Read Samoan Old Version Bible – O LE TUSI PAIA EFESO, 6 Bible Online

EFESO, 6 - Samoan Old Version Bible – O LE TUSI PAIA bible

EFESO, 6

¹O outou le fanau, ia outou faalogo i o outou mātua i le Alii, auā o le mea tonu lava lea.

²Ia e ava i lou tamā ma lou tinā; o le uluai tulafono lea ua i ai le mea ua folafolaina;

³ina ia manuia ai oe, ma ia e nofo tulu‘i ai i luga o le laueleele.

⁴O outou tamā foi, aua ne‘i tou faaonoono atu i a outou fanau, a ia tausi atu i ai i aoaiga ma apoapoaiga a le Alii.

⁵O outou pologa, ia outou faalogo i o outou alii i la le tino, ma le mata‘u ma le gatete, i le faamaoni o outou loto, e peiseai ua faalogo ia Keriso.

⁶Aua ne‘i faatagā auauna, pei o e faafiafia i tagata, a ia faapei o auauna a Keriso, o e fai le finagalo o le Atua ma le loto,

⁷ma le fiafia, o loo auauna atu ai i le Alii, a e le o tagata;

⁸o loo outou iloa o le na te faia se amio lelei, e maua lava e ia mai le Alii e tusa ma lea lava amio, pe se nofo pologa o ia, po o se sa‘oloto.

⁹O outou alii foi, ia outou faia ia lava mea ia i latou, ina tuu ia le faamatau, ina ua outou iloa o lo outou lava Alii o loo i le lagi o ia, e le faailogaina foi se tasi e ia.

¹⁰O‘u uso e, o le toe upu lenei, ia outou loto tetele i le Alii, ma le malosi o lona mana.

¹¹Ia oofu outou i ofutau atoatoa mai le Atua, ina ia outou mafaia ona tetee atu i togafiti a le tiapolo.

¹²Auā tatou te le tau ma tagata, a o alii sili, ma faipule, ma alii o le pouliuli o lenei lalolagi, atoa ma agaga leaga i mea o i le lagi.

¹³O le mea lea ia outou tago ai i ofutau atoatoa mai le Atua, ina ia outou mafaia ona tetee atu pe a oo i le aso vale, pe a uma ona outou faia o mea uma, tou te tutumau ai lava.

¹⁴O lenei, ina tutumau ia outou o fusia o outou sulugātiti i le faamaoni, ia oofu foi outou i le ufifatafata o le amiotonu;

¹⁵ma ia faaseevaeina o outou vae i le sauniga o le tala lelei o le filemu;

¹⁶ia faaopoopo i na mea uma ona tago atu i le talipupuni o le faatuatua, tou te mafai ai ona tinei o u fanafana mu uma lava a loo leaga;

¹⁷ma ia outou ave le puloutau o le olataga, ma le pelu a le Agaga, o le afioga lea a le Atua.

¹⁸Ia outou tatalo i le Agaga i aso uma lava i talotaloga ma faatoga uma; ia outou mataala pea i lenei lava mea, ma matuā tausisi i le faatoga mo tagata paia uma lava;

¹⁹mo a‘u foi, ina ia tuuina mai le upu ia te au, ina ia ou faamalosi ona tautala atu ma faailoa atu le upu o le tala lelei sa lilo,

²⁰o le upu lava lea ua noanoatia ai a‘u le sāvali, ina ia ou faamalosi ai ona tautala, pei ona tatau ona ou tautala atu ai.

²¹O Tuiko, o le uso pele ia, ma le auauna faamaoni i le Alii, e faailoa atu e ia ia te outou o mea uma, ina ia outou iloa mea uma o ia te au, o mea ou te faia;

²²ua ou auina atu o ia ia te outou ona o lea lava mea, ina ia outou iloa a matou mea, ma ia faamatalalotoina ai o outou loto.

²³Ia i le au uso le manuia, ma le alofa, atoa ma le faatuatua mai le Atua le Tamā; ma le Alii o Iesu Keriso.

²⁴Ia i ai le alofa tunoa ia i latou uma o e alolofa tumau i lo tatou Alii o Iesu Keriso. Amene.