Read Samoan Old Version Bible – O LE TUSI PAIA IOSUA, 11 Bible Online

IOSUA, 11 - Samoan Old Version Bible – O LE TUSI PAIA bible

IOSUA, 11

¹Ua lagona ia mea e Iapino le tupu o Hasora; ona alu ai lea o lana feau ia Iopapa le tupu o Matona, ma le tupu o Semarona, ma le tupu o Akasafa;

²o tupu foi i le itu i matu o le atu mauga, ma le eleele laugatasi i le itu i toga o Kinereta, ma le nuu maulalo, ma mea maualuluga o Toro i sisifo;

³o sa Kananā i sasae ma sisifo, ma sa Amorī, ma sa Hetī, ma sa Perisē, ma sa Iepusē i le atu mauga, ma sa Hivī i lalo o Heremone i le nuu o Mesepa.

⁴Ona o atu lea o i latou, ma a latou ‘au uma faatasi ma i latou, o tagata e toatele, e pei o le oneone i le matafaga ona tele; ma solofanua ma kariota e matuā tele.

⁵Ua faapotopotoina ia tupu uma; ona latou o ai lea, ma to lauapi faatasi i le vai o Meroma, e tau ai le taua ma Isaraelu.

⁶Ona fetalai mai lea o Ieova ia Iosua, Aua e te fefe ia te i latou, auā a taeao, i le itu la nei, ou te tuuina atu ai i latou uma i luma o Isaraelu ua fasiotia; e te vaea ua o vae o a latou solofanua, ma susunu o latou kariota i le afi.

⁷Ona oo faafuasei mai lea ia te i latou o Iosua, ma ‘au uma o le taua faatasi ma ia, i le vai o Meroma; ona latou osofai lea ia te i latou.

⁸Ua tuuina mai foi i latou e Ieova i lima o Isaraelu, ona latou fasia lea o i latou, ma tuliloa atu ia te i latou i Saitonu le sili, ma Meserefomaima, ma le vanu o Mesepa i sasae; ma latou fasi ia te i latou, ua le faatoeina e i latou se tasi o i latou.

⁹Ua faia foi e Iosua ia te i latou, e pei ona fetalai mai ai o Ieova ia te ia; ua ia vaea ua o vae o a latou solofanua, ma susunu o latou kariota i le afi.

¹⁰O ona po ia na toe foi mai ai Iosua, ma na aea Hasora, ua fasia foi e ia lona tupu i le pelu; auā o Hasora sa sili ia anamua i ia malo uma.

¹¹Ua latou fasia i le pelu o tagata uma sa i ai, ua faaumatia, ua le faatoeina se tasi e ola; ua faamuina foi e ia o Hasora i le afi.

¹²Ua maua e Iosua o aai uma o ia tupu, ma o latou tupu uma; ua fasia foi e ia o i latou i le pelu, ua faaumatia i latou, e pei ona poloai mai ai o Mose le auauna a Ieova.

¹³Na o aai uma e tu i a latou mea maupuepue, ua le susunuina e Isaraelu; na o Hasora lava ua susunuina e Iosua.

¹⁴O vete uma mai ia aai, ma manu, ua vetea e le fanauga a Isaraelu; a o tagata uma ua fasia i latou i le pelu, ua faaumatia i latou, ua le faatoeina e i latou se tasi e ola.

¹⁵E pei ona fetalai mai o Ieova ia Mose lana auauna, sa faapea foi ona fai mai ai Mose ia Iosua, sa faapea foi ona faia e Iosua, ua le tuua e ia se mea o mea uma na fetalai mai ai Ieova ia Mose.

¹⁶Ua maua e Iosua lena nuu uma, o le atu mauga, ma le itu i toga uma; o le nuu uma foi o Kosena, ma le nuu maulalo, ma le eleele laugatasi, ma le mauga o Isaraelu, ma lona nuu maulalo;

¹⁷e afua i le mauga o Kalaka, e alu ae i Seira, e oo atu i Paalakato o i le vanu o Lepanona i lalo o le mauga o Heremone; ua maua foi e ia o latou tupu uma, na taia foi i latou e ia, ma fasioti ia te i latou.

¹⁸Ua tau le taua e Iosua i aso e tele ma ia tupu uma.

¹⁹Ua leai se aai na faalelei ma le fanauga a Isaraelu, na o sa Hivī o e nonofo i Kipeona; ua maua uma isi nuu i le taua.

²⁰Auā mai ia Ieova ona faamaaaina o latou loto e o mai ia tau le taua ma Isaraelu, ina ia matuā faaumatia i latou, ia le alofagia i latou, a ia faaumatia i latou e ia, e pei ona fetalai mai ai o Ieova ia Mose.

²¹O ona po ia na alu atu ai Iosua, ma faaumatia sa Anakī nai le atu mauga, nai Heperona foi, ma Tiperi, ma Anapi, ma mauga uma o Iuta, ma mauga uma o Isaraelu; ua matuā faaumatia e Iosua o i latou ma a latou aai.

²²Ua le totoe nisi o sa Anakī i le nuu o le fanauga a Isaraelu; na o Kasa, ma Kata, ma Asetota, na totoe ai.

²³Ua maua e Iosua le nuu uma, e pei o mea uma na fetalai mai ai Ieova ia Mose; ua avatu ai foi e Iosua e fai ma tofi mo Isaraelu, e pei o le vaevaeina o i latou i o latou itu aiga. Ona mapu ai lea o le nuu i le taua.