Read Samoan Old Version Bible – O LE TUSI PAIA KALATIA, 4 Bible Online

KALATIA, 4 - Samoan Old Version Bible – O LE TUSI PAIA bible

KALATIA, 4

¹Ou te fai atu foi, o aso uma o itiiti ai le suli, e ui lava o ia e ana mea uma, e leai se mea e ese ai o ia ma le pologa;

²a e pule ia te ia faatamā ma auauna e pule, seia oo atu i ona po na tuupoina e le tamā.

³Sa faapea foi i tatou ina o tama iti, sa nofo pologa i tatou i mataupu muamua a le lalolagi.

⁴A ua oo atu i le faaatoaga o tausaga, ona auina mai lea e le Atua o lona Alo, na fanau i le fafine, na fanau ua nofo i le tulafono;

⁵ina ia faatau mai e ia i e na nofo i le tulafono, ia avea i tatou ma tamafai.

⁶O atalii outou, o le mea lea ua auina mai ai e le Atua le Agaga o lona Alo i o outou loto, o valaau, Ava, le Tamā e.

⁷O lea e te le se pologa ai i ona po nei, a o le atalii; a e afai o le atalii, o le suli foi o le Atua ia Keriso.

⁸E moni, o ia ona po ua le iloa ai e outou le Atua na fai ai outou ma pologa i mea e leai lava so latou atua;

⁹a o nei ona po ina ua outou iloa le Atua, a e moni ua iloa lava outou e le Atua, pe faapefea ona outou toe liliu i mataupu muamua e vaivai ma faatauvaa, ua outou toe mananao ea ia outou toe nofo pologa i ai?

¹⁰Tou te anaana i aso, ma masina, ma tau, ma tausaga.

¹¹Ou te fefe ia te outou, ina ne‘i iu ina faaleaogaina la‘u galuega na ou faia ia te outou.

¹²Le au uso e, ou te aioi atu ia te outou, ia faapei o a‘u outou, auā o a‘u ua pei o outou; na le agaleagaina a‘u e outou i se mea e tasi.

¹³Ua outou iloa foi na ou folafola anamua le tala lelei ia te outou ina ua vaivai lo‘u tino;

¹⁴o le tofotofo foi sa ia te au i lo‘u tino e lei ta‘ufaatauvaaina lea e outou, pe inosia e outou, a ua outou talia mai a‘u peiseai se agelu a le Atua, peiseai o Keriso Iesu.

¹⁵Pe faapefea foi lo outou manuia sa fai mai? auā o la‘u mau lenei ia te outou, ana outou mafaia, po ua outou sasali mai o outou mata, ma foai mai ia te au.

¹⁶Ia, ou te se ita atu ea ia te outou i lo‘u ta‘uina atu ia te outou le upu moni?

¹⁷Latou te maelega ia te outou, a e faaletatau; a e peitai latou te fia faateaeseina outou, ina ia outou maelega ia te i latou.

¹⁸A e lelei ona maelega i le mea lelei e le aunoa, aua ne‘i gata ina o ia te outou o a‘u.

¹⁹La‘u fanau e, ou te toe oono ai i o‘u faatiga, seia tino Keriso i totonu ia te outou,

²⁰ou te loto ina ia ou i ai ia te outou i ona po nei, ma tautala faatatau atu, auā ua faaletonu lo‘u manatu ia te outou.

²¹Ina ta‘u mai ia ia te au outou o e fia nonofo i le tulafono, tou te le faalogo atu ea i le tulafono?

²²Auā ua tusia, sa ia Aperaamo atalii e toalua, o le tasi na fanau mai i le fafine nofo pologa, a o le tasi i le fafine o le tama a le eleele.

²³A e peitai o le tama a le fafine nofo pologa, ua fanau lea i la le tino; a o le tama a le fafine o le tama a le eleele, na fanau ia ona o le mea na folafolaina.

²⁴Ua fai ma mea faataoto ia mea; auā o fafine nei o feagaiga e lua ia; o le tasi mai le mauga o Sinai, e fanau mai tama e fai ma pologa, o Akara lea;

²⁵auā o Akara lenei o le mauga o Sinai ia i Arapi; ua la tutusa ma Ierusalema i ona po nei, ua nofo pologa atoa ma lana fanau;

²⁶a o Ierusalema i lugā o le tama a le eleele ia, o le tinā o i tatou uma lava ia.

²⁷Auā ua tusia, Ia e olioli oe le fafine e pa sa le fanau; ia e uio ma leo tele oe sa le faatiga; auā ua tele le fanau a le ua nofo fua i la le nofo tane.

²⁸A o i tatou, le au uso e, o fanau i tatou e tusa ma le mea na folafolaina, pei o Isaako;

²⁹a e faapei ona saua o le na fanau i la le tino i le na fanau i la le Agaga i ia ona po, e faapea foi i ona po nei.

³⁰A e peitai se a ea e fai mai ai le Tusi? Ina tutuli ia le fafine nofo pologa ma lana tama; auā e le tofia le tama a le fafine nofo pologa faatasi ma le tama a le fafine o le tama a le eleele.

³¹O lenei, le au uso e, e le ni fanau i tatou a le fafine nofo pologa, a o le fafine o le tama a le eleele.