Read Samoan Old Version Bible – O LE TUSI PAIA KOLOSE, 1 Bible Online

KOLOSE, 1 - Samoan Old Version Bible – O LE TUSI PAIA bible

KOLOSE, 1

¹O a‘u o Paulo, o le aposetolo a Iesu Keriso, i le finagalo o le Atua, o i maua ma Timoteo, o le uso lea,

²o la ma tusi lenei i le au paia i Kolose, o le au uso faamaoni foi o ia Keriso; ia ia te outou le alofa tunoa ma le manuia mai le Atua lo tatou Tamā, atoa ma le Alii o Iesu Keriso.

³Ma te faafetai atu i le Atua, o le Tamā o ia o lo tatou Alii o Iesu Keriso, o loo tatalo atu e le aunoa mo outou,

⁴talu ona ma faalogologo i lo outou faatuatua ia Keriso Iesu, ma lo outou alofa i le au paia uma lava;

⁵ona o le faamoemoe ua teu mo outou i le lagi; ua outou faalogologo i ai anamua i le upu o le mea moni ua i le tala lelei,

⁶o loo i ai ia te outou, e pei ona i le lalolagi uma lava; o loo fua mai ai foi le fua, faapei ona faia ia te outou foi talu le aso na outou faalogologo ai, ma iloa lelei ai ma le faamaoni le alofa tunoa o le Atua;

⁷faapei ona a‘oa‘oina foi outou e Epafara, o lo maua fesoasoani pele ia, o le auauna faamaoni o ia a Keriso ia te outou,

⁸o ia foi na faailoa mai ia te i maua o lo outou alofa mai i le Agaga.

⁹O le mea lea o i maua foi ma te lei mapu ai lava i le tatalo mo outou, talu le aso na ma faalogologo ai, ma te aioi atu foi ina ia atoatoa ona outou iloa lelei o lona finagalo, i le poto uma atoa ma le mafaufau faaleagaga;

¹⁰ia outou savavali e tusa ma le Alii, ina ia fiafia mai o ia ia te outou i mea uma, ma ia outou fua mai galuega lelei uma lava, ma ia tupu pea lo outou iloa lelei o le Atua;

¹¹ia faamalosia outou i le malosi uma lava, e tusa ma lona malosi ua silisili, e iu i le onosai uma lava ma le faatoatoa atoa ma le fiafia;

¹²o loo faafetai atu i le Tamā ua na saunia i tatou ia tatau ona tofusia i tatou i le tofi o le au paia o i le malamalama;

¹³o ia ua na laveai mai ia te i tatou nai le pule a le pouliuli, a ua na aumaia i latou i le malo o lona lava Alo pele;

¹⁴o ia ua tatou maua ai le togiola i lona toto, o le faamagaloina lea o agasala;

¹⁵o ia foi ua tusa ma le Atua e le vaaia, o le ulumatua o mea uma lava ua faia;

¹⁶auā na faia e ia o mea uma lava, o mea i le lagi ma mea i le lalolagi, o mea o vaaia ma mea e le o vaaia, o nofoālii, ma alii, ma alii sili, ma faipule; na faia e ia mea uma lava, na faia foi mo ia;

¹⁷o ia foi o le uluai o mea uma lava, o loo faatumauina foi mea uma lava ia te ia;

¹⁸o le ulu foi o ia o le tino, o le ekalesia lea; o le amataga foi o ia, o le ulumatua o e ua oti, ina ia fai o ia ma faasilisili i mea uma lava.

¹⁹Auā ua finagalo le Tamā ia mau i totonu ia te ia le tumu atoatoa;

²⁰ina ia faaleleia e ia o mea uma lava ma ia, ina ia lelei ia te ia lava i le toto o lona satauro, o mea i le lalolagi atoa ma mea o i le lagi.

²¹O outou foi sa tagata ese anamua, sa fai o ia mo outou fili i o outou loto i le amio leaga; a o lenei, ua lelei outou ma ia

²²i lona tino tagata, ina ua maliu, ina ia tuuina atu outou e ia, o le au paia, o e le mata‘uleagaina, ua leai foi se mea e faasalaina ai i ona lava luma;

²³pe afai lava tou te tutumau i le faatuatua, o faavaeina, ma mausali, ma le le faateaeseina outou i le faamoemoe o i le tala lelei na outou faalogologo i ai, sa tala‘iina atu foi i tagata uma lava i le lalolagi; o a‘u o Paulo ua fai a‘u ma auauna i ai.

²⁴Ou te olioli nei i mea ou te tiga ai ona o outou, ou te faaatoa foi i lo‘u tino o mea ua totoe i puapuaga o Keriso ona o lona tino, o le ekalesia lea;

²⁵ua fai a‘u ma auauna i ai, e tusa ma le sauniga a le Atua, ua tuuina mai ai ia te au mo outou, ina ia matuā folafolaina le afioga a le Atua;

²⁶o le upu lilo lea, sa natia talu mai i augātagata ma tupulaga ua mavae, a o ona po nei ua faaalia mai ai i ona tagata paia;

²⁷na finagalo foi le Atua ona faailoa atu i ai le uiga o le silisili o le lelei o lenei upu lilo o i nuu ese, o Keriso lea o loo ia te outou o le faamoemoe i le manuia;

²⁸o ia lava matou te tala‘iina atu, ma apoapoai atu i tagata uma, ma a‘oa‘o atu ai i tagata uma i le poto uma lava, ina ia tuuina atu e i matou o tagata uma ua atoatoa ona lelei ia Keriso Iesu;

²⁹o le mea lea ou te galue ai ma finafinau e tusa ma lana lava galuega, o loo galue lava i totonu ia te au ma le mana.