Read Samoan Old Version Bible – O LE TUSI PAIA I. KORINITO, 4 Bible Online

I. KORINITO, 4 - Samoan Old Version Bible – O LE TUSI PAIA bible

I. KORINITO, 4

¹Ia faapea ona manatu o tagata ia te i matou, o auauna a Keriso, o auauna foi e tausi i upu lilo a le Atua.

²O lenei, e suesueina i auauna tausi mea ina ia iloa ai le tagata ua faamaoni.

³A o le mea matuā māmā lava ia te au ona faamasinoina o a‘u e outou, po o le faamasinoga a tagata; ou te le faamasino lava a‘u ia te a‘u.

⁴Auā ou te le iloa ifo i lo‘u loto so‘u sese, a e le ta‘uamiotonuina a‘u i lea mea; a o le na te faamasinoina a‘u o le Alii lea.

⁵O lenei, aua tou te faamasino i se tasi mea a o le oo mai ona po, seia afio mai le Alii, o le na te faamalamalamaina mea lilo io i le pouliuli, ma faaalia filifiliga o loto; e i ai ona taitasi ma ta‘uleleia e le Atua.

⁶Le au uso e, ua ou faatatauina ia mea ia te i maua ma Apolo ona o outou; ina ia a‘oa‘oina ai outou ia i maua, ia le sili lo outou manatu i le mea ua tusia, ina ne‘i ai so outou e fefete le loto ona o le tasi, a e faasiasia i le isi.

⁷Auā o ai ea na te faaeseina oe? se a foi se mea ua ia te oe e lei foaiina atu? A e afai na foaiina atu ia te oe, se a le mea ua e mitamita ai, peiseai e lei foaiina atu lava?

⁸Ua maoona nei outou, ua tamaoaiga nei, ua avea outou ma tupu a e le o i ai matou; a ni tupu outou po ua lelei lava lea ia te au, ina ia avea foi i matou ma tupu faatasi ma outou.

⁹Auā o lo‘u manatu ua tuuina atu i matou le au aposetolo e le Atua ia mulimuli, pei o e ua tofia ia oti; auā ua avea i matou ma mataaga i le lalolagi, o agelu atoa ma tagata.

¹⁰O loo valelea i matou ona o Keriso, a o outou o loo atamamai ia Keriso; o loo vaivai i matou, a ua malolosi outou; ua mamalu outou, a ua faaletaualoaina i matou.

¹¹Ua oo mai i lenei lava itu aso, ua matou fia aai, ma fia inu, ma ua le lavalavā, ma taufaitu‘iina, ma maumau solo;

¹²o loo tautiga i matou o galulue i o matou lava lima; o loo agateleina i matou, matou te upu lelei atu; o loo sauaina i matou, matou te onosai;

¹³o loo faifaia i matou, matou te aioi atu; ua matou pei o otaota o le lalolagi, o le punefu foi o mea uma, ua oo mai lava i ona po nei.

¹⁴Ou te le tusi atu na mea e faamāina ai outou, a e peitai ou te apoapoai atu ia te outou o la‘u lava fanau pele.

¹⁵Auā e ui ina toamano o ta‘ita‘i tama ia te outou ia Keriso, a e peitai e le toatele o outou tamā; auā na ou fanaua outou i le tala lelei ia Keriso Iesu.

¹⁶O lenei, ou te aioi atu ia te outou, ia outou faaa‘oa‘o ia te au.

¹⁷O le mea lea ua ou auina atu ai Timoteo ia te outou, o lo‘u atalii pele lea ma le faamaoni i le Alii, o le na te faamanatuina outou i la‘u amio i le galuega a Keriso, pei ona ou a‘oa‘o i mea uma i ekalesia uma.

¹⁸O loo fefete loto o isi, peiseai a ou le alu atu ia te outou.

¹⁹A e vave ona ou alu atu ia te outou, a finagalo i ai le Alii; ona ou iloa ai lea e le o le upu a e loto fefete a o lo latou malosi.

²⁰Auā o le malo o le Atua e le o i le upu, a o le malosi.

²¹Po o le fea tou te loto i ai? ou te alu atu ea ia te outou ma le sasa, po o le alofa ma le loto agamalu?