Read Samoan Old Version Bible – O LE TUSI PAIA KOLOSE, 4 Bible Online

KOLOSE, 4 - Samoan Old Version Bible – O LE TUSI PAIA bible

KOLOSE, 4

¹O outou alii, ia outou avatu mea e tatau ma mea e tusa i a outou pologa, auā ua outou iloa o ia te outou foi le Alii i le lagi.

²Ia outou finafinau i le tatalo, ia mataala i lea mea ma le faafetai.

³Ina tatalo ia mo i matou foi, ina ia faaavanoa mai e le Atua se faitotoa o le upu mo i matou, e tautala atu ai i le upu ia Keriso sa lilo, ona o lea foi ua noanoatia ai a‘u,

⁴ina ia ou faailoa atu ai, faapei ona tatau ona ou tautala atu ai.

⁵Ia savavali ma le poto i e o i tua, ma faaaogaina e outou aso o lenei olaga.

⁶Ia le aunoa a outou upu ma le alofa, ia faamāi i le masima, ia iloa e outou ona fai faatatau se tali i tagata e taitoatasi uma.

⁷O mea uma lava o ia te au e faailoa atu ia te outou e Tuiko, o le uso pele ia ma le auauna faamaoni, ma le na ma auauna faatasi i le Alii;

⁸ua ou auina atu o ia ia te outou ona o lenei lava mea, ina ia iloa e ia o mea o i ai ia te outou, ma ia faamafanafana atu e ia i o outou loto;

⁹la te o ma Onesemo, o le uso faamaoni lea ma le pele, o lo outou foi ia, la te faailoa atu ia te outou o mea uma o faia iinei.

¹⁰O loo alofa atu ia te outou o Aritako, o le ua ma faatasi ma a‘u i le fale puipui, atoa ma Mareko, o le aiga ia o Panapa, (na poloaiina outou ia te ia, a alu atu o ia ia te outou, ia outou talia o ia;)

¹¹o loo alofa atu foi Iesu, o le ua igoa ia Iuso, o i le au peritomeina i latou; na o i latou lava na galulue faatasi ma a‘u i le malo o le Atua, na fai foi i latou ma faamatalaloto mai ia te au.

¹²O loo alofa atu ia te outou o Epafara, o lo outou lava o ia, o le auauna a Keriso, o loo finafinau e le aunoa i tatalo mo outou; ina ia outou tumau ua atoatoa ona lelei, ma ua mautinoa le finagalo uma lava o le Atua.

¹³Auā o la‘u mau ia te ia, ua tele lava lona maelega mo outou, atoa ma i latou o i Laotikaia, ma i latou o i Iarapoli.

¹⁴O loo alofa atu ia te outou o Luka le fomai pele, atoa ma Tema.

¹⁵Ua ou alofa atu i le au uso i Laotikaia, o Numefa foi, atoa ma le ekalesia o i lona fale.

¹⁶Pe a uma ona faitau e outou o lenei tusi, ia faitauina foi e le ekalesia i Laotikaia, ia outou faitau foi le tusi mai Laotikaia.

¹⁷Fai atu foi ia Arekipa, Ia oe i le faiva na tuuina atu ia te oe i le Alii, ina ia e faaiuina.

¹⁸O le alofa atu lenei o a‘u o Paulo i lo‘u lava lima. Ia outou mānatua mai lo‘u noanoaga. Ia ia te outou le alofa tunoa. Amene.