Read Samoan Old Version Bible – O LE TUSI PAIA KOLOSE, 2 Bible Online

KOLOSE, 2 - Samoan Old Version Bible – O LE TUSI PAIA bible

KOLOSE, 2

¹Aua ou te manao ina ia iloa e outou o lo‘u finau matuā tele ona o outou ma i latou o i Laotikaia atoa ma i latou e ua le iloa mai a‘u i le tino;

²ina ia faamafanafanaina o latou loto, o faasooina i le alofa, ina ia maua ai le oloa uma o le mautinoa i le loto matala, ina ia iloa lelei le upu a le Atua sa lilo, o le Tamā lea, atoa ma Keriso;

³ua ia te ia le oloa uma o le poto atoa ma le malamalama, ua lilo ai.

⁴O le upu lea ou te fai atu na, ina ne‘i faaseseina outou e se tasi i upu faaoleole.

⁵Auā e ui lava ina ou le i ai ia te outou i le tino, a e peitai ou te i ai ia te outou i le agaga, o loo ou fiafia ma o‘u vaai atu i lo outou sauniuni lelei, ma le mausali o lo outou faatuatua ia Keriso.

⁶O lenei, faapei ona outou talia o le Alii Keriso Iesu, ia savavali ai outou o ia te ia;

⁷ia mauaa outou ma ia atiina ae ia te ia, ma ia faatumauina i le faatuatua, faapei ona a‘oa‘oina o outou, ia faatele i ai ma le faafetai.

⁸Ia outou, ne‘i faatagataotauaina outou e se tasi i le poto le aoga e faasese ai, e tusa ma le uputuu a tagata, e tusa ma mataupu muamua a le lalolagi, a e le tusa ma mataupu a Keriso;

⁹auā o loo mau i totonu ia te ia le tumu uma lava o le itu Atua ua i lona tino;

¹⁰o loo ua faaatoatoaina foi outou ia te ia; o le ulu ia o alii sili uma lava atoa ma faipule;

¹¹ua faaperitomeina foi outou ia te ia i le peritomega e lei faia e lima, i le toeseina o le tino o agasala o i le tino i le peritomega mai ia Keriso;

¹²na tanumia outou faatasi ma ia i le papatisoga, o lea foi ua outou toe tutū mai ia faatasi ma ia i le faatuatua i le mana o le Atua, o le na faatu mai ia te ia i e ua oti.

¹³O outou foi sa oti i amio leaga ma le le peritomeina o outou tino, na ia faaola mai faatasi ma ia, ina ua faamagaloina mai a outou agasala uma lava;

¹⁴ina ua sōloia le tusilima na sala ai tatou i tulafono sa tetee mai ia te i tatou, ua aveeseina ai foi nai le vaeloto, ma faamauina ai i fao i le satauro;

¹⁵ua uma ona tuueseina e ia o alii sili ma faipule, ona faaalia mai lea o i latou ia iloa uma, ua manumalo o ia ia te i latou i lea lava mea.

¹⁶O lenei, aua ne‘i faamasino atu se tasi ia te outou i mea e aai ai, po o mea e inu ai, po o mea ia o tausamiga, po o masina faatoa vaaia, po o sapati;

¹⁷o ata lava ia o mea atali, a o le tino, e a Keriso lava lea.

¹⁸Aua ne‘i faa‘ole‘ole se tasi ia te outou i le taui i lona fia faalalolalo, ma le ifo atu i agelu, o loo suesue i mea ua ia le vaaia, o loo faafefetefuaina lona lava mafaufau faaletino;

¹⁹ua le taofi mau foi i le ulu, ua tausia ai ma faamalosia ai le tino uma, i mea e soo ai atoa ma ua, o loo tupu ai, ina ua faatupuina mai e le Atua.

²⁰O lenei, afai ua outou oti faatasi ma Keriso i mataupu muamua a le lalolagi, se a le mea tou te usiusitai atu ai i tulafono, peiseai ua nonofo outou i le lalolagi?

²¹(Aua ne‘i pa‘i atu i ai, aua ne‘i tofo, aua ne‘i tago;

²²o mea uma ia e uma ai pe a tagofia;) e tusa ma poloaiga ma mea e a‘oa‘o atu e tagata;

²³o mea ia te ta‘ua ai le poto, ma le faafiaamioatua, ma le faamaulalo, ma le faasaunoa o le tino, a e le o le tausi i ai e ma‘ona ai le tino.