Read Samoan Old Version Bible – O LE TUSI PAIA ROMA, 8 Bible Online

ROMA, 8 - Samoan Old Version Bible – O LE TUSI PAIA bible

ROMA, 8

¹O lenei, ua leai se faasala i e o ia Keriso Iesu, o e le savavali i la le tino, a e i la le Agaga;

²auā o le tulafono a le Agaga o le ola ua ia Keriso Iesu ua tuusaunoa mai lea ia te au nai le tulafono a le agasala ma le oti.

³Auā o le mea na le mafaia i le tulafono, ina ua vaivai ia ona o le tino, ua faia lea e le Atua i lona auina mai o lona lava Alo, ua tino tagata agasala, o le taulaga foi mo agasala, na ia faasalaina ai le agasala i le tino;

⁴ina ia atoatoa ai le amiotonu i la le tulafono ia i tatou, o e le savavali i la le tino, a e i la le Agaga.

⁵Auā o e i la le tino e loto atu i latou i mea a le tino; a o e i la le Agaga e loto atu i mea a le Agaga.

⁶Auā o le loto i la le tino o le oti lea; a o le loto i la le Agaga o le ola lea ma le manuia;

⁷auā o le loto i la le tino o le ita lea i le Atua; auā e le usiusi tai i le tulafono a le Atua, e le mafai foi i ai.

⁸O i latou foi o i la le tino, e le mafai ona fiafia i ai le Atua.

⁹A o outou, tou te le i la le tino, a e i la le Agaga, pe afai e nofo le Agaga o le Atua i totonu ia te outou. Ai se tasi ua le ia te ia le Agaga o Keriso, e le fai lea mona.

¹⁰A e afai ua i totonu ia te outou Keriso, ua oti ai le tino ona o le agasala, a ua ola le agaga ona o le amiotonu.

¹¹A e afai e nofo i totonu ia te outou le Agaga o le na toe faatu mai ia Iesu nai e ua oti, e faaola mai foi o outou tino auga vale e le na toe faatu mai ia Keriso nai e ua oti, e lona Agaga o loo nofo i totonu ia te outou.

¹²O lenei, le au uso e, ua ia te i tatou e taui atu, a e le o le tino, tatou te amio ai i la le tino;

¹³auā afai tou te amio i la le tino, e oti ai outou; a e afai e fasiotia e outou amioga a le tino e le Agaga, tou te ola ai.

¹⁴Auā o i latou uma ua ta‘ita‘iina e le Agaga o le Atua, o atalii i latou o le Atua.

¹⁵Auā ua outou le maua le agaga o le pologa, e toe fefefe ai; a ua outou maua le Agaga o tamafai, tou te valaau atu ai, Ava, le Tamā e.

¹⁶O loo molimau mai lea lava Agaga i o tatou agaga, o fanau i tatou a le Atua.

¹⁷Afai foi o fanau i tatou, o suli foi, o suli lava o le Atua, o suli faatasi ma Keriso; pe afai tatou te tiga faatasi ma ia, ina ia faamanuiaina foi i tatou faatasi ma ia.

¹⁸Auā o lo‘u manatu e le tatau ona faatusaina le tiga i nei ona po ma le manuia atali e faaalia mai ia te i tatou.

¹⁹Auā o loo faatalitali mea uma na faia ma le naunau i le faaalia mai o atalii o le Atua.

²⁰Auā ua faatoilaloina mea uma na faia i le iu vale, (e le o lona loto lea, a e peitai ona o ia na na faatoilaloina ai,)

²¹ma le faamoemoe ia tuusaunoa ia lava mea na faia ia le faapologaina e le iu vale, a e oo i le saolotoga o le fanau a le Atua e manuia ai.

²²Auā ua tatou iloa, ua oi faatasi, ma oono faatasi mea uma lava na faia, ua oo mai lava i ona po nei.

²³E le gata foi i lea, a o i tatou lava ua i ai mea faapolopolo a le Agaga, tatou te feoi, o i tatou lava i totonu ia te i tatou, o loo faatalitali atu ia avea ma tamafai, o le faaolaina lea o tatou tino.

²⁴Auā e faaolaina i tatou i le faamoemoe; a o le faamoemoe ua vaaia, e le o le faamoemoe lea; auā pe faapefea ona toe faamoemoe se tasi i le mea ua vaaia?

²⁵A e peitai a tatou faamoemoe i le mea ua le vaaia, tatou te faatalitali atu i ai ma le onosai.

²⁶E faapea foi le Agaga ona fesoasoani mai i lo tatou vaivai; auā tatou te le iloa mea tatou te ole atu ai ma le tusa, a e peitai o le Agaga, e fautua o ia mo i tatou i le oi e le mafai ona talatalaina.

²⁷A o lē suesue i loto, ua silafia e ia le finagalo o le Agaga; auā o loo fautua o ia mo le au paia e tusa ma le finagalo o le Atua.

²⁸Ua tatou iloa foi e galulue faatasi mea uma e lelei ai i latou e ua alofa atu i le Atua, o e ua valaauina i lona finagalo.

²⁹Auā o e na silafia e ia anamua, na ia tofia anamua foi, ia foliga i latou i lona Alo, ia foliga ia te ia, ina ia avea o ia ma ulumatua o le au uso e toatele;

³⁰o e na tofia anamua e ia, ua valaauina foi i latou e ia; o e ua valaauina e ia, ua ta‘uamiotonuina foi i latou e ia; o e ua ta‘uamiotonuina e ia, ua faamanuiaina foi i latou e ia.

³¹O lenei, se a sa tatou upu i nei mea? Afai ua ‘au ma i tatou le Atua, o ai sē faasaga tau mai ia i tatou?

³²O ia lava sa na le faasaoina lona lava Alo, a ua tuuina mai o ia e sui a‘i i tatou uma lava, e le foai fua mai ea e ia ia te i tatou mea uma lava faatasi ma ia i se a?

³³O ai se na te molia le au filifilia a le Atua? O le Atua o lē ta‘uamiotonuina mai,

³⁴o ai se na te faasalaina mai? O Keriso o ia na maliu, a ua toe tu mai lava o ia; o loo i le itu taumatau foi o le Atua, o loo fautua foi o ia mo i tatou.

³⁵O ai se na te faateaeseina mai i tatou i le alofa o Keriso? o le puapuaga ea, po o le atuatuvale, po o le saua, po o le oge, po o le lavalavā, po o le pagatia, po o le pelu?

³⁶Faapei ona tusia, Ona o oe ua fasiotia ai i matou i aso uma, ua faatatauina i matou e pei o mamoe ā fasia.

³⁷A ua tatou manumalo aiai i nei mea uma lava, ona o ia ua alofa mai ia te i tatou.

³⁸Auā ua ou mautinoa, e le mafaia e le oti, po o le ola, po o agelu, po o alii, po o e malolosi, po o mea i nei ona po, po o mea atali,

³⁹po o le maualuga, po o le loloto, po o se tasi mea na faia, e le mafaia e ia mea ona faateaeseina mai i tatou i le alofa o le Atua, o loo ia Keriso Iesu lo tatou Alii.