Read Samoan Old Version Bible – O LE TUSI PAIA EFESO, 5 Bible Online

EFESO, 5 - Samoan Old Version Bible – O LE TUSI PAIA bible

EFESO, 5

¹O lenei, ia faaa‘oa‘o outou i le Atua, faapei o le fanau pele;

²ma ia savavali i le alofa, faapei o Keriso foi na ia alofa mai ia i tatou, ua na foai mai foi e ia ia te ia e sui a‘i i tatou, o le taulaga ma le togiola i le Atua o le mea manogi lea;

³a o le faitaaga, ma mea leaga uma, ma le manumanu, aua ne‘i ta‘ua lava ia te outou, e pei ona tatau i e ua paia.

⁴O le anovale foi, ma upu faatauvaa, ma le faaulaula, o mea ia e le tatau; a o le faafetai e lelei lava lea.

⁵Auā ua outou iloa lenei mea, ai sē faitaaga, po o sē fai mea leaga, po o sē manumanu, (o le ifo i tupua lava lea,) e le maua e i latou se tofi i le malo o Keriso, o le Atua lea.

⁶Aua ne‘i faaseseina outou e se tasi i upu faatauvaa; auā o mea ia e oo mai ai le toasa o le Atua i e faalogogata.

⁷O lenei, aua ne‘i faatasi outou ma i latou;

⁸auā sa outou pouliuli anamua, a o lenei ua outou malamalama i le Alii; ina savavali ia pei o e ua malamalama;

⁹(auā o le fua o le Agaga, o le agalelei uma lava lea, ma le amiotonu, ma le faamaoni;)

¹⁰ia suesue outou pe se a se mea e fiafia i ai le Alii.

¹¹Aua foi tou te amio faatasi ma galuega le aoga a le pouliuli, a e lelei ona outou aoai atu.

¹²Auā o mea ua faia faalilolilo e i latou, ua matagā lava ona tautalatala i ai.

¹³A o mea uma lava ua aoaiina, ua faaalia mai ia i le malamalama; auā o mea uma e faaalia, o le malamalama lea.

¹⁴O le mea lea ua fai mai ai, Ala ia oe e moe na ma e tulai mai i e ua oti, ona faamalamalama mai lea o Keriso ia te oe.

¹⁵O lenei, ia faaeteete outou ina ia outou savavali ma le faautauta, aua ne‘i faapei o e valelea, a ia faapei o e popoto;

¹⁶ia faaaogaina e outou aso o lenei olaga, auā o ona po nei ua leaga.

¹⁷O lenei, aua ne‘i faavalea outou, a ia outou iloa le finagalo o le Alii.

¹⁸Aua foi ne‘i onā outou i le uaina, o le mea e ulavale ai; a ia faatumuina outou i le Agaga.

¹⁹Ia outou fetautalatalai i salāmo, ma pese, ma siva faaleagaga, ia faaneenee atu ma pepese atu i le Alii i o outou loto.

²⁰Ia faafetai pea lava ona o mea uma i le Atua le Tamā, i le suafa o lo tatou Alii o Iesu Keriso.

²¹Ia usiusitai le tasi i le tasi ma le mata‘u i le Atua.

²²O outou fafine, ia outou usiusitai i a outou lava tane, faapei ona usiusitai i le Alii.

²³Auā o le tane o le ulu ia o le avā, pei o Keriso foi o le ulu ia o le ekalesia, o ia foi o le faaola o le tino.

²⁴O lenei, faapei ona usiusitai o le ekalesia ia Keriso, ia faapea foi fafine i a latou lava tane i mea uma lava.

²⁵O outou tane, ia outou alolofa atu i a outou lava avā, faapei o Keriso foi ona alofa mai i le ekalesia, ma foaiina mai e ia ia te ia e fai mona sui;

²⁶ina ia faapaiaina ai, ina ua faamamaina i le faataeleina i le vai atoa ma le upu;

²⁷ina ia na tuuina atu o ia ia te ia, o le ekalesia matagofie lava, e leai sona ila, po o se maanuminumi po o se tasi mea faapena, a ia paia ma ia le ponā.

²⁸O loo faapea ona tatau ona alolofa o tane i a latou lava avā, faapei o latou lava tino; o lē alofa i lana lava avā, o loo alofa o ia ia te ia lava;

²⁹auā e leai lava se tasi e ita i lona lava tino; a e peitai na te fafaga ma tausi atu i ai, faapei o le Alii foi ona tausi i le ekalesia;

³⁰auā o itu lava i tatou o lona tino, ma lona aano, ma ona ivi.

³¹O le mea lea e tuua ai e le tane o lona tamā ma lona tinā, a e faatasi ma lana avā, ona avea ai lea o i laua o le tino e tasi.

³²O le mea matuā lilo lenei; a ou te talaina atu nei ia Keriso atoa ma le ekalesia.

³³A o outou, ia taitasi outou ma alofa i lana lava avā faapei o ia lava ia te ia; o le fafine foi ia ava o ia i lana tane.