Read Samoan Old Version Bible – O LE TUSI PAIA I. KORINITO, 16 Bible Online

I. KORINITO, 16 - Samoan Old Version Bible – O LE TUSI PAIA bible

I. KORINITO, 16

¹A o le aotelega mo le au paia, pei ona au poloai atu i ekalesia i Kalatia, ia faapea foi outou ona fai.

²O le aso muamua o lea vaisapati ma lea vaisapati, ia outou taitasi ma tuu ane ai ni ana mea, ia faatatau mea e teu ma lona manuia ina ne‘i faia ni aotelega pe a ou alu atu.

³Pe a ou alu atu, ona ou auina atu lea ma le tusi o i latou e filifilia e outou, latou te momoli atu i a outou mea alofa i Ierusalema;

⁴a e afai e tatau ona ou alu foi, matou te o faatasi ma a‘u.

⁵Ou te alu atu foi ia te outou pe a ou ui ane i Maketonia; auā ou te ui ane lava i Maketonia.

⁶Atonu foi tatou te mau ma outou, pe seia te‘a mai le tausaga maalili; ina ia molia e outou la‘u malaga i se mea ou te alu i ai.

⁷Auā ou te le loto ina ou afe atu e asiasi ia te outou i nei ona po; a e ou te faamoemoe ina ia levaleva ane lo‘u nofo ia te outou, pe a finagalo i ai le Alii.

⁸A e ou te nofo pea i Efeso seia oo i penetekoso.

⁹Auā ua faaavanoa mo a‘u le faitotoa lautele ma le matuā aoga, e toatele foi o e faatu‘i ese.

¹⁰Afai e alu atu Timoteo, ia outou faaeteete ina ia ia te outou o ia ma le le mata‘u; aua ua faia e ia le galuega a le Atua pei o a‘u nei lava;

¹¹o le mea lea aua ne‘i ta‘ufaatauvaaina ai o ia e se tasi, a ia molia mai o ia e outou ma le saogalemu, seia oo mai o ia ia te au; auā ou te faatalitali atu ia te ia ma le au uso.

¹²O lo tatou uso foi o Apolo, sa tele lo‘u aioi atu ia te ia, ina ia latou o atu ma le au uso ia te outou; a e le loto lava ia ina alu atu i ona po nei, a e alu atu pe a oo mai ona po e tatau ai.

¹³Ina mataala ia outou, ia outou tumau i le faatuatua, ia outou faatamatane, ia faamalolosi outou.

¹⁴Ia faia uma a outou mea i le alofa.

¹⁵Le au uso e, ua outou iloa le aiga o Setefana, o le faapolopolo i latou i Akaia, ma ua tuuina atu i latou e i latou e auauna i le au paia; ou te aioi atu ia te outou,

¹⁶ia outou usiusitai i e o faapea, atoa ma i latou uma o e fesoasoani mai ma tautigaina.

¹⁷Ua ou fiafia i le oo mai o Setefana ma Fotunato ma Akaiko, auā ua latou faaatoatoa mai a outou mea sa totoe;

¹⁸auā ua latou faamafanafanaina lo‘u loto, atoa ma lo outou; o le mea lea ia outou tali lelei ai i e ua faapea.

¹⁹O loo alolofa atu ia te outou ekalesia o i Asia. O loo alolofa tele ia te outou i le Alii o Akula ma Pisila, ma le ekalesia i lo la fale.

²⁰O loo alolofa atu ia te outou le au uso uma. Ia outou fealofani i le feasogi paia.

²¹O a‘u o Paulo, si o‘u alofa atu ia te outou i la‘u lava tusilima.

²²Ai se tagata e le alofa i le Alii o Iesu Keriso ia anatema maranata lava ia.

²³Ia ia te outou le alofa tunoa o le Alii o Iesu Keriso.

²⁴Ia ia te outou uma lo‘u alofa ia Keriso Iesu. Amene.