatua.

²⁸O lenei, ua tatou taofi, e ta‘uamiotonuina le tagata i le faatuatua, e le o i ai galuega o le tulafono.

²⁹Na o Iutaia ea e Atua i le Atua? e le atoa ea foi ma nuu ese? Ioe, atoa foi ma nuu ese.

³⁰Auā foi o le Atua e tasi lava na te ta‘uamiotonuina i le faatuatua le ua peritomeina, atoa ma le ua le peritomeina, ua i ai le faatuatua.

³¹O lenei, e faaleaoga ea e i tatou le tulafono i le faatuatua? Aua ne‘i faapea; a ua tatou faatumauina ai le tulafono.