Read Samoan Old Version Bible – O LE TUSI PAIA I. KORINITO, 3 Bible Online

I. KORINITO, 3 - Samoan Old Version Bible – O LE TUSI PAIA bible

I. KORINITO, 3

¹O a‘u foi, le au uso e, na ou le mafaia ona tautala atu ia te outou faapei o e faaleagaga, a e peitai pei o e faaletino, pei o tama meamea ia Keriso.

²Na ou fafaga ia te outou i le suāsusu, a e le o mea aano; auā na outou le lavā i ona po ia, i le tou te le lavā foi ua oo mai i ona po nei; auā ua faaletino pea outou;

³auā ina o i ai ia te outou le mataua, ma le misa, ma fevaevaeiga, ua le faaletino ea outou, ma savavali i la tagata?

⁴Auā ina o fai mai le tasi, O a‘u o lo sa Paulō; ma le tasi, O a‘u o lo sa Apolō, ua le faaletino ea outou?

⁵O ai foi Paulo? O ai ea Apolo? E le o auauna lava ea na outou faatuatua ai, pei ona foai e le Alii taitasi ia te i maua?

⁶Na ou totōina, na faasūsūina e Apolo; a e peitai o le Atua ua faatupuina.

⁷O lenei, e le o lē totō, e le o lē faasūsū; a e peitai o le Atua o le na te faatupuina.

⁸A o lē totō foi ma lē faasūsū, e tasi lava i laua; a e taitasi ma lona lava taui e maua, e tusa ma lana lava galuega.

⁹Auā o le au faigaluega i matou faatasi ma le Atua; o outou o le faatoaga a le Atua o outou o le fale o fai o le Atua.

¹⁰E tusa ma le alofa o le Atua na foaiina mai ia te au, pei o se autu o tufuga e poto, na ou tuu le faavae, o le tasi foi o loo ati ae; a ia taitoatasi ma faaeteete pe faapefea ona ati ae.

¹¹Auā e le mafaia e se tasi ona tuu se isi faavae i le ua uma ona tuuina, o Iesu le Keriso lea.

¹²A e afai e ati ae e se tasi i lenei faavae o auro, o ario, o maa tāua; o laau, o vaofalī, po o tagutugutu o saito;

¹³e faaalia galuega a tagata taitoatasi; e faailoa foi e le aso, auā e faaalia i le afi; e tofotofoina foi galuega a tagata taitoatasi i le afi po ua faapefea.

¹⁴Afai e tumau le galuega a se tasi na ia ati ae, e maua e ia le taui.

¹⁵Afai e faamuina le galuega a se tasi, e māumau ana mea; peitai ane e sao o ia, a e pei o se na ui mai i le afi.

¹⁶Tou te le o iloa ea o le malumalu outou o le Atua, o loo nofo foi le Agaga o le Atua i totonu ia te outou?

¹⁷Afai e faaleaga e se tasi le malumalu o le Atua, e faaleagaina lena tagata e le Atua; auā e paia le malumalu o le Atua, o outou lava ia.

¹⁸Aua ne‘i ai se tasi e faaseseina o ia e ia. Afai ua ia te outou se tasi o manatu e poto ia i lenei lalolagi, ia avea ia ma vale, ina ia poto ai o ia.

¹⁹Auā o le poto o lenei lalolagi o le valea lea i luma o le Atua; auā ua tusia, E maua e ia o e popoto i a latou lava togafitiga;

²⁰i le ma lea, Ua silafia e le Alii manatunatu o e popoto, ua faatauvaa ia.

²¹O lenei, aua le mitamita se tasi i tagata; auā o mea uma o a outou ia,

²²po o Paulo, po o Apolo, po o Kefa, po o le lalolagi, po o le ola, po o le oti, po o mea i nei ona po, po o mea atali; o mea uma lava o a outou ia;

²³e o Keriso foi outou; e o le Atua foi Keriso.