Read Samoan Old Version Bible – O LE TUSI PAIA ROMA, 7 Bible Online

ROMA, 7 - Samoan Old Version Bible – O LE TUSI PAIA bible

ROMA, 7

¹Le au uso e, tou te lei iloa ea, (aua ou te fai atu i e ua iloa le tulafono,) e pule le tulafono i le tagata i aso uma e ola ai o ia?

²Auā o le fafine nofo tane, ua noanoa ia e le tulafono i lana tane a o ola o ia; a e afai ua oti le tane, ona talaina lea o ia ai le tulafono i le tane.

³O lenei foi, afai e nofo tane o ia i se tasi, a o ola lana tane, e ta‘ua ia o le mulilua; peitai ane, afai ua oti lana tane, ona tuusaunoa lea o ia i le tulafono; i le, a nofo o ia i se tasi tane e le mulilua ai o ia.

⁴E faapea foi outou o‘u uso e, ua oti outou i la le tulafono, i le tino o Keriso; ina ia outou nonofo i le tasi, o le na toe tu mai nai e ua oti, ina ia fua mai ai i tatou ni fua i le Atua.

⁵Auā ua galulue manao leaga talu le tulafono, i o tatou tino, ina o i la le tino i tatou, e fua mai ai ni fua e oti ai;

⁶a o lenei, tatalaina i tatou nai le tulafono sa taofia ai i tatou, ina ua tatou oti, o lea ua tatou auauna ai i la le agaga fou, a e le i la le tusi tuai.

⁷O lenei, se a ea sa tatou upu? O le agasala ea le tulafono? Aua ne‘i faapea. E moni lava, ana le se anoa le tulafono, po ua ou le iloa le agasala; auā ana le fai mai le tulafono, Aua e te tu‘inanau, po ua ou le iloa le tu‘inanau.

⁸A ua maua e le agasala se togafiti i le poloaiga, ona faatupu ai lea i totonu ia te au o tu‘inanau uma lava. Auā ua oti le agasala, a o leai se tulafono.

⁹Sa ou ola foi anamua, ina ua le oo mai le tulafono; a ua oo mai le poloaiga, ona toe ola mai ai lea o le agasala, ona ou oti lea.

¹⁰Ua iloa foi e a‘u o le poloaiga na saunia e ola ai, o lea ua oo mai ai le oti;

¹¹auā na maua e le agasala le togafiti, ona faasese mai ai lea o ia ia te au e le poloaiga, o lea foi na fasioti ai o ia ia te au.

¹²O lenei foi, e paia lava le tulafono, ma le poloaiga e paia, e tonu, ma ua lelei.

¹³Ia, ua avea ea le mea lelei ma mea e oti ai a‘u? Aua ne‘i faapea; a o le agasala, ina ia iloa mai o le agasala lea, o le na te faatupuina le oti ia te au i le mea lelei, ina ia iloa i le poloaiga, o le agasala, e matuā agasala lava.

¹⁴Auā ua tatou iloa o loo i la le Agaga le tulafono, a o a‘u ou te i la le tino, ua faatauina atu a‘u e fai ma tagata o le agasala.

¹⁵Auā ou te le iloa mea ou te faia; auā o le mea ou te faia ou te le loto i ai, a o le mea ou te ‘ino‘ino i ai o lea ou te faia.

¹⁶Afai foi ou te faia le mea ou te loto i ai, ma te ‘au upu faatasi ma le tulafono, e lelei ia.

¹⁷O lenei, e le o a‘u e toe faia lea mea, a o le agasala o loo nofo i totonu ia te au.

¹⁸Auā ua ou iloa e leai se mea lelei ua nofo i totonu ia te au, o lo‘u tino lea; auā ua ia te au le loto atu, a ou te lei iloa ona fai o le mea lelei;

¹⁹auā ou te le faia o le mea lelei ou te loto i ai, a o le mea leaga ou te le loto i ai, o le mea lea ou te faia.

²⁰Afai foi ou te faia le mea ou te le loto i ai, ua le o a‘u e toe faia, a o le agasala o loo nofo i totonu ia te au.

²¹O lenei, ua ou iloa peisai se tulafono ua ia te au; pe a ou loto atu i le lelei e fai, ua ia te au le leaga.

²²Auā ou te fiafia i le tulafono a le Atua i le tagata i totonu.

²³A ua ou iloa le tulafono ese i o‘u tino, o loo tau le taua i le tulafono a lo‘u mafaufau, ua fai foi a‘u ma tagata o taua i le tulafono a le agasala o loo i o‘u tino.

²⁴Aue o a‘u le tagata malaia! o ai sē laveai ia te au ai le tino o lenei oti?

²⁵Ou te faafetai lava i le Atua, auā o Iesu Keriso lo tatou Alii. O lenei foi, o a‘u nei lava ou te auauna i le tulafono a le Atua i lo‘u mafaufau, a o le tulafono a le agasala i lo‘u tino.