Read Samoan Old Version Bible – O LE TUSI PAIA EFESO, 4 Bible Online

EFESO, 4 - Samoan Old Version Bible – O LE TUSI PAIA bible

EFESO, 4

¹O lenei, o a‘u o le ua noanoatia ona o le Alii, ou te aioi atu ia te outou ia outou savavali ia tusa ma le valaau ua valaauina ai outou,

²ma le loto maulalo lava ma le agamalu, ma le onosai, ia outou faapalepale le tasi i le tasi ma le alofa,

³ia taumafaia e outou ona taofi o le loto gatasi i la le Agaga i le noataga o le filemu.

⁴E tasi le tino, e tasi foi le Agaga, faapei ona valaauina o outou i le faamoemoe e tasi ua valaauina ai outou;

⁵e tasi le Alii, e tasi le faatuatuaga, e tasi le papatisoga;

⁶e tasi le Atua, o le Tamā foi lea o tagata uma lava, o lē pule i mea uma lava, o le ua i ai i mea uma lava, o loo i totonu foi ia te outou uma.

⁷A ua au mai ia te i tatou taitoatasi o le alofa tunoa, e faatatauina ma le mea foaifuaina mai e Keriso.

⁸O le mea lea ua fetalai mai ai o ia, Na afio ae o ia i luga, ma na ta‘ita‘i faatagataotaua i le tafeaga; ua na foaiina foi mea alofa i tagata.

⁹Ia, o le upu lea, Na ia afio ae, se a lona uiga, pe afai e le o lea, ua muai ona afio ifo o ia i mea maulalo i le lalolagi?

¹⁰O le na afio ifo, o ia lava lea na afio ae i luga o lagi uma lava, ina ia faatumuina e ia o mea uma lava.

¹¹Na ia tuuina mai foi nisi e fai ma aposetolo, o isi foi e fai ma perofeta, o isi foi e folafola le tala lelei, o isi foi e fai ma leoleo atoa ma a‘oa‘o;

¹²ina ia faaatoatoaina ai le au paia, latou te fai ai le galuega a auauna, ia atiina ae ai le tino o Keriso;

¹³seia tatou oo atu o i tatou uma lava ma le loto gatasi i le faatuatua ma le iloa lelei o le Alo o le Atua, ina ia fai ma tagata matua ia oo i le fua o le ua matua, e tatau ma le tumu o Keriso;

¹⁴ina ia le toe tama ninii i tatou o loo felafoaiina e pei o peau, ma feaveaiina i matagi uma lava o matāupu, i le pepelo o tagata, i togafiti leaga ua saunia e faasese ai.

¹⁵A ia amio faamaoni i le alofa, ia tutupu i tatou ia te ia i mea uma, o le ulu lava ia, o ia foi o Keriso;

¹⁶e mai ia te ia ona tupu o le tino uma lava, o loo o faatatauina ma faasooina i ua uma lava e fesoasoani i ai, e tusa ma le galuega i le fua o itu tino taitasi, ia iu ina atiina ae le tino e ia ia ia i le alofa.

¹⁷O lenei, ou te fai atu ia te outou, ma ta‘utino atu lenei mea i luma o le Alii, aua tou te toe savavali faapei o isi nuu faapaupau uma, o e savavali i le valea o latou loto,

¹⁸o loo faapouliuligia o latou mafaufau, o liliueseina i latou i le ola o i le Atua, ona o le valea ua ia i latou, ona o le maaa o latou loto;

¹⁹ua latou le lagona se mea, ua tuuina atu i latou ia i latou i le matāitu e fai mea leaga uma lava ma le tu‘inanau i ai.

²⁰A o outou, ua le a‘oa‘oina outou faapena i le matāupu a Keriso,

²¹ina ua outou faalogologo ia te ia, ma ua a‘oa‘oina i lana matāupu, e tusa ma le upu moni o loo ia Iesu;

²²ina ia outou to ese le tagata tuai o loo ua leaga, e tusa ma le amioga faaanamua, e tusa ma tu‘inanau e faasese ai;

²³a ia toe fuataiina manao o outou loto,

²⁴ma ia oofu outou i le tagata fou ua faia e foliga i le Atua, ile amiotonu ma le amio lelei e faamaoni.

²⁵O lenei, ia outou tuu ese le pepelo, ia tautalatala faamaoni taitasi ma lē la le tuaoi; auā o itu tino lava i tatou o le tasi i le tasi.

²⁶A outou ita, aua le agasala ai; aua ne‘i goto le la o ita pea outou.

²⁷Aua foi ne‘i tuuina atu e outou se mea e mautu ai le tiapolo.

²⁸O lē gaoi aua ne‘i toe gaoi, a e lelei ina faamalosi o ia i galuega a ona lima i mea aoga, ia maua e ia se mea e avatu i le ua mativa.

²⁹Aua ne‘i alu atu se upu leaga ai o outou gutu, na o le upu lelei e ati ae ai i mea e aoga, e tupu ai le lelei i e faalogologo i ai.

³⁰Aua foi tou te faatiga i le Agaga Paia o le Atua, ua faamaufaailogaina ai outou ia te ia seia oo i le aso e faaolaina ai.

³¹Ia te‘a ma outou upu faafiufiu uma lava, ma le lotoa, ma le ita, ma le leo tele, ma le upu leaga, atoa ma le loto leaga uma lava.

³²A ia outou feagaleleiai, ia femutimutivaleai lo outou alofa, ia fefaamagaloai outou, faapei ona faamagaloina outou e le Atua ia Keriso.