Read Samoan Old Version Bible – O LE TUSI PAIA I. KORINITO, 1 Bible Online

I. KORINITO, 1 - Samoan Old Version Bible – O LE TUSI PAIA bible

I. KORINITO, 1

¹O a‘u o Paulo na valaauina i le finagalo o le Atua e fai ma aposetolo a Iesu Keriso, atoa ma Sosene le uso;

²o la ma tusi lenei i le ekalesia a le Atua o loo i Korinito, o e ua faapaiaina ia Keriso Iesu, ua valaauina e fai ma tagata paia, atoa uma ma e valaau atu i le suafa o lo tatou Alii o Iesu Keriso i mea uma, o lo latou Alii atoa ma lo tatou.

³Ia ia te outou le alofa tunoa ma le manuia mai le Atua lo tatou Tamā, ma le Alii o Iesu Keriso.

⁴Ou te faafetai atu i lo‘u Atua e le aunoa ona o outou, auā o le alofa tunoa o le Atua ua foaiina mai ia te outou ia Keriso Iesu;

⁵ina ua faatamaoaigaina outou e ia i mea uma, i le upu uma lava ma le poto uma;

⁶faapei ona faamaonia le molimau ia Keriso ia te outou;

⁷o lea ua outou le matitiva ai i se mea alofa e tasi; o loo faatalitali outou i le faaaliga o lo tatou Alii o Iesu Keriso;

⁸o ia foi na te faatumauina outou seia oo atu i le iuga, ina ia leai se mea e faasalaina ai outou i le aso o lo tatou Alii o Iesu Keriso.

⁹E faamaoni le Atua, ua valaauina outou e ia ina ia mafuta faatasi ma lona Alo o Iesu Keriso lo tatou Alii.

¹⁰Le au uso e, ou te aioi atu ia te outou i le suafa o lo tatou Alii o Iesu Keriso, ina ia tasi la outou upu uma lava, ina ne‘i i ai ni maseiga ia te outou; a ia maopoopo lava i le loto e tasi ma le manatu e tasi.

¹¹Auā ua ta‘ua mai outou, o‘u uso e, ia te au e o sa Keloē, o ia te outou misa.

¹²O la‘u upu lenei, ua taitoatasi outou ma faapea ane, O a‘u o lo sa Paulō, O a‘u o lo sa Apolō, O a‘u o lo sa Kefā, O a‘u o lo sa Kerisō.

¹³Po ua felefele ea Keriso? Pe na faasatauroina ea Paulo e sui a‘i outou? Pe na papatisoina ea outou i le igoa o Paulo?

¹⁴Ou te faafetai atu i le Atua ou te lei papatisoina so outou, na o Kiripo ma Kaio;

¹⁵ina ne‘i fai mai se tasi na ou papatiso atu i lo‘u nei igoa.

¹⁶Na ou papatisoina foi le aiga o Setefana; a ou te le iloa pe ai se tasi na ou papatisoina.

¹⁷Auā e lei auina mai a‘u e Keriso e papatiso, a ia folafola atu le tala lelei, e le o le poto i upu, ina ne‘i faaleaogaina le satauro o Keriso.

¹⁸Auā o le mataupu i le satauro, o le valea lea i e o malaia; a o le mana o le Atua ia te i tatou ua faaolaina.

¹⁹Auā ua tusia, Ou te faaumatia le poto o e popoto, ma ou faaleaogaina le atamai o e atamamai.

²⁰Po o ifea le tagata poto? Po o ifea le tusiupu? Po o ifea le filifiligā o lenei lalolagi? E le ua avea ea e le Atua le poto o lenei lalolagi ma valea?

²¹Auā o le poto o le Atua, ina ua le iloa le Atua e le lalolagi i lo latou poto, ua finagalo ai le Atua ia faaolaina i le valea o le tala‘iga e ua faatuatua.

²²Auā o loo fai mai Iutaia i se faailoga, ma Eleni o loo saili i latou i le poto;

²³a o i matou, ua matou tala‘i atu ia Keriso na faasatauroina, o le mea e tausuai ai Iutaia, ma le valea ia Eleni;

²⁴a e peitai o e ua valaauina, o Iutaia atoa ma Eleni, ua fai Keriso ma mana o le Atua, ma poto o le Atua ia te i latou.

²⁵Auā o le valea o le Atua e sili lona poto i tagata; o le vaivai foi o le Atua e sili lona malosi i tagata.

²⁶Auā ua outou iloa lo outou valaauina, le au uso e; e le toatele o e popoto i la le tino, e le toatele faipule, e le toatele alii;

²⁷a e peitai ua filifilia e le Atua mea vālea a le lalolagi, ina ia faamāina ē popoto, ma mea vaivai a le lalolagi ua filifilia ia e le Atua e faamāina ai mea malolosi;

²⁸ma mea a tagata nuu, ma mea faatauvaa a le lalolagi, ua filifilia ia e le Atua, atoa ma mea e leai, ina ia faaleaogaina e ia mea o i ai;

²⁹ina ne‘i mitamita se tagata e toatasi i ona luma.

³⁰A ua fua mai ia te ia ona i ai outou ia Keriso Iesu, o le ua avea ai mo tatou poto mai le Atua, o le amiotonu foi, ma le paia, ma le faaolataga;

³¹ina ia faapei ona tusia, O lē mitamita, ia mitamita o ia i le Alii.