Read Samoan Old Version Bible – O LE TUSI PAIA KOLOSE, 3 Bible Online

KOLOSE, 3 - Samoan Old Version Bible – O LE TUSI PAIA bible

KOLOSE, 3

¹O lenei, afai ua toe faatuina outou faatasi ma Keriso, ia outou saili i mea o i lugā, o i ai Keriso, o loo tietie i le itu taumatau o le Atua.

²Ia outou loto lava i mea i lugā, a e le o mea i le lalolagi;

³auā ua oti outou, ua lilo foi lo outou ola faatasi ma Keriso i le Atua.

⁴Pe a faaali mai Keriso lo tatou ola, ona iloa ai lea o outou faatasi ma ia i le manuia.

⁵O lenei, ia outou fasiotia o outou itu tino o i le lalolagi, o le faitaaga, o le amio leaga, o le faamatāitu, o le tu‘inanau leaga, ma le matapeapea, (o le ifo i tupua lava lea);

⁶o mea ia e oo mai ai le toasa o le Atua i e le faalogo;

⁷o outou foi na outou savavali ai foi anamua, a o outou nonofo ai;

⁸a o ona po nei ia tuu ese ai e outou lava o nei mea uma, o le ita, o le lotoa, o le loto leaga, o le upu leaga, ma le upu matagā ai o outou gutu.

⁹Aua le fetaupelopeloai, ina ua toeseina e outou le tagata tuai atoa ma ana amio,

¹⁰a ua outou oofu i le tagata fou, o le ua faafouina i le poto, e faatatau ia foliga i le na faia o ia.

¹¹E le o i ai se Eleni po o se Iutaia, o sē peritomeina po o sē le peritomeina, o se tagata o nuu ese po o se Sekutia, o se ploga po o se sa‘oloto; a ua ia Keriso mea uma, o i ai foi o ia i mea uma lava.

¹²O lenei, ia oofu outou i le alofa mutimuti vale, ma le agalelei, ma le loto maulalo, ma le agamalu, ma le onosai, faapei o e ua filifilia e le Atua, o e ua paia ma ua alofaina;

¹³ia fefaapalepaleai, ma ia fefaamagaloai outou, pe afai ua agaleagaina se tasi e se tasi; faapei ona faamagalo mai Keriso ia te outou, ia faapea foi outou.

¹⁴A o le alofa, e lautua lea i nei mea uma, o le fusi lea e atoatoa ona lelei ai.

¹⁵Ia pule foi le filemu mai le Atua i o outou loto, o le mea lea ua valaauina ai outou e fai ma tino e tasi; ma ia outou saga faafetai.

¹⁶Ia nofo le afioga a Keriso i totonu ia te outou ia tele lava, i le poto uma lava, ia outou a‘oa‘o ma apoapoai le tasi i le tasi i salāmo, ma pese, ma siva faaleagaga, o loo pepese atu ai ma le faafetai i le Alii i o outou loto.

¹⁷O mea uma foi tou te faia i le tautalatala, po o le amio, ia faia uma lava ia mea i le suafa o le Alii o Iesu, ma le faafetai i le Atua le Tamā ona o ia.

¹⁸O outou fafine, ia outou usiusitai atu i a outou lava tane, pei ona tatau i le Alii.

¹⁹O outou tane, ia outou alolofa atu i a outou avā, aua foi ne‘i faaonoono ia te i latou.

²⁰O outou le fanau, ia outou faalogo i o outou mātua i mea uma; auā o le mea mālie lea i le Alii.

²¹O outou tamā, aua ne‘i faaita i a outou fanau, ina ne‘i faapalapala i latou.

²²O outou pologa, ia outou faalogo i mea uma i o outou matai i la le tino, aua ne‘i faatagā auauna, faapei o e faafiafia i tagata, a ia faia ma le loto faamaoni, o loo matatau i le Atua.

²³O mea uma lava tou te faia, ia faia ma le loto, peiseai ua faia i le Alii, a e le o tagata;

²⁴auā ua outou iloa, e maua e outou mai le Alii o le taui, o le tofi lea; auā ua auauna outou i le Alii o Keriso.

²⁵O lē amioletonu e maua e ia le taui o lana amioletonu; e le faailogaina foi se tasi.