Read Samoan Old Version Bible – O LE TUSI PAIA I. KORINITO, 15 Bible Online

I. KORINITO, 15 - Samoan Old Version Bible – O LE TUSI PAIA bible

I. KORINITO, 15

¹Le au uso e, ou te faailoa atu ia te outou le tala lelei na ou folafolaina atu ia te outou, na outou talia foi, o loo tumau i ai foi outou,

²ua ola ai foi outou; pe afai tou te taofi mau i le mataupu na folafolaina e a‘u ia te outou; pe afai ua outou le talia fua.

³Auā na ou tuuina atu ia te outou mea muamua o mea foi ia na ou maua foi e a‘u; na maliu Keriso ma sui o a tatou agasala, pei ona tusia;

⁴na tanu foi o ia, ma toe tu mai i le aso tolu, pei o upu ua i Tusi.

⁵Na iloa foi o ia e Kefa, ona iloa lea e le toasefulu ma le toalua.

⁶Ona toe iloa lea o ia e le au uso e lima selau ma ona tupu ina ua faatasi; o le toatele foi o ia latou o ola mai, ua oo i ona po nei; a o isi ua momoe.

⁷Ona toe iloa lea o ia e Iakopo, ona iloa lea e le au aposetolo uma.

⁸E mulimuli lava ona iloa o ia e a‘u nei, e peiseai se tama fanau le au.

⁹Auā o a‘u o le aupito itiiti o le au aposetolo; e le aoga ona ta‘ua o a‘u o le aposetolo, auā na ou saua atu i le ekalesia a le Atua.

¹⁰A o le alofa tunoa o le Atua ua ou faapenei ai a‘u; o lona alofa tunoa foi o ia te au, e le faaleaogaina lea, a ua sili la‘u galuega i a latou uma; a e peitai e le o a‘u, a o le alofa tunoa o le Atua ua ia te au.

¹¹O lenei, po o a‘u, po o i latou, e faapea ona matou tala‘iina atu, sa faapea foi ona outou talitonu.

¹²Afai foi ua tala‘iina Keriso ua ia toe tu mai nai e ua oti, pe faapefea ona fai mai o isi o outou, e leai se toe tu mai o e ua oti?

¹³A e afai e leai se toe tu mai o e ua oti, po ua le toe faatuina mai Keriso;

¹⁴afai foi ua le toe faatuina mai Keriso, po ua faaleaoga la matou tala‘i, ua faaleaoga foi lo outou faatuatua.

¹⁵Ua avea foi i matou ma molimau pepelo i a le Atua; auā ua molimau i matou i le Atua, na ia toe faatuina mai Keriso, o le na le toe faatuina e ia, pe afai e moi e le toe tutū mai e ua oti.

¹⁶Auā afai e le toe tutū mai e ua oti, po ua le toe faatuina ma Keriso.

¹⁷Afai foi ua le toe faatuina Keriso, ua faaleaoga lo outou faatuatua, ua nofo sala pea outou;

¹⁸i le ma lea foi, ua fano e ua momoe ia Keriso.

¹⁹Afai e gata i lenei olaga mea tatou te faamoemoe i ai ia Keriso, ua sili lo tatou malaia i tagata uma lava.

²⁰A o lenei, ua toe faatuina mai Keriso i e ua oti, ua avea ma faapolopolo o e ua momoe.

²¹Auā ua oo mai le oti talu le tagata, ua oo mai foi le toe tutū o e ua oti talu le tagata.

²²Auā faapei ona oti uma ia Atamu, e faapea foi ona faaolaina uma ia Keriso.

²³A e peitai e taitoatasi ma lona lava tofi; o le faapolopolo o Keriso lea, mulimuli ane o e o ia Keriso e toe tutū i lona afio mai.

²⁴Ona oo ai lea i le gataaga, e tuuina atu ai e ia le malo i le Atua, o le Tamā lea, pe a uma ona faaumatia e ia o alii sili uma, ma faipule uma, ma e malolosi.

²⁵Auā e tatau ona pule o ia, seia tuuina e ia ona fili uma lava i lalo o ona vae.

²⁶O le toe fili e faaumatia, o le oti lea;

²⁷auā, Ua tuuina e ia o mea uma i lalo o ona vae; a e peitai ina ua fai mai, Ua tuuina i lalo mea uma ia te ia, ua iloa tino ai, ua vavae atu le na ia tuuina i lalo o mea uma ia te ia.

²⁸Pe a uma foi ona tuuina i lalo ia te ia o mea uma, ona tuuina i lalo foi lea o le Alo lava i le na tuuina i lalo ia te ia o mea uma, ina ia pule aoao le Atua i le aoao o mea.

²⁹A faapea, pe faapefea e ua papatisoina ma sui o e ua oti? Afai e moni, e le toe tutū e ua oti, ona o le a ea ua papatisoina ai i latou ma sui o e ua oti?

³⁰Se a foi e pagatia ai i matou i itu aso uma lava?

³¹Ou te augani i le mitamita ua ia te au ona o outou ia Keriso Iesu lo tatou Alii, ou te oti i aso fai soo.

³²Se a ea se aoga ia te au ona ua ou tau ma manu feai i Efeso, pei o le tu a tagata, pe afai e le toe tutū e ua oti? ina tatou aai ma inu, auā o a taeao tatou te oti ai.

³³Aua ne‘i faaseseina outou, O le feoai ma e amio leaga e leaga ai amio lelei.

³⁴Ina ala mai ia i le amiotonu, a e aua ne‘i agasala; auā ua pouliuli nisi i la le Atua; ou te faapea atu ia te outou e faamā ia te outou.

³⁵A e fai mai se tasi, Pe faapefea ona toe tutū mai o e ua oti? se a foi le uiga o le tino latou te o mai ai?

³⁶O oe na le valea; o le mea e luluina e oe e le ola lea pe afai e le pala.

³⁷O le mea foi e te lulu, ua e le luluina le tino e tupu ai; a o le fua lava, atonu se saito, po o se tasi o ia mea.

³⁸A e avane i ai le tino e le Atua, pei ona finagalo i ai o ia; o fua foi taitasi ma lona lava tino.

³⁹Ua le tino e tasi tino uma lava; a e ese le tino o tagata, ese le tino o manu, ese le tino o i‘a, ese le tino o manu felelei.

⁴⁰E i ai foi tino faalelagi ma tino faalelalolagi; a e ese le matagofie o le faalelagi, ese lo le faalelalolagi.

⁴¹E ese le pupula o le la, ese foi le pupula o le masina, ese foi le pupula o fetu; auā ua ese le pupula o le tasi fetu i lo le tasi fetu.

⁴²E faapea foi le toe tutū mai o e ua oti; eluluina ma le pala, e toe faatuina mai ma le le pala;

⁴³e luluina ma le matagā, e toe faatuina mai ma le matagofie; e luluina ma le vaivai, e toe faatuina mai ma le malosi;

⁴⁴e luluina le tino faaletino, e toe faatuina mai o le tino faaleagaga; e i ai le tino faaletino, e i ai foi le tino faaleagaga.

⁴⁵E faapea foi ona tusia, Na faia Atamu le uluai tagata ma tagata ola; a o le Atamu mulimuli, o le Agaga faaola o ia.

⁴⁶A e peitai e le muamua le faaleagaga, a o le faaletino; ona mulimuli ai lea o le faaleagaga.

⁴⁷E faaleeleele le uluai tagata, na fua mai i le eleele; a o le tagata mulimuli, o le Alii lea mai le lagi.

⁴⁸Pei o lē faaleeleele, e faapea lava o e faaleeleele; pei o lē faalelagi, e faapea lava o e faalelagi.

⁴⁹Faapei ona foliga o i tatou i lē faaleeleele, e faapea lava ona foliga o i tatou i lē faalelagi.

⁵⁰Le au uso e, o la‘u upu lenei, e le mafaia ona avea o le malo o le Atua ma tofi o i latou ua i ai tino aano ma toto; e le fai foi le ola pea ma tofi o le iu vale.

⁵¹Faauta mai, ou te ta‘u atu ia te outou le mea lilo; e le momoe i tatou uma, a e liua i tatou uma,

⁵²e faafuasei lava, o le emo o le mata, pe a ilia le pu faauma; auā e ilia lava, e toe tutū mai ai e ua oti ma le ola pea, e liua foi i tatou.

⁵³Auā e tatau ona ofu o lenei tino iu vale i le tino ola pea, ia ofu foi lenei tino oti i le tino le oti lava.

⁵⁴Pe a ofu foi lenei tino iu vale i le tino ola pea, a ofu foi lenei tino oti i le tino le oti lava, ona taunuu ai lea o le upu ua tusia. Ua faaumatia le oti i le manumalo.

⁵⁵Le oti e, o fea o i ai lou tui? Le tuugamau e, o fea o i ai lou mauumalo?

⁵⁶O le tui o le oti, o le agasala lea, o le malosi foi o le agasala o le tulafono lea;

⁵⁷a e faafetai i le Atua, o le na te foaiina mai le manumalo ia te i tatou talu lo tatou Alii o Iesu Keriso.

⁵⁸O lenei, o‘u uso pele e, ia outou tumau, ma le le faagaeetia, ia alualu lo outou faamalosi i le galuega a le Alii ma le le aunoa ina ua outou iloa e le se mea faaleaoga lo outou tautiga i le Alii.