Read Samoan Old Version Bible – O LE TUSI PAIA I. KORINITO, 11 Bible Online

I. KORINITO, 11 - Samoan Old Version Bible – O LE TUSI PAIA bible

I. KORINITO, 11

¹Ia outou faaa‘oa‘o mai ia te au, pei o a‘u ia Keriso.

²Le au uso e, ou te vivii atu ia te outou, ina ua outou manatua mai a‘u i mea uma, ma outou taofi mau poloaiga, pei ona ou tuuina atu ai ia te outou.

³A ou te loto ina ia outou iloa, o le ulu o tane taitoatasi o Keriso lea, o le ulu o le avā o le tane lea, a o le ulu o Keriso o le Atua lea.

⁴Ai se tane e tatalo pe perofeta ma lona ulu ua ufiufitia, ua faalemigao ia i lona ulu.

⁵Ai se fafine foi e tatalo pe perofeta ma lona ulu e le ufiufitia, ua faalemigao ia i lona lava ulu; auā o le mea e tasi lava lea ma le tafi o lona lauulu.

⁶Auā a le ufiufitia le fafine ia sele mamā lona lauulu; a e afai o le mea e masiasi ai ona sele mamā pe tafi, ia ufiufitia lava ia.

⁷Auā e le tatau i le tane ona ufiufitia e ia lona ulu, auā ua foliga o ia i le Atua, ma lē e viia ai o ia; a o le fafine o ia lē e viia ai le tane.

⁸Auā e le mai le fafine le tane, a o le fafine, mai le tane ia.

⁹Auā foi na le faia le tane ona o le fafine, a o le fafine ona o le tane.

¹⁰O le mea lea e tatau ai i le fafine ina ia i ai le ufiufi i lona ulu, ona o agelu.

¹¹A e ui lava ina faapea, e leai se tane pe a le o i ai le fafine, e leai foi es fafine pe a le o i ai le tane, i le Alii;

¹²auā pei ona tupu mai o le fafine mai le tane, e faapea foi le tane i le fafine; a o mea uma lava mai le Atua ia.

¹³Ina manatunatu ifo ia outou, pe tatau ona tatalo o le fafine i le Atua ma le le ufiufitia.

¹⁴E le a‘oa‘o mai ea le mafaufau ia te outou, a uumi le lauulu o le tane, o le mea lava lea e mā ai o ia?

¹⁵A e afai e uumi le lauulu o le fafine, o le mea lea e viia ai o ia; auā ua foai mai lona lauulu e fai ma ufiufi ia te ia.

¹⁶A e afai e fia finau se tasi, e leai se tu faapea ia i matou, e leai foi i ekalesia a le Atua.

¹⁷A ou te le vivii atu ia te outou i le mea ou te fai atu ai nei, ona ua le iu i se lelei la outou faapotopoto, a e iu i le leaga.

¹⁸Auā e muamua lea, ua logo mai ia te au, pe a potopoto outou i le ekalesia, ua ia te outou maseiga; ua ou taofi foi e moni nisi mea;

¹⁹auā e ao ina tupu o fevaevaeaiga ia te outou, ina ia faaalia o e ua faamaoni o ia te outou.

²⁰O lenei, pe a potopoto outou i le mea e tasi, e le faapea outou ina ia outou aai i le talisuaga a le Alii.

²¹Auā a aai, ua taitoatasi ma muai fai lana lava talisuaga; ua laina le tasi, ua mālie le tasi.

²²E leai ea lava ni o outou fale tou te aai ai ma inu ai? po ua faatauvaa ea ia te outou le ekalesia a le Atua, ma outou faamāina e ua matitiva? Se a ea se upu ou te fai atu ai ia te outou? Ou te vivii atu ea ia te outou i lena mea? Ou te le vivii lava.

²³O a‘u foi, na ou maua mai le Alii le mea na ou tuuina atu ai ia te outou. O lea lava po na faalataina ai le Alii o Iesu, na ia tago ai le areto,

²⁴ua ia faafetai, ona tofitofi ai lea, ma fai atu, Ina tago ia, ina aai; o lo‘u tino lenei ua tofitofi ma sui o outou, ia outou faia lenei mea ma faamanatuga ia te au.

²⁵Ua ia faapea foi i le ipu ina ua uma ona aai, ua faapea atu, O le ipu lenei o le feagaiga fou lea i lo‘u toto; ia outou faia lenei mea ma faamanatuga ia te au i aso uma tou te feinu ai.

²⁶Auā o aso uma tou te aai ai i lenei areto, ma feinu i lenei ipu, tou te faailoa atu ai le maliu o le Alii seia afio mai o ia.

²⁷O lenei, ai sē ‘ai i lenei areto, pe inu i le ipu a le Alii ma le faaletatau, e nofo sala o ia i le tino ma le toto o le Alii.

²⁸A ia suesue ifo le tagata ia te ia, i le ‘ai ai o ia i lenei areto, ma inu i lenei ipu.

²⁹Auā o lē ai ma inu faaletatau ua ‘ai o ia ma inu i lona lava faasala, ina ua le faautauta o ia i le tino o le Alii.

³⁰O le mea lea ua mamai ai ma vaivai ai ni o outou e toatele, ma nisi e toatele ua latou momoe.

³¹Auā afai ana tatou faamasino ia te i tatou, po ua le faasalaina i tatou.

³²A ua aoaiina i tatou e le Alii ina ua faasalaina, ina ne‘i matuā faasalaina i tatou faatasi ma le lalolagi.

³³O lenei, o‘u uso e, pe a outou faapotopoto e aai, ia faatalitali outou le tasi i le tasi;

³⁴afai foi e fia ‘ai se tasi, ina ‘ai ia i lona lava fale; ina ne‘i avea la outou potopotoga ma mea e faasalaina ai outou. O mea o totoe ou te faatonu i ai pe a ou alu atu.