Read Samoan Old Version Bible – O LE TUSI PAIA I. TESALONIA, 4 Bible Online

I. TESALONIA, 4 - Samoan Old Version Bible – O LE TUSI PAIA bible

I. TESALONIA, 4

¹O lenei, le au uso e, o le toe upu lenei, matou te aioi atu ma apoapoai atu ia te outou ona o le Alii o Iesu, faapei ona talai e outou mai ia te i matou le uiga o le ala e tatau ona outou savavali ai, ia fiafia mai ai le Atua ia te outou, ia faasilisili pea i ai outou.

²Auā ua outou iloa ia poloaiga na matou tuuina atu ai ia te outou mai le Alii o Iesu.

³O le finagalo foi lenei o le Atua, ia faapaiaina outou, ina ia faamamao outou ma le faitaaga;

⁴ia taitasi outou ma iloa ona fai o lana lava ipu ma le faapaiaina ma le ta‘uleleia,

⁵aua ma le tu‘inanau o le manao, faapei o nuu ese ua le iloa le Atua.

⁶Aua ne‘i sopo tapulaa se tasi, ma agaleaga i lona uso i lenei mea; auā o le Alii na te taui atu ma sui i nei mea uma, faapei ona matou muai fai atu ai, ma ta‘utino atu ia te outou.

⁷Auā e lei valaauina i tatou e le Atua ia amio leaga, a ia faapaiaina lava.

⁸O lenei, o lē faaleaoga mai, ua ia le faaleaoga i tagata, a o le Atua le ua foai mai lona Agaga Paia ia te i matou.

⁹A e le aoga ona ou tusi atu ia te outou i le mataupu o le alofa i le au uso; auā ua a‘oa‘oina outou lava e le Atua ia fealofani.

¹⁰Auā foi ua faapea lava ona outou faia i le au uso uma lava o i Maketonia atoa uma. A e matou te apoapoai atu ia te outou le au uso e, ia faasilisili pea i ai;

¹¹ma ia outou taumafai ina ia outou nofo fifilemu, ia faia a outou lava feau, ma ia galulue i o outou lava lima, pei ona matou fai atu ai ia te outou;

¹²ina ia outou savavali ma le matagofie i e o i tuā, ma ia le matitiva outou i se mea e tasi.

¹³Ou te loto ina ia outou iloa, le au uso e, i le mataupu i e o momoe, ina ne‘i outou faanoanoa, pei o isi e leai so latou faamoemoe.

¹⁴Auā afai tatou te talitonu, ua maliu Iesu ma toe tu mai, e faapea foi ona aumaia e le Atua faatasi ma ia e o momoe ona o Iesu.

¹⁵Matou te fai atu foi lenei mea ia te outou i le afioga a le Alii, o i tatou o e ola ma totoe pe a afio mai le Alii, tatou te le muamua i e o momoe.

¹⁶Auā e afio ifo mai le lagi le Alii lava, ma le alaga, ma le leo o le agelu sili, ma le pu a le Atua; e muamua foi ona toe tutū mai o e ua oti o ia Keriso;

¹⁷ona faafuasei lea ona aveina ae o i tatou o e ola ma totoe, faatasi ma i latou i ao, ina ia fetaiai ma le Alii i le va nimonimo; ona tatou faatasi pea lava lea ma le Alii.

¹⁸O lenei, ia outou fefaamafanafanai i nei upu.