Read Samoan Old Version Bible – O LE TUSI PAIA ROMA, 5 Bible Online

ROMA, 5 - Samoan Old Version Bible – O LE TUSI PAIA bible

ROMA, 5

¹O lenei, ua ta‘uamiotonuina i tatou i le faatuatua, o lea ua tatou lelei ai ma le Atua, ona o lo tatou Alii o Iesu Keriso;

²o ia foi ua tatou maua mai ai le ta‘ita‘iga i lenei alofa tunoa, tatou te i ai i le faatuatua; o loo mitamita foi i tatou ma le faamoemoe i le manuia mai le Atua.

³E le gata foi i lea, a ua tatou mitamita foi i puapuaga, ina ua tatou iloa o le puapuaga e tupu ai le onosai,

⁴o le onosai e tupu ai le mautinoa, o le mautinoa e tupu ai le faamoemoe;

⁵o le faamoemoe foi e le mā ai, auā ua faamaligi mai le alofa o le Atua i o tatou loto e le Agaga Paia ua foaiina mai ia te i tatou.

⁶Auā na maliu Keriso i ona po e tatau ai, ina o vaivai pea i tatou, o le sui o ia o e faalematau.

⁷Auā e toe ina le mafai ona oti o se tasi e sui a‘i le ua amiotonu; a o le ua agalelei, atonu pe faamalosi se tasi ona oti e sui a‘i o ia;

⁸a ua faaalitinoina mai e le Atua lona lava alofa ia te i tatou, ina ua maliu Keriso ma sui o i tatou, a o tatou agasala pea.

⁹O lenei, ua ta‘uamiotonuina nei i tatou i lona toto, e le faaolaina ea i tatou e ia ai le toasa i se a?

¹⁰Auā afai ua lelei i tatou ma le Atua i le maliu o lona Alo, ina o fai i tatou mona fili, e matuā faaolaina lava i tatou i lona soifua, o i tatou ua lelei ma ia.

¹¹A e le gata i lea, a ua tatou mitamita foi i le Atua, ona o lo tatou Alii o Iesu Keriso, o ia ua tatou maua mai ai nei le leleiga.

¹²O lenei faapei ona oo mai o le agasala i le lalolagi i le tagata e toatasi, o le oti foi ona o le agasala, ona oo mai ai lea o le oti i tagata uma lava, auā ua agasala uma lava;

¹³(auā sa i le lalolagi le agasala ua oo i ona po o le tulafono; a e le ta‘usalaina pe a leai se tulafono;

¹⁴peitai na malo le oti, talu ia Atamu e oo ia Mose, ua oo lava i e na le agasala e pei o le solitulafono o Atamu, o le faatusa o ia o lē a maliu mai;

¹⁵a e le pei o le agasala le mea e foaifuaina mai; auā afai ua oti le toatele i le agasala a le toatasi, e faasilisili lava i le toatele le alofa tunoa o le Atua, ma le mea e foaifuaina mai i le alofa tunoa, ua i le tagata e toatasi, o Iesu Keriso lea.

¹⁶A e le pei o le toatasi na agasala le mea e foaifuaina mai; auā o i le agasala e tasi le faasala, e oo ai le sala; a o i agasala e tele le mea e foaifuaina mai, ina ia ta‘uamiotonuina.

¹⁷Auā afai o le toatasi na malo ai le oti i le agasala a le toatasi, e silisili lava ona malo ma ola e ua maua le faulai mai o le alofa tunoa atoa ma le mea alofa o le amiotonu lea, ona o le toatasi, o Iesu Keriso.)

¹⁸O lenei foi, faapei ona faasalaina o tagata uma lava i le agasala e tasi, e faapea foi ona ta‘uamiotonuina o tagata uma lava i le amiotonu e tasi, latou te ola ai.

¹⁹Auā faapei ona avea ma agasala o le toatele i le le anaana o le tagata e toatasi, e faapea foi ona avea ma amiotonu o le toatele i le anaana o le toatasi.

²⁰Na faaopoopoina foi le tulafono ina ia faatele ai le agasala; peitai ua silisili lava le alofa tunoa, ina o faateleina le agasala.

²¹O lenei, e pei ona malo o le agasala e oo i le oti, faapea foi ona malo o le alofa tunoa e le amiotonu e oo i le ola e faavavau, i lo tatou Alii o Iesu Keriso.