Read Samoan Old Version Bible – O LE TUSI PAIA II KORINITO, 4 Bible Online

II KORINITO, 4 - Samoan Old Version Bible – O LE TUSI PAIA bible

II KORINITO, 4

¹O le mea lea matou te le faavaivai ai, o i matou ua i ai lenei faiva, ina ua alofaina i matou;

²a ua matou lafoai mea lilo e mamā ai, e le o savavali ma le amio pepelo, e le o faafilogia e i matou le afioga a le Atua; a ua faailoa matou e i matou i le loto fuatia ifo o tagata uma i luma o le Atua i lo matou faaali atu le upu moni.

³Afai foi ua ufitia la matou tala lelei, ua ufitia ia i e ua fano;

⁴ua faatauasoina manatu o i latou o e le talitonu e le atua o le lalolagi nei, ina ne‘i pupula atu ia te i latou le malamalama o le tala lelei i le mamalu o Keriso, ua tusa o ia ma le Atua.

⁵Auā matou te le tala‘iina i matou, a o Keriso Iesu le Alii; o i matou nei foi o a outou auauna ona o Iesu.

⁶Auā o le Atua o le na fai atu ia pupula mai le malamalama mai le pouliuli, ua faapupula mai e ia i o matou loto, ina ia malamalama e iloa ai le mamalu o le Atua i fofoga o Iesu Keriso.

⁷A ua ia te i matou lenei oa i ipu omea, ina ia i le Atua le matuā tele o le mana, a e le mai ia te i matou.

⁸Ua puapuagatia i matou i mea uma, a e le faaatuatuvaleina; ua fememeai, a e le matuā fememeai;

⁹ua sauaina, a e le tuulafoaiina; ua lafotuina i lalo, a e le fano;

¹⁰o loo tauave i le tino e le aunoa le fasiotia o le Alii o Iesu, ina ia faaalia foi le soifua o Iesu i o matou tino.

¹¹Auā o i matou nei o loo ola ua tuuina atu pea lava i le oti ona o Iesu, ina ia faaalia foi le soifua o Iesu i o matou tino augavale.

¹²O lenei, ua galue le oti i totonu ia te i matou, a o le ola i totonu ia te outou.

¹³O loo ia te i matou lea lava loto faatuatua, pei ona tusia, Ua ou faatuatua, o le mea lea na ou tautala atu ai; o i matou foi ua matou faatuatua, o le mea lea ua matou tautala atu ai.

¹⁴Ua iloa e i matou, o ia na toe faatu i le Alii o Iesu, e toe faatutūina foi e ia i matou ia Iesu, ma tuuina atu i matou faatasi ma outou.

¹⁵Auā ona o outou o mea uma, ina ia faatele ai le viiga i le Atua e le faafetai o le toatele ona o le alofa tunoa ua matuā tele.

¹⁶O le mea lea matou te le faavaivai ai; auā e ui lava ina tauāu ina uma lo matou tagata i fafo, ua faafouina lē i totonu i lea aso ma lea aso.

¹⁷Auā o lo matou puapuaga mamasagia ma le vave mavae, e tupu mai ai mo i matou le manuia mamafa e matuā silisili ese lava ma le faavavau;

¹⁸o loo matou le manatunatu i mea ua vaaia, a o mea e le vaaia; auā o mea ua vaaia e gata mai ia, a o mea e le vaaia e faavavau ia.