Read Samoan Old Version Bible – O LE TUSI PAIA I. TESALONIA, 2 Bible Online

I. TESALONIA, 2 - Samoan Old Version Bible – O LE TUSI PAIA bible

I. TESALONIA, 2

¹Auā o outou lava, le au uso e, ua outou iloa o lo matou oo atu ia te outou, e lei faaleaogaina lea;

²a e ui lava ina muamua ona tigaina o i matou, ma faaleagaina i Filipi, pei ona outou iloa ua matou faamalosi ona o lo tatou Atua e tautala atu ia te outou i le tala lelei a le Atua ma le finafinau tele lava.

³Auā o lo matou apoapoai atu ia te outou e lei faia lea ma le sese, po o le amio leaga, po o le faa‘ole‘ole.

⁴A e peitai, faapei ona tatau i le finagalo o le Atua na te tuuina mai ia te i matou le tala lelei, e faapea foi ona matou tautala atu ai; e le ina ia fiafia mai tagata, a o le Atua, o lē tofotofo mai i o matou loto.

⁵Auā matou te lei fai lava se upu e faaviivii atu ai, faapei ona outou iloa, pe faia se ufiufi o le manumanu; ua silafia e le Atua;

⁶e ui lava ina mafai ia te i matou ona ia mafatia ai outou, auā o aposetolo i matou a Keriso, a e matou te le saili le viiga mai tagata, po o outou po o isi tagata.

⁷A ua matou agamalu ina ua matou i ai ia te outou na, faapei o se failele na te tausi lelei i ana lava tama;

⁸sa faapea lava lo matou maelega i le alofa ia te outou, na matou manao i le fia avatu ia te outou e le na o le tala lelei i le Atua, a o matou lava ola foi, auā na alofaina outou e i matou.

⁹Auā le au uso e, ua outou mānatua la matou galuega mamafa ma le tiga; auā sa matou galulue ai i le po atoa ma le ao, ina ne‘i mafatia so outou, na matou tala‘i atu ai ia te outou le tala lelei a le Atua.

¹⁰Ua iloa outou atoa ma le Atua, sa matou amio Atua, ma amiotonu, ma le le mata‘uleagaina, ina o matou i ai ia te outou o e faatuatua.

¹¹Pei ona outou iloa, sa matou i ai ia te outou taitasi, pei o le tamā i lana lava fanau, na matou apoapoai atu ia te outou, o faamafanafana atu foi, ma ta‘utino atu,

¹²ina ia outou savavali ia tatau i le Atua, o le na valaauina outou i lona malo ma lona manuia.

¹³O le mea lea matou te faafetai ai i le Atua, o i matou lava e le aunoa, auā na talia e outou le afioga a le Atua na outou faalogo mai ai ia i matou, ua le talia e outou o le upu a tagata, a e peitai o le upu a le Atua, (e moni lava lea,) ua matuā galue foi lea i totonu ia te outou o e faatuatua.

¹⁴Auā le au uso e, na outou faaa‘oa‘o i ekalesia a le Atua o i Iutaia, o loo ia Keriso Iesu; auā o outou foi na tigaina outou i ia lava mea i tagata o lo outou lava nuu, faapei ona tigaina o i latou foi ia Iutaia;

¹⁵o e na fasioti i le Alii, o Iesu lava, atoa ma a latou lava perofeta, na faasaua mai foi i latou ia i matou; e le fiafia i ai le Atua, ua fai foi tagata uma lava mo latou fili;

¹⁶ua vavao mai ia i matou, aua matou te tautala atu i nuu ese, ina ia faaolaina ai i latou; ua faaatoa ai e i latou e le aunoa a latou agasala; a ua oo ia te i latou le toasa e faaumatia ai.

¹⁷O i matou foi, le au uso e, o loo tete‘aeseina o i matou ma outou i ni nai aso itiiti, i le tino a e le o le loto, ua atili ai ona matou taumafaia ma le naunau tele ona ia tatou feiloai ma outou.

¹⁸O lea na matou fia o atu ai ia te outou, o a‘u lava o Paulo, ua atu tasi ma atu lua, a ua faalavelave mai Satani ia te i matou.

¹⁹Auā se a ea so matou faamoemoe, ma se fiafia, ma se pale e mitamita ai? E le o outou ea i luma o lo tatou Alii o Iesu Keriso, i lona afio mai?

²⁰Auā o outou lava o lo matou viiga ma lo matou olioli.