Read Samoan Old Version Bible – O LE TUSI PAIA IOSUA, 14 Bible Online

IOSUA, 14 - Samoan Old Version Bible – O LE TUSI PAIA bible

IOSUA, 14

¹O Nuu nei ua faia ma tofi o le fanauga a Isaraelu i le nuu o Kanana, ua tofia e fai mo i latou e Eleasaro le faitaulaga, ma Iosua le atalii o Nuno, ma matai sili o itu aiga o le fanauga a Isaraelu.

²Ua faia o latou tofi i le vili mo itu aiga e iva ma le vaega o le itu aiga, e pei ona fetalaia mai e Ieova ia faia e Mose.

³Auā na avatu e Mose le tofi i itu aiga e lua ma le vaega o le itu aiga, i le la itu o Ioritana; a ua le avatu e ia se tofi i sa Levī faatasi ma i latou.

⁴Auā o le fanauga a Iosefa e lua itu aiga i latou, o Manase ma Efaraima. Ua le avatu foi e i latou se tofi o le laueleele i sa Levī na o aai latou te nonofo ai, ma tuafanua o i ai mo latou manu ma a latou mea.

⁵E pei ona fetalai mai ai o Ieova ia Mose, ua faapea lava ona faia e le fanauga a Isaraelu, ua latou tofia foi le nuu.

⁶Ona o mai lea o le fanauga a Iuta ia Iosua i Kilikala; ona faapea mai ai lea ia te ia o Kalepo le atalii o Iefune o le sa Kinasā, Ua e silafia le mea na fetalai mai ai Ieova ia Mose le tagata o le Atua ia te i taua i Katesapanea.

⁷Sa fagafulu o‘u tausaga ina ua auina atu a‘u e Mose le auauna a Ieova mai Katesapanea e asiasi i le fanua; ona ou au mai ai lea o le upu e tusa ma lo‘u taofi.

⁸A o o‘u uso na o faatasi ma a‘u, na latou faavaivaia loto o le nuu; a o a‘u nei, na ou matuā mulimuli atu ia Ieova lo‘u Atua.

⁹Na tauto foi Mose i lea aso, ua faapea mai, E moni o le nuu na solia i ou vae, e fai lea mou tofi ma au fanau e faavavau, auā ua e matuā mulimuli ia Ieova lo‘u Atua.

¹⁰O lenei foi, faauta, ua faaolaina a‘u e Ieova, e pei ona fetalai mai o ia, o ia tausaga e fagafulu ma le lima, talu ona fetalaia mai e Ieova lenei upu ia Mose, a o feoai Isaraelu i le vao; o lenei foi, faauta mai ia, o a‘u nei e valugafulu ma le lima o‘u tausaga i le aso nei.

¹¹O loo tumau lo‘u malosi i le aso nei e pei o le aso na auina atu ai a‘u e Mose; e pei o lo‘u malosi i lea aso, o loo o faapea foi lo‘u malosi i le aso nei, e tau ai le taua, ma alu atu ma toe sau.

¹²O lenei, ia e tuuina mai ia te au lenei mauga, na fetalaia mai e Ieova i lea aso; auā ua e faalogo oe i lea aso, sa i lea mea o sa Anakī, ma aai tetele ua nofo ‘olo; afai e ia te au Ieova, ona ou mafaia lea ona tutuli ia te i latou, e pei ona fetalai mai ai o Ieova.

¹³Ona faamanuia lea o ia e Iosua, ua ia avatu foi o Heperona ia Kalepo le atalii o Iefune e fai mona tofi.

¹⁴O le mea lea na fai ai o Heperona ma tofi o Kalepo le atalii o Iefune o le sa Kinasā, e oo i le aso nei, ina ua ia matuā mulimulli atu ia Ieova le Atua o Isaraelu.

¹⁵O le igoa foi o Heperona anamua o Kiriata-arapa; o Arapa o le tagata sili ia i sa Anakī. Ona mapu ai lea o le nuu i le taua.