Read Samoan Old Version Bible – O LE TUSI PAIA EFESO, 1 Bible Online

EFESO, 1 - Samoan Old Version Bible – O LE TUSI PAIA bible

EFESO, 1

¹O a‘u o Paulo, o le aposetolo a Iesu Keriso i le finagalo o le Atua, o la‘u tusi lenei i le au paia o i Efeso, o e faatuatua foi ia Keriso Iesu;

²ia ia te outou le alofa tunoa, ma le manuia mai le Atua lo tatou Tamā, atoa ma le Alii o Iesu Keriso.

³Ia faafetaia le Atua, o le Tamā o lo tatou Alii o Iesu Keriso, o le ua faamanuia mai ia i tatou i mea uma lava e manuia ai i la le Agaga, i mea o i le lagi, ona o Keriso;

⁴faapei ona ia filifili mai ia i tatou ona o ia, a o lei faavaeina le lalolagi, ina ia paia i tatou ma ia le mata‘uleagaina i ona luma, i le alofa;

⁵ua na tofia i tatou anamua, ina ia avea ma tamafai māna, ona o Iesu Keriso, e tusa ma le pule tunoa a lona finagalo;

⁶ina ia viia ai lona lava alofa tunoa ua silisili, o lea ua agalelei fua mai ai o ia ia te i tatou, ona o le ua alofagia;

⁷o ia foi ua tatou maua ai le togiola i lona toto, o le faamagaloina o agasala, e tusa ma le oloa faulai o lona alofa tunoa,

⁸ua ia faafaupue tele mai ai ia i tatou, i le poto uma atoa ma le faautauta;

⁹ina ua faailoa mai ia te i tatou le mea lilo sa i lona finagalo, e tusa ma lana lava pule tunoa, na ia tuu ai i lona lava finagalo;

¹⁰ina ia na faaopoopoina ia Keriso i le sauniga i le faaatoaga o tausaga, o i latou uma lava o i le lagi, atoa ma i latou o i le lalolagi;

¹¹o ia lava ua matou maua ai le tofi, o i matou na tofia anamua, e tusa ma le finagalo o le ua matuā galue i mea uma lava, e tusa ma le pule a lona finagalo;

¹²ina ia avea i matou ma ala e viia ai lona mamalu, o i matou o e na muai faamoemoe ia Keriso;

¹³e i ai foi outou ia te ia, ina ua outou faalogologo i le upu o le mea moni, o le tala lelei lea o lo outou olataga, ua outou faatuatua ia te ia, ona faamaufaailogaina ai lea o outou e le Agaga Paia, o le na folafolaina mai;

¹⁴o le faamaoni o ia o lo tatou tofi, seia iu ina faaolaina e ua faatauina, ina ia viia ai lona mamalu.

¹⁵Ua ou faalogologo i lo outou faatuatua i le Alii o Iesu, ma lo outou alofa i le au paia uma lava,

¹⁶o le mea lea ou te le mapu ai i le faafetai ona o outou, o ta‘uta‘ua outou i a‘u tatalo;

¹⁷ina ia foai atu ia te outou e le Atua o lo tatou Alii o Iesu Keriso, o le Tamā e ona le mamalu, le Agaga e ona le poto ma le faaaliga, ina ia outou iloa lelei o ia;

¹⁸ia faapupulaina mata o outou loto, ina ia outou iloa le uiga o le faamoemoe ua i lona valaau mai, ma le uiga o le faulaigamea lelei o i lana tofiga ua silisili mo le au paia;

¹⁹ma le uiga o le silisili ese lava o lona mana ua ia i tatou o e faatuatua, e tusa ma le galuega a lona mana tele lava,

²⁰na ia matuā galue ai ia Keriso, ina ua toe faatuina mai o ia nai e ua oti, ma faanofo ia te ia i lona itu taumatau i mea o i le lagi,

²¹e silisili lava i alii sili uma lava, ma faipule, ma e ua malolosi, ma alii, ma igoa uma lava e ta‘ua, e le gata i le olaga nei, a e oo foi i lē atali;

²²ua ia tuu foi mea uma lava i lalo o ona vae, ma tuuina atu o ia e fai ma ulu o mea uma lava mo le ekalesia,

²³o lona tino lea, o le tumu o le na te faatumuina mea uma lava i mea uma.