Read Samoan Old Version Bible – O LE TUSI PAIA I. KORINITO, 13 Bible Online

I. KORINITO, 13 - Samoan Old Version Bible – O LE TUSI PAIA bible

I. KORINITO, 13

¹Afai ou te tautala i gagana a tagata atoa ma agelu, a e leai so‘u alofa, ua avea a‘u ma ‘apa memea taalili, po o se sumapalo tagitagi.

²Afai foi o ia te au ona perofeta ane, ma le iloa o mea lilo uma, ma le poto uma lava; afai foi o ia te au le faatuatua uma e ave ese ai mauga, a e leai so‘u alofa, ou te le aoga lava.

³Afai foi ou te tufatufaina a‘u mea uma e fagaina a‘i e matitiva; afai foi ou te tuuina atu lo‘u tino ina ia susunuina, a e leai so‘u alofa, e leai lava sona aoga ia te au.

⁴E onosai le alofa, e agamalu, e le losilosi le alofa, e le mitamita vale le alofa, e le faafefeteina,

⁵e le amio matagā, e le sailia e ia ana lava mea, e le faaitaitagofie, e le tuuina atu i nisi le leaga,

⁶e le fiafia i le amio leaga, a e fiafia i le faamaoni, e ufiufi i mea uma,

⁷e talitonu i mea uma, e faamoemoe i mea uma, e onosai i mea uma.

⁸E le uma le alofa; a e pe ni perofetaga, e faaleaogaina ia; pe ni gagana, e mavae ia; po o le poto, e faaleaogaina lea.

⁹Auā ua tatou iloa faaleatoa, ma tatou perofeta faaleatoa;

¹⁰a e peitai pe a oo mai le atoatoa, ona faaleaogaina lea o le mea faaleatoa.

¹¹Ona po na ou itiiti ai, na ou tautala ai faatamaitiiti, na ou manatunatu faatamaitiiti, na ou filifili faatamaitiiti; a ua oo ina ou tagata matua, ona ou tiai lea o mea a tamaiti.

¹²Auā o ona po nei tatou te vaavaai ai faanenefu i le faaata, a o ia ona po tatou te fesagai ai; o nei ona po ou te iloa ai faaleatoa, a o ia ona po ou te iloa tino ai, pei ona iloatinoina o a‘u.

¹³A o lenei, o tumau le faatuatua, ma le faamoemoe, ma le alofa, o na mea e tolu; a o le sili o na mea o le alofa lea.