Read Samoan Old Version Bible – O LE TUSI PAIA FILIPI, 1 Bible Online

FILIPI, 1 - Samoan Old Version Bible – O LE TUSI PAIA bible

FILIPI, 1

¹O i maua o Paulo ma Timoteo, o auauna a Iesu Keriso, o la ma tusi lenei i le au paia uma lava o ia Keriso Iesu, o e o i Filipi, atoa ma epikopo ma tiakono;

²ia ia te outou le alofa tunoa, ma le manuia mai le Atua lo tatou Tamā, atoa ma le Alii o Iesu Keriso.

³Ou te faafetai atu i lo‘u Atua i o‘u manatu uma ia te outou,

⁴e le aunoa la‘u faatoga ma le fiafia, i a‘u tatalo uma mo outou uma lava,

⁵ona o lo outou mafuta faatasi i la le tala lelei, talu mai le uluai aso, ua oo mai i le aso nei;

⁶ua ou mautinoa lenei lava mea, o ia na amataina le galuega lelei i totonu ia te outou, e faaatoatoaina ai lava e ia e oo atu lava i le aso o Iesu Keriso;

⁷faapei ona tatau ona ou manatu i lenei mea ia te outou uma; auā ua tuuina ai outou i lo‘u loto i lo‘u nei noanoataga, ma la‘u faatonu atu, atoa ma lo‘u faamaoni atu i le tala lelei, o loo tofusia faatasi i tatou uma lava ma a‘u i le alofa tunoa ua ia te au.

⁸Auā ua silafia mai e le Atua ia te au, ua tele lo‘u naunau ia te outou uma lava i le alofa mutimuti vale o Iesu Keriso.

⁹O la‘u tatalo foi lenei, ia faatuputeleina pea lava lo outou alofa, ma le iloa lelei, atoa ma le faautauta uma;

¹⁰ina ia masino ia te outou mea uiga eseese, ina ia avea outou ma ē faamaoni, ma le le ta‘uleagaina pe a oo i le aso o Keriso;

¹¹ia tutumu outou i fua o le amiotonu mai ia Iesu Keriso, ina ia viia ai ma faaneeneeina ai le Atua.

¹²Le au uso e, ou te manao ia iloa e outou, o mea na oo ia te au, ua iu ina tupu atili ai le tala lelei.

¹³O lea ua faaalia ai lo‘u noanoataga ona o Keriso, i le fale uma o le ‘au e leoleo atoa ma isi mea uma.

¹⁴O le toatele foi o le au uso o i le Alii o loo matuā faatuatua ona o lo‘u noanoataga; ua atili ai ona latou faamalosi e tautala i le upu ma le le mata‘u.

¹⁵O isi foi ua tala‘i ia Keriso ma le mataua lava, ma le finau vale, a o isi ua tala‘i i le loto lelei.

¹⁶O e tala‘i ia Keriso ma le finau vale, e le faia ma le faamaoni, o loo o manatunatu i latou e faaopoopo ai le puapuaga i lo‘u noanoataga;

¹⁷a o e tala‘i ma le alofa, ua iloa e i latou ua faatuina a‘u ina ia ou faatonu atu le tala lelei.

¹⁸O lenei, pe faapefea? e ui lava i togafiti uma, pe faatagā fai, pe fai ma le faamaoni, ua tala‘iina atu ai Keriso, o le mea lea ua ou olioli ai, e moni ou te olioli ai lava.

¹⁹Auā ua ou iloa e iu lea mea i lo‘u manuia, ona o la outou faatoga, ma le fesoasoani mai o le Agaga o Iesu Keriso;

²⁰e tusa ma lo‘u faanaunau atu, ma lo‘u faamoemoe, ina ia ou le mā i se mea e tasi, a ia ou matuā faamalosi faapei ona ou faia e le aunoa, e faapea foi i nei ona po, ina ia viia ai Keriso i lo‘u tino, i le ola po o le oti.

²¹Auā o lo‘u ola ua ia Keriso lea; a o lo‘u oti, o lo‘u manuia lea.

²²Afai ou te ola i le tino, o le fua lea o la‘u galuega; a ou te le iloa po o le fea mea ou te filifilia.

²³Auā ua ou faaletonu i manatu e lua; o loo ia te au le naunau ia ou alu, ia faatasia a‘u ma Keriso; o le mea lea e sili ona lelei.

²⁴Peitai ia a‘u tumau i le tino, o le mea lea e sili ona aoga ia te outou.

²⁵Ua ou mautinoa lenei mea, ou te tumau, tatou te tutumau faatasi foi uma, ina ia alualu outou ma ia fiafia i le faatuatua;

²⁶ina ia faatuputeleina ai lo outou olioli ia Keriso Iesu ona o a‘u, i lo‘u toe alu atu ia te outou.

²⁷Tau ina ia tusa la outou amio ma le tala lelei ia Keriso, pe afai ou te alu atu ma feiloai ma outou, pe ou te nofo ese, ia ou iloa pea sina tala ia te outou, ua outou tumau i le loto gatasi, ma le manatu e tasi, o loo finau faatasi mo le faatuatua ua i le tala lelei;

²⁸o loo le faamatatauina outou i se mea e tasi e i latou o e tetee mai; auā o le faailoga lea ia te i latou o le malaia, a o le faailoga o le ola ia te outou, e mai le Atua foi lea.

²⁹Auā ua foaifuaina ia te outou ona o Keriso, e le na ona ia faatuatua ia te ia, a ia faatigaina foi outou ona o ia;

³⁰ua ia te outou foi lea lava taua, pei o lea na outou vaai mai ai ia te au, o loo outou faalogologo nei foi o ia te au.