Read Samoan Old Version Bible – O LE TUSI PAIA FILIPI, 2 Bible Online

FILIPI, 2 - Samoan Old Version Bible – O LE TUSI PAIA bible

FILIPI, 2

¹O lenei, afai a e ai se faamafanafana ia Keriso, afai a e ai se faamatalaloto i le alofa, afai a e ai se mafuta faatasi ma le Agaga, afai a e ai se alofa mutimuti vale ma se loto alofa,

²ina faaatoatoa mai ia e outou lo‘u olioli, ina ia gatasitasi o outou manatu, ia ia te outou le alofa faatasi, ma le loto gatasitasi, ma le manatunatu i le mea e tasi.

³Aua ne‘i faia se mea e tasi ma le finau vale, ma le mitamita fua; a ia taitasi outou ma manatu ma le loto maulalo, ua sili nisi uma ia te ia.

⁴Aua ne‘i taitasi ma vaavaai i ana lava mea, a ia taitasi ma vaavaai i mea a isi.

⁵Ia ia te outou foi lea lava manatu sa ia Keriso Iesu,

⁶o ia sa uiga faatasi ma le Atua, e lei manatu ia o se mea faoa ina ia tusa lava o ia ma le Atua;

⁷a ua faamaulalo e ia ia te ia, ua uiga o ia faatasi ma le pologa, ina ua faia o ia faapei o se tagata;

⁸na iloa foi o ia ua tino mai i le tagata, ua faamaulalo e ia ia te ia, ua na anaana ua oo ina maliu, o le maliu lea i le satauro.

⁹O le mea lava lea ua matuā faaeaina ai o ia e le Atua, ma foaiina atu ai ia te ia o le suafa e silisili i suafa uma lava;

¹⁰ina ia tootuli o tulivae uma lava i le suafa o Iesu, o e o i le lagi, ma e o i le lalolagi, ma e o i lalo o le lalolagi;

¹¹ma ia ta‘uta‘u atu e laulaufaiva uma lava o Iesu Keriso o le Alii lava ia, ia iu ina viia ai le Atua le Tamā.

¹²O lenei, a‘u pele e, faapei ona outou anaana mai e le aunoa, e le gata ina o tatou nonofo ma outou, a o lenei ua atili ai ina ua ou le i ai ia te outou, ia outou galulue aiai ma le mata‘u atoa ma le gatete, ina ia faaolaina outou.

¹³Auā o le Atua, o ia lē galue i totonu ia te outou i lona finagalo alofa, ina ia outou loto ma galulue i ai.

¹⁴Ia outou faia mea uma lava ma le le muimui, ma le le fefinauai;

¹⁵ina ia avea outou ma e ua le mata‘uleagaina, ma e ua sao le amio, o le fanau a le Atua, e le ponā i luma o le tupulaga amio faapiopio ma le finau vale; ua pupula ia te i latou la outou amio, faapei o mea e faamalamalama a‘i le lalolagi,

¹⁶o loo taofia e outou le upu o le ola, e fai ma mea ou te olioli ai i le aso o Keriso, ina ua ou le momo‘e faaleaoga, pe galue faaleaoga.

¹⁷Afai foi e faamaligiina lo‘u toto i luga o le taulaga ma le galuega i lo outou faatuatua, ou te olioli ai, tatou te olioli faatasi foi ma outou uma lava.

¹⁸O le mea lava lea ia outou olioli ai, tatou te olioli foi faatasi ma a‘u.

¹⁹A e ou te faamoemoe i le Alii o Iesu ou te vave auina atu Timoteo ia te outou, ina ia fiafia au nei foi, pe a a‘u iloa se tala ia te outou;

²⁰auā e le o ia te au se tasi ma te loto faatasi, na te tausia faamaoni mea e manuia ai outou.

²¹Auā e saili e i latou uma a latou lava mea, e le o mea a Keriso Iesu.

²²A ua outou iloa lona faamaoni, na ia auauna faatasi ma a‘u i le tala lelei, e pei o se atalii i lona tamā.

²³O ia foi, ou te faamoemoe, ou te auina atu loa, pe a ou iloa pe faapefea a‘u.

²⁴A e peitai ou te faatuatua lava i le Alii, ou te vave alu atu foi a‘u.

²⁵A ua ou manatu, e tatau ina auina atu ia te outou o Epaferoti, o lo‘u uso lea ma le na ma galulue faatasi, ma le na ma matātau faatasi, a o lo outou faifeau, ma lē auauna mai i lo‘u mativa.

²⁶Auā sa naunau atu ia ia te outou uma lava, na atuatuvale foi o ia, auā na outou faalogologo ua ma‘i o ia.

²⁷Auā foi sa ma‘i lava o ia, na fai a oti; a ua alofa le Atua ia te ia, a e le gata ia te ia, a o a‘u foi, ina ne‘i faaopoopoina mai ia te au o lea faanoanoa ma lea faanoanoa.

²⁸O lea na atili ai ona ou faataalise ona auina atu o ia, ina ia olioli outou pe a outou toe feiloai ma ia, ia faafeoloolo ai foi lo‘u faanoanoa.

²⁹O lea ia outou talia ai o ia i le Alii ma le olioli uma lava, ma ia faapelepeleina e outou e ua faapea.

³⁰Auā na fai a oti o ia ona o le galuega a Keriso, e lei faapelepeleina foi e ia lona ola, a seia faaatoatoaina e ia mea sa totoe i lo outou auauna mai ia te au.