Read Samoan Old Version Bible – O LE TUSI PAIA KALATIA, 6 Bible Online

KALATIA, 6 - Samoan Old Version Bible – O LE TUSI PAIA bible

KALATIA, 6

¹Le au uso e, afai e maua se tagata i se tasi agasala, o outou o i la le Agaga ia outou faafoi mai le ua faapeaina ma le loto o le agamalu, ma ia faaeteete oe ina ne‘i faaosoosoina foi oe.

²Ia outou fesui i a outou avega e ave, ma ia faapea ona outou faia le tulafono a Keriso.

³Auā pe a manatu se tasi o le tagata aoga ia, a e leai, ua pelogia o ia e ia i lona manatu.

⁴A ia taitoatasi ma faamasino i lana lava galuega, ona ia te ia lea o se mea e mitamita ai ia te ia lava, a e le o se tasi.

⁵Auā e taitasi ma ave i lana lava avega.

⁶A o le ua a‘oa‘oina i le upu, ia tufa atu e ia mea lelei uma lava i le ua a‘oa‘o mai.

⁷Aua ne‘i faaseseina outou, e le ulagia le Atua auā o le mea e luluina e le tagata, o le mea lava lea e seleseleina mai ai e ia;

⁸o sē lulu i la lona tino, e selesele mai ai e ia i la le tino le mea e pala; a o sē lulu i la le Agaga, e selesele mai ai e ia i la le Agaga le ola faavavau.

⁹Aua ne‘i tatou faapalapala i le amio lelei; auā o ona po e tatau ai tatou te selesele mai ai, pe afai tatou te le faavaivai.

¹⁰O lenei, ia tatou agalelei, ia faatatau i mea e tutupu i lea aso ma lea aso, i tagata uma lava, a e faasili i le aiga o le faatuatua.

¹¹Faauta i le tetele o mataitusi ua ou tusi atu ia te outou i lo‘u lava lima.

¹²O i latou uma o e fia ta‘uleleia e tagata, latou te faatauanau ia peritomeina outou, ua na o lea, ina ne‘i faasauaina i latou ona o le satauro o Keriso.

¹³Auā foi o i latou o e ua peritomeina, latou te le anaana i le tulafono; a e peitai latou te loto ina ia peritomeina outou, ina ia latou mitamita ai i o outou tino.

¹⁴A o a‘u, aua ne‘i ou mitamita i se mea, tau lava o le satauro o lo tatou Alii o Iesu Keriso, o ia ua faasatauroina ai le lalolagi ia te au, o a‘u foi i le lalolagi.

¹⁵Auā e le aoga le peritome, po o le le peritomeina i e ua ia Keriso Iesu, tau lava ina ia faafouina i latou.

¹⁶O i latou uma foi o e savavali e faatatau i lenei mataupu, ia ia te i latou le manuia ma le alofa, ia i ai foi i le Isaraelu o le Atua.

¹⁷E amata i ona po nei, aua le toe faalavelave se tasi ia te au; auā o a‘u ou te tauave i faailoga o le Alii o Iesu i lo‘u nei tino.

¹⁸Le au uso e, ia i ai i o outou agaga le alofa tunoa o lo tatou Alii o Iesu Keriso. Amene.