Read Samoan Old Version Bible – O LE TUSI PAIA I. KORINITO, 8 Bible Online

I. KORINITO, 8 - Samoan Old Version Bible – O LE TUSI PAIA bible

I. KORINITO, 8

¹A a mea e fāsia mo tupua, ua tatou iloa, auā ua tofu i tatou ma le poto; e faafefete le poto, a o le alofa e faamafanafana lea.

²Afai foi e manatu se tasi ua na iloa se mea, e lei iloa lava e ia se mea e tasi pei ona tatau ona iloa;

³a e afai e alofa atu se tasi i le Atua, ua silafia lena tagata e ia.

⁴A o le ‘ai i mea e fāsia mo tupua, ua tatou iloa o le mea faatauvaa i le lalolagi le tupua; e leai foi se tasi Atua, ua na o le toatasi lava.

⁵Auā e ui lava ina o i ai e ua ta‘ua o atua, o i le lagi ma le lalolagi, (ona ua i ai atua e toatele, ma alii e toatele.)

⁶a e peitai ua ia te i tatou le Atua e toatasi o le Tamā ia, e fua mai ia te ia mea uma, o i tatou foi ua fai mo ia; ma le Alii e toatasi o Iesu Keriso, ua faia e ia mea uma, o i tatou foi ua faia e ia.

⁷A ua le tofu poto tagata; o loo aai nisi ma le manatu ifo i le tupua, ua oo mai lava i ona po nei, e pei o se mea ua fasia mo tupua, ua leaga ai foi lo latou manatu ifo ina ua vaivai.

⁸E le lelei i tatou i luma o le Atua ona o le mea e ‘ai; auā pe afai tatou te aai, e le sili ai lo tatou lelei; pe afai foi tatou te le aai, e le sili ai lo tatou leaga.

⁹A ia outou faaeteete, ne‘i avea la outou nei faitalia ma mea e tausuai ai e ua vaivai.

¹⁰Auā a vaai se tasi ia te oe ua i ai le poto, o loo e taoto e ‘ai i le fale o le tupua, e le faamalosia ea le manatu ifo o le ua vaivai, ina ia ‘ai e ia i mea e fāsia mo tupua?

¹¹O lou poto foi e fano ai le uso vaivai, o le na maliu ai Keriso mo ia.

¹²A faapea foi ona outou agasala i le au uso, ma faatausuai lo latou manatu ifo vaivai, ua outou agasala ia Keriso.

¹³O lenei, afai e tausuai lo‘u uso ona o le mea e ‘ai, ou te le toe ‘ai lava i tino o manu e oo i le faavavau, ina ne‘i tausuai ai lo‘u uso ia te au.