Read Samoan Old Version Bible – O LE TUSI PAIA IOSUA, 17 Bible Online

IOSUA, 17 - Samoan Old Version Bible – O LE TUSI PAIA bible

IOSUA, 17

¹Ua fai foi le tofi o le itu aiga o Manase, auā o ia o le ulumatua a Iosefa; mo Makiro le ulumatua a Manase, o le tamā o Kiliata; auā o ia o le toa, na ia te ia Kiliata ma Vasana.

²Ua fai le tofi o le fanauga a Manase, o e na totoe, e tusa ma o latou aiga; mo le fanauga a Apieseru, ma le fanauga a Eleka, ma le fanauga a Aserieli, ma le fanauga a Sakema, ma le fanauga a Eferu, ma le fanauga a Semita; o le fanau ia o Manase le atalii o Iosefa, o tama tane ia e tusa ma o latou aiga.

³A o Selofeata le atalii o Eferu, le atalii lea o Kiliata, le atalii lea o Makiro, le atalii lea o Manase, e leai sona atalii na o ona afafine; o igoa nei o ona afafine; o Maala, ma Noa, ma Hakelu, o Meleka, ma Tiresa.

⁴Ua latou faalatalata mai i luma o Eleasaro le faitaulaga, ma luma o Iosua le atalii o Nuno, ma luma o alii sili, ua faapea mai, Na poloai mai Ieova ia Mose e au mai ia te i matou se tofi faatasi ma o matou tuagane. Ona avatu lea e ia ia te i latou le tofi faatasi ma le au uso o lo latou tamā, e tusa ma le afioga a Ieova.

⁵Na maua e Manase o tofi e sefulu, e faaopoopo i le nuu o Kiliata ma Vasana, o i le la itu o Ioritana;

⁶auā ua fai e afafine o Manase le tofi faatasi ma ona atalii; o atalii foi o Manase ua totoe ua ia te i latou le nuu o Kiliata.

⁷O le tuaoi o Manase, ua afua mai i Asera i Mekemeta, e feagai ma Sekema; ua alu atu le tuaoi i le itu taumatau, e oo atu i e nonofo i Enetapua.

⁸Ua ia Manase le laueleele o Tapua; a o Tapua i le tuaoi o Manase, ua i le fanauga a Efaraima.

⁹Ua alu ifo le tuaoi i le alia o Kana, i le itu i toga o le alia; o aai ia o Efaraima o i totonu o aai o Manase; o le tuaoi foi o Manase o i le itu i matu o le alia, ma lona gataaga o le sami lea.

¹⁰O le itu i toga, ua ia Efaraima lea; ma le itu i matu, ua ia Manase lea; o le sami foi o lo la tuaoi; ua sosoo foi o la tuaoi i Asera i le itu i matu, ma Isakara i sasae.

¹¹Ua ia Manase i Isakara ma Asera, o Peteseana ma ona faoa aai, ma Ipelamo ma ona faoa aai, ma e nonofo i Toro ma ona faoa aai, ma e nonofo i Enetoro ma ona faoa aai, ma e nonofo i Tanaka ma ona faoa aai, ma e nonofo i Mekito ma ona faoa aai; o nuu e tolu.

¹²A ua le mafai e le fanauga a Manase ona tutuli o tagata o ia aai; a ua finau sa Kananā e nonofo pea i lena nuu.

¹³Ua oo ina malosi o le fanauga a Isaraelu, ona latou totogi atu ai lea o sa Kananā ia fai taulaga; a ua le matuā tulia i latou.

¹⁴Ona fai mai lea o le fanauga a Iosefa ia Iosua, ua faapea mai, Se a ea le mea ua e au mai ai ia te au na o le tofi e tasi, ma le vaega e tasi e fai mo‘u tofi, o a‘u foi o le nuu tele lava, auā ua faamanuia a‘u e Ieova e oo i le aso nei?

¹⁵Ona tali atu ai lea o Iosua ia te i latou, Afai o oe o le nuu tele, ina alu ae ai oe i le vao tele, ma faatoa mo oe i lea mea se fanua i le nuu o sa Perisē, ma sa Rafā, pe afai e lauitiiti ia te oe le mauga o Efaraima.

¹⁶Ona fai mai ai lea o le fanauga a Iosefa, E le maua e i matou le mauga; ua fai foi kariota uamea e sa Kananā uma o e nonofo i le nuu o le vanu, o i latou o i Peteseana ma ona faoa aai, atoa ma i latou o i le vanu o Isereelu.

¹⁷Ona fai atu lea o Iosua i le aiga o Iosefa, o Efaraima ma Manase, ua faapea atu, O le nuu tele oe, o ia te oe foi le malosi tele, e le na o le tofi e tasi e fai mo oe;

¹⁸a o le mauga e fai mo oe lea; auā o le vao tele lea, e te faatoaina; o ia te oe foi lona gataaga; e ui ina fai kariota uamea e sa Kananā, ma ua malolosi i latou, e te tulia i latou.