Read Samoan Old Version Bible – O LE TUSI PAIA II KORINITO, 10 Bible Online

II KORINITO, 10 - Samoan Old Version Bible – O LE TUSI PAIA bible

II KORINITO, 10

¹O a‘u lava o Paulo o lē faamaulalo pe a a‘u i ai ia te outou, a e faamalosi pe a ou le i ai ia te outou, ou te aioi atu ia te outou ona o le agamalu ma le alofa o Keriso;

²ou te ole atu lava ina ne‘i ou fai faamalosi pe a ou i ai ia te outou, ma le faamalosi ou te manatu e matuā faamalosi atu ai i nisi, o e manatunatu ia te i matou peiseai ua matou savavali faaletino.

³Auā e ui lava ina matou savavali i le tino, matou te le tau faaletino;

⁴auā o auupega a lo matou nei taua e le faaletino ia, a e faamalolosia el e Atua e lepetia ai ‘olo;

⁵o loo lepeti i lalo masalosaloga, ma mea maualuluga uma ua faasiasia i le mataupu a le Atua, o loo faatoilaloina manatu uma ia anaana ia Keriso;

⁶o loo nofo sauni foi i matou e taui atu i le le anaana uma, pe a faaatoatoaina lo outou anaana.

⁷Tou te vaavaai ea i la le tino? Afai e taofi se tasi o ia o le sa Kerisō, se‘i toe manatu ifo ia, e pei o ia o lo sa Kerisō, e faapea foi i matou o sa Kerisō.

⁸Auā e ui lava ina faatele ane teisi lō‘u mitamita i le pule o ia te i matou, ua foaiina mai ia te i matou e le Alii e ati ae, a e le ina ia lepetia outou, ou te le mā ai;

⁹ina ne‘i peiseai ou te faamatau ia te outou i tusi.

¹⁰Auā ua faapea a nisi, O ana tusi e mamafa ma malolosi ia; a o lona tino pe a nofo mai e vaivai lea, ma lana upu e faatauvaa lea.

¹¹Ia manatua lenei mea e lea tagata, pei o i matou i le upu i tusi ina o matou le i ai, matou te faapea foi i le amio pe a matou i ai.

¹²Auā matou te le faamalosi ina faatasia, pe faatusatusaina ai matou ma nisi, o e vivii i latou ia te i latou; a o i latou, o loo fefuafuai i latou ia te i latou, ma fefaatusatusai i latou ia te i latou, e le popoto i latou.

¹³A e matou te le mitamita i mea ua le fuatia mai, a e peitai e tusa i le fua o le matāgaluega ua tofia mai e le Atua ia te i matou, o le fua e oo atu lava ia te outou.

¹⁴(Auā matou te le fua faasili, peiseai ua matou le oo atu ia te outou, a ua matou oo atu lava ia te outou i le tala lelei a Keriso.)

¹⁵O loo matou le mitamita i mea ua le fuatia mai, o galuega ia a isi tagata; a o loo faamoemoe i matou e faateleina ia te outou la matou matāgaluega, e atili ai pe a tupu lo outou faatuatua,

¹⁶matou te folafola atu ai le tala lelei i nuu i tala atu o outou, o loo le mitamita i le matāgaluega a le tasi tagata ua uma ona saunia.

¹⁷A o lē mitamita, ia mitamita o ia i le Alii.

¹⁸Auā e le talia o le ua vivii o ia ia te ia, a o le ua viia e le Alii.