Read Samoan Old Version Bible – O LE TUSI PAIA I. KORINITO, 2 Bible Online

I. KORINITO, 2 - Samoan Old Version Bible – O LE TUSI PAIA bible

I. KORINITO, 2

¹O a‘u nei foi, le au uso e, ou te lei alu atu ma le sili o le upu ma le poto, ina ua ou alu atu ia te outou i lo‘u tala‘i atu ia te outou le mau a le Atua.

²Auā na tonu lo‘u manatu, ou te le iloa se tasi mea ia te outou tau lava o Iesu Keriso, o ia lava na faasatauroina.

³Na ou i ai foi ia te outou ma le vaivai, ma le mata‘u, ma le gatete tele;

⁴e lei sauni atu foi la‘u upu, ma la‘u tala‘iga i upu mālie o le poto o tagata, a e peitai o le faasino mai e le Agaga ma le mana;

⁵ina ia le i ai lo outou faatuatua i le poto o tagata, a o le mana o le Atua.

⁶A e matou te tautala atu i le poto i e ua uma ona a‘oa‘oina; a e le o le poto o lenei lalolagi po o le poto o alii o lenei lalolagi ua faaleaogaina;

⁷a e peitai matou te tautala atu i le poto o le Atua i le upu lilo sa natia, na tofia e le Atua anamuā anamuā lava, ina ia tatou manuia ai;

⁸o le mea na le iloa e se alii e tasi o lenei lalolagi; auā ana latou iloa, po ua latou le faasatauroina le Alii e ona le manuia.

⁹A e pei ona tusia, O mea e lei vaaia e mata, e lei lagona foi e taliga, e lei oo foi i le loto o se tagata, o mea ia ua saunia e le Atua mo i latou o e alofa ia te ia.

¹⁰A ua faaalia mai ia mea e le Atua ia te i matou e lona Agaga; auā e suesue ifo le Agaga i mea uma, o mea loloto foi a le Atua.

¹¹Po o ai foi se tagata ua iloa mea a le tagata, ua na o le agaga o le tagata o loo i totonu ia te ia? E faapea foi ona le iloa e se tasi mea a le Atua, ua na o le Agaga o le Atua.

¹²A ua maua e i matou e le o le agaga o lenei lalolagi, a o le agaga mai le Atua, ina ia matou iloa mea ua foaifuaina mai e le Atua ia te i matou.

¹³O ia mea foi matou te tautala atu ai i upu e a‘oa‘oina mai e le Agaga Paia, a e le o upu e a‘oa‘oina ai i le poto o tagata, o loo faamatalaina mea faaleagaga i upu faaleagaga.

¹⁴A e le talia e le tagata faaletino o mea a le Agaga o le Atua; auā o mea valea ia ia te ia, na te le mafai foi ona iloa, auā e faamasinoina faaleagaga.

¹⁵A o le tagata faaleagaga e faamasino e ia i mea uma, a e le faamasinoina o ia e se tasi.

¹⁶Auā po o ai ua na iloa le finagalo o le Alii na te a‘oa‘oina atu o ia? A ua tatou maua le finagalo o Keriso.