Read Samoan Old Version Bible – O LE TUSI PAIA FILIPI, 3 Bible Online

FILIPI, 3 - Samoan Old Version Bible – O LE TUSI PAIA bible

FILIPI, 3

¹O‘u uso e, o mea nei ua totoe; ia outou olioli i le Alii. E le se mea ua ou musu ai ona tusi atu o ia lava mea ia te outou, a o le mea tou te saogalemu ai.

²Ia outou i ulī, ia outou i e fai galuega leaga, ia outou i e ua katatomeina;

³auā o le au peritomeina i tatou, o e auauna i le Atua ma le loto, ma mitamita ia Keriso Iesu, a e le faatuatua i la le tino.

⁴A ua ia te au foi le faatuatuaga i la le tino; auā afai e manatu se tasi o ia te ia le faatuatuaga i la le tino, e tele mea faapea ia te au;

⁵na peritomeina i le po valu, o le aiga o Isaraelu, o le itu aiga o Peniamina, o le Eperu o sa Eperū, o la le tulafono o le faresaio a‘u;

⁶o lo‘u maelega na ou faasaua ai i le ekalesia; o la le amiotonu foi i le tulafono, e lei mata‘uleagaina a‘u.

⁷A e peitai o mea uma sa aoga ia te au, ua ou manatu ua le aoga ia mea ona o Keriso.

⁸O lenei foi e moni lava, o lo‘u manatu ua le aoga mea uma lava ona o le silisili ese o le poto i la Keriso Iesu lo‘u Alii; ona o ia ua ou faaleaogaina mea uma, ma ou manatu o otaota lava ia mea,

⁹ina ia ou maua Keriso, ia maua foi a‘u ua ia te ia, e le ia te au sa‘u amiotonu nai le tulafono, a e peitai na o lea o loo i le faatuatua ia Keriso, o le amiotonu lea mai le Atua i le faatuatua;

¹⁰ina ia ou iloa o ia, ma le mana o lona toe tu mai, ma ia faatasi a‘u i ona tiga, ona ua faatusaina a‘u ia te au i lona maliu,

¹¹pe mafai lava ia te au ona oo atu i le toe tu mai o e ua oti.

¹²E le peiseai ua ou maua nei, po ua ou atoatoa ona lelei nei; a ou te tausisi atu pea pe mafai ona ou maua o le mea na maua ai a‘u e Keriso Iesu.

¹³Le au uso e, ou te le manatu ua ou maua, a o le mea e tasi ou te faia, ou te faagalogalo i mea ua tuanai, ou te momo‘e punou a‘i foi i mea o lumanai,

¹⁴ou te tausisi atu i le faailoga, ia maua ai le taui na valaauina ai a‘u mai lugā e le Atua ia Keriso Iesu.

¹⁵O lenei, o i tatou uma o e ua atoatoa ona lelei, ia tatou manatunatu i lenei mea; afai foi e ese so outou manatu i se isi mea, e faaalia mai e le Atua lea lava mea ia te outou.

¹⁶A o le mea ua tatou oo i ai, ia savavali faatatau lea lava mataupu, ia manatunatu i lea lava mea.

¹⁷Le au uso e, ia outou faaa‘oa‘o faatasi mai ia te au, ia outou vaavaai foi i e o savavali faapea, faapei ona fai o i matou ma faaa‘oa‘o ia te outou.

¹⁸Auā o loo savavali isi e toatele, na ou fai atu soo ai ia te outou, ou te toe fai atu nei foi ma le tagi, ua latou fai mo latou fili le satauro o Keriso;

¹⁹o le malaia, o lo latou iuga lea; o le manava, o lo latou atua lea; o le mea latou te vivii ai, o le mea e masiasi ai lea; e loto i latou i mea a le lalolagi.

²⁰Aua o lo tatou nuu moni ua i le lagi lea, o loo faatalitali mai ai i tatou i le Faaola, o le Alii o Iesu Keriso;

²¹na te liua o tatou nei tino ua leaga, ina ia faia ia faatatau i lona tino matagofie, e tusa ma le mana na te mafaia ai ona faatoilaloina o mea uma ia te ia lava.