Read Samoan Old Version Bible – O LE TUSI PAIA I. TESALONIA, 3 Bible Online

I. TESALONIA, 3 - Samoan Old Version Bible – O LE TUSI PAIA bible

I. TESALONIA, 3

¹O lea ua lelei ai ia te i matou ona ia tuua ai i matou i Atenai, tau o i matou, ina ua matou le toe mafai ona onosai;

²a ua matou auina atu Timoteo lo matou uso, o le auauna foi o ia a le Atua, o lē galue faatasi ma i matou i le tala lelei ia Keriso, ina ia faatumauina outou e ia, ma ia faamafanafana atu ia te outou i lo outou faatuatua;

³ina ne‘i faagaeetia se tasi i nei puapuaga; auā ua outou iloa ua tofia lenei lava mea.

⁴Auā foi o ona po sa i ai i matou ia te outou, na matou muai fai atu ai ia te outou, o le a oo mai le puapuaga, ua faapea ona taunuu lava, ua outou iloa foi.

⁵O le mea lea na ou le toe mafai ai ona onosai, ona auina atu lea e a‘u, ina ia ou iloa lo outou faatuatua, ne‘i faaosoosoina outou e lē faaosooso, ona faaleaogaina ai lea o la matou galuega.

⁶A o lenei, ua sau Timoteo ia te i matou nai ia te outou, ua au mai foi le tala lelei ia te i matou i lo outou faatuatua, ma lo outou alofa, ma lo outou manatu lelei mai e le aunoa ia te i matou, o loo faanaunau foi outou ina ia tatou feiloai ma outou, pei o i matou ona fia feiloai ma outou;

⁷o le mea lea, le au uso e, na faamafanafanaina mai ai i matou ona o outou, i lo matou puapuaga uma lava, atoa ma lo matou tiga, ona o lo outou faatuatua.

⁸Auā o lenei, ua matou ola, pe afai tou te tumau i le Alii.

⁹Se a foi se faafetai matou te mafaia ona tuuina atu i le Atua ona o outou, auā o le olioli uma lava matou te olioli ai i luma o lo tatou Atua?

¹⁰o loo matou matuā ole atu ai i le po atoa ma le ao, ina ia tatou feiloai ma outou, e faaatoatoaina ai mea e lei atoa i lo outou faatuatua.

¹¹A ia ta‘ita‘iina la matou malaga ia te outou e le Atua lava, lo tatou Tamā, atoa ma lo tatou Alii o Iesu Keriso.

¹²Ia faatele foi e le Alii, ma ia faasilisili ona tele o lo outou alofa, o le tasi i le tasi, atoa ma tagata uma, faapei o i matou nei lava ia te outou;

¹³ina ia faatumauina o outou loto e le mata‘uleagaina i le amio lelei i luma o le Atua lo latou Tamā, pe a afio mai lo tatou Alii o Iesu Keriso, faatasi ma ona au paia uma.