Read Samoan Old Version Bible – O LE TUSI PAIA ROMA, 6 Bible Online

ROMA, 6 - Samoan Old Version Bible – O LE TUSI PAIA bible

ROMA, 6

¹O lenei, se a ea sa tatou upu? Tatou te nonofo pea ea i le agasala, ina ia faatele ai le alofa tunoa? Aua ne‘i faapea.

²O i tatou ua oti i la le agasala, pe faapefea ona tatou ola pea i ai?

³Tou te lei iloa ea, o i tatou nei uma na papatisoina ia Keriso Iesu, na papatisoina i tatou i lona maliu?

⁴O lenei, ua tatanu faatasi i tatou ma ia i le papatisoga i lona maliu; ina ia tatou savavali i le ola toefuataiina, pei ona toe faatuina mai o Keriso nai e ua oti, i le mana o le Tamā.

⁵Auā afai ua faatasia i tatou i le faatusa i lona maliu, e faapea foi i tatou i lona toe tu mai.

⁶Ua tatou iloa lenei mea, na faasatauroina faatasi ma ia lo tatou tagata tuai, ina ia faaumatia ai le tino o le agasala, ina ia le toe faapologaina i tatou i le agasala.

⁷Auā o le ua oti ua tuusaunoa ia nai le agasala.

⁸Afai foi ua oti faatasi i tatou ma Keriso, ua tatou taofi, tatou te ola foi faatasi ma ia.

⁹Ua tatou iloa ua toe tu mai Keriso nai e ua oti, e le toe maliu lava o ia, e le toe pule le oti ia te ia.

¹⁰Auā o lona maliu, ua tasi lona maliu i la le agasala; a o lona soifua, e soifua lava ia i la le Atua.

¹¹Ia faapea foi la outou taofi, ua outou oti i la le agasala, a ua outou ola lava i la le Atua i lo tatou Alii o Keriso Iesu.

¹²O lenei, aua ne‘i malo le agasala i o outou tino auga vale, i lo outou gauai i ai i ona tu‘inanau;

¹³aua foi ne‘i tuuina atu o outou tino i le agasala e fai ma auupega a le amio leaga; a ia outou tuuina atu outou i le Atua, e pei o e ua ola nai e ua oti, ma ia tuuina atu outou tino i le Atua e fai ma auupega a le amiotonu.

¹⁴Auā e le pule le agasala ia te outou; auā ua outou le nonofo i le tulafono, a o le alofa tunoa.

¹⁵O lenei, pe faapefea? tatou te agasala ea, ina ua tatou le nonofo i le tulafono, ao le alofa tunoa? Aua ne‘i faapea.

¹⁶Tou te lei iloa ea, o lē tou te tuuina atu i ai outou e fai ma auauna e anaana i ai, o ana auauna outou tou te anaana i ai, po o le agasala e oo ai le oti, po o le anaana e oo ai le amiotonu?

¹⁷A ia faafetai i le Atua, e ui lava ina fai outou ma auauna a le agasala, a ua outou gauai nei ma le loto i le faaa‘oa‘o o le mataupu na tuuina atu ia te outou.

¹⁸Ua tuusaunoa foi outou nai le agasala, a ua fai ma auauna a le amiotonu.

¹⁹O upu a tagata ou te fai atu ai nei, ona o le vaivai o outou tino; auā faapei ona outou tuuina atu o outou tino e fai ma auauna a le amio leaga ma le ulavale, e ulavale ai; ia faapea foi ona tuuina atu nei o outou tino e fai ma auauna a le amiotonu, e iu i le faapaiaina.

²⁰Auā sa aunoa outou ma le amiotonu, ina o auauna outou i le agasala.

²¹Ni a foi ni fua na ia te outou anamua i na mea ua outou mamā ai i nei ona po? Auā o le iuga o ia mea o le oti lea.

²²A o lenei, ua tuusaunoa outou nai le agasala, ma ua fai ma auauna a le Atua, ua ia te outou ni a outou fua e oo ai i le faapaiaina o lona uiga foi o le ola e faavavau.

²³Auā o le oti, o le totogi lea o le agasala; a o le ola e faavavau, o le mea foaifuaina mai lea e le Atua, i lo tatou Alii o Keriso Iesu.