Read Samoan Old Version Bible – O LE TUSI PAIA I. TESALONIA, 1 Bible Online

I. TESALONIA, 1 - Samoan Old Version Bible – O LE TUSI PAIA bible

I. TESALONIA, 1

¹O i matou, o Paulo, ma Siluano, ma Timoteo o la matou tusi lenei i le ekalesia o tagata o Tesalonia, o i le Atua le Tamā, ma le Alii o Iesu Keriso. Ia ia te outou le alofa tunoa, ma le manuia mai le Atua lo tatou Tamā atoa ma le Alii o Iesu Keriso.

²Matou te faafetai pea lava i le Atua, ona o outou uma lava, o loo ta‘uta‘ua outou i a matou tatalo,

³e le aunoa ona matou mānatua la outou galuega i le faatuatua, ma le faamalosi i le alofa, ma le tumau pea i le faamoemoe i lo tatou Alii o Iesu Keriso, i luma o le Atua o lo tatou Tamā lea;

⁴ina ua matou iloa le filifilia o outou, le au uso e, o e ua alofagia e le Atua.

⁵Auā e lei oo atu la matou tala lelei ia te outou na o le upu, a o le mana, ma le Agaga Paia, atoa ma le mautinoa lava ina ua outou iloa la matou amio ona o outou, a o matou i ai ma outou;

⁶sa outou faaa‘oa‘o mai foi ia te i matou, atoa ma le Alii, ina ua outou talia le upu i le puapuaga tele, ma le olioli mai le Agaga Paia;

⁷o lea ua avea ai outou ma faaa‘oa‘o i e ua faatuatua uma lava o i Maketonia atoa ma Akaia;

⁸auā ua logo atu nai ia te outou le afioga a le Alii, e le gata i Maketonia ma Akaia, a ua salalau atu foi i mea uma lava le tala i lo outou faatuatua i le Atua o lea e le aoga ai sa matou upu e fai atu ai.

⁹Auā o i latou lava ua iloa ai le tala ia te i matou i le uiga o lo matou oo atu ia te outou na, ma lo outou liliu mai i le Atua nai tupua, ina ia outou auauna i le Atua soifua ma le ua moni,

¹⁰ma ia faatali atu i lona Alo mai le lagi, o le na toe faatuina mai e ia nai e ua oti, o Iesu lea, o lē laveai mai ia i tatou ai le toasa atali.