Read Samoan Old Version Bible – O LE TUSI PAIA II KORINITO, 9 Bible Online

II KORINITO, 9 - Samoan Old Version Bible – O LE TUSI PAIA bible

II KORINITO, 9

¹A e le aoga ona ou tusi atu ia te outou i le alofa i le au paia;

²auā ua ou iloa lo outou loto fiafia na ou mitamita ai ia te outou ia Maketonia, ina ua saunia Akaia talu le tausaga ua mavae; o lo outou maelega foi na tupu ai le losilosi i le toatele.

³A ua ou aauina atu le au uso lena, ina ne‘i faaleaogaina lo matou mitamita ia te outou i lenei mea, a ia uma ona outou saunia, pei ona ou fai atu ai;

⁴ina ne‘i faamāina i matou, (a e tuu pea ia outou,) i lenei faamalosi i le mitamita, pe afai matou te o atu ma ni Maketonia, ona iloa ai lea o outou ua le uma ona saunia.

⁵O le mea lea na ou manatu ai, e tatau ona ou aioi atu i le au uso lena, latou te muamua atu ia te outou, ia muai sauniuni ai la outou mea alofa, na ta‘ua mai anamua; ina ia uma ona sauni o le mea, e pei o se mea alofa lava, a e le pei o se mea na tupu i le matapeapea.

⁶A o la‘u lenei e fai atu, o le ua itiiti ana saito e lulu, e itiiti foi ana e selesele mai; a o le ua tele ana e lulu, e tele foi ana e selesele mai.

⁷Ia taitoatasi ma foai e pei ona filifili i lona loto; aua ma le tiga, aua foi ma le faatauanauina; auā e alofa le Atua i le ua foai ma le loto mălie.

⁸E mafai foi e le Atua ona faafaulai ia te outou o mea alofa uma; o loo faalavaina i aso uma o mea uma ia te outou i mea uma lava, ina ia faulai ia te outou o galuega lelei uma.

⁹Pei ona tusia. Ua ia faasalalauina ana mea; ua ia avatu i e matitiva, e tumau lana amiotonu e faavavau.

¹⁰O lenei, o le ua foai tele mai saito i le ua lulu ai, ma le mea e ‘ai e ‘ai ai, ia foai mai e ia, ma ia faateleina la outou fua, ma faatupu e ia le fua o la outou amiotonu;

¹¹o loo faatamaoaigaina outou i mea uma lava, e iu ai i le matamau uma, e tupu ai le feafetai i le Atua ona o i matou.

¹²Auā o le sauniga alofa o lenei galuega, e le na ona maua mai ai e le au paia o mea na latou matitiva ai, a e faatele ai le viiga i le Atua i le tele o le faafetai;

¹³o loo vivii atu i latou i le Atua, ona o le faailoga i lenei sauniga alofa; auā ua ta‘ua mai ai lo outou gauai i le tala lelei ia Keriso, ma le matamamau o le alofa fai tele ia te i latou atoa ma tagata uma;

¹⁴o la latou tatalo foi mo outou, o loo naunau tele atu ai ia te outou, ona o le alofa tunoa o le Atua ua matuā tele ia te outou.

¹⁵Faafetai i le Atua i lana mea foai fua e le mafaamatalaina.