Read Samoan Old Version Bible – O LE TUSI PAIA IOSUA, 2 Bible Online

IOSUA, 2 - Samoan Old Version Bible – O LE TUSI PAIA bible

IOSUA, 2

¹Na aauina atu e Iosua le atalii o Nuno, ai Setima o tagata e toalua e asiasi faalilolilo i le nuu, ua faapea atu, Ina o ia oulua, ina matamata i le nuu, o Ieriko lava. Ona la o ai lea, ma ulufale atu i le fale o le fafine talitane e igoa ia Raava, ua nonofo ai i laua.

²Ona ta‘u atu lea i le tupu o Ieriko, ua faapea atu, Faauta, ua o mai iinei i le po nei ni tagata mai le fanauga a Isaraelu e vaavaai i le nuu.

³Ona alu atu ai lea o le feau a le tupu o Ieriko ia Raava, ua faapea atu, Ina tuu mai ia o ia tagata na o atu ia te oe, o e na o atu i lou fale; auā ua la o mai e vaavaai i le nuu uma.

⁴A uma ona ave e le fafine o ia tagata e toalua, ua nanā ia te i laua, ma ua faapea ona fai atu, Na o mai tagata ia te au, a ou te lei iloa pe na o mai ifea i laua;

⁵ua oo ina a punitia o le faitotoa, ina ua pouliuli, ona o atu ai lea o ia tagata; ou te lei iloa le mea na o atu ai ia tagata; ia vave ona tuliloa atu ia te i laua; auā tou te maua atu i laua.

⁶A o ia ua uma ona ia avae ia te i laua i luga o le fale, ma ua tanumai ia te i laua i laau o lino ua na folasia i luga o le fale.

⁷Ua tuliloa atu ia tagata ia te i laua i le ala i Ioritana, i asaga o le vai; ua latou pupuni foi le faitotoa ina ua uma ona o atu o e na tuliloa ia te i laua.

⁸Ona alu ae lea o le fafine ia te i laua i luga o le fale, a o lei taooto i laua;

⁹ua ia fai atu foi i ia tagata, Ua ou iloa ua foaiina atu e Ieova le nuu ia te outou, ma ua oo mai lo outou matautia ia te i matou, ma ua faavaivaia ona o outou o i latou uma e nonofo i le nuu.

¹⁰Auā ua matou faalogo na faamateina e Ieova le suāsami o le sami Ulaula ona o outou, ina ua outou o mai mai Aikupito; i le ma mea na outou faia i tupu e toalua o sa Amorī o Sekono ma Oko, o e sa i le la itu o Ioritana, na outou faaumatia i laua.

¹¹Na matou faalogo i ia mea, ona liu suāvai ai lea o matou loto, ua le toe ai lava se malosi i se tagata, ona o outou; auā o Ieova lo outou Atua, o le Atua ia i le lagi i luga, ma le lalolagi i lalo nei.

¹²O lenei, se‘i oulua tauto mai ia te au ia Ieova, auā ua ou agalelei atu ia te oulua, ia oulua agalelei mai foi i le aiga o lo‘u tamā, ma ia oulua tuu mai ia te au se faailoga faamaoni;

¹³ma ia outou faaolaina lo‘u tamā, ma lo‘u tinā, ma o‘u tuagane, ma o‘u uso, ma i latou uma ua ia te i latou, ma ia laveaiina i matou ia le oti.

¹⁴Ona tali mai ai lea o ia tagata ia te ia, O maua ola e sui a‘i ia te outou i le oti, pe afai tou te le ta‘ua la maua nei feau. A oo ina foaiina mai e Ieova le nuu ia te i matou, ona matou agalelei ai lea, ma faamaoni ia te oe.

¹⁵Ona tuutuu ifo ai lea o ia ia te i laua i le maea i le faamalama; auā sa i luga o le pa o le aai lona fale, na mau ai ia i luga o le pa.

¹⁶Ona fai atu ai lea o ia ia te i laua, Ina o atu ia oulua i le mauga, ne‘i outou fetaiai ma e o tuliloa ia te oulua, ma ia oulua lalafi ai i po e tolu, seia toe foi mai le tuliloaga, mulimuli ane ona o ai lea o oulua i lo oulua ala.

¹⁷Ona fai mai ai lea o ia tagata ia te ia, E magalo i maua i lau tautoga nei, na ma tauto ai ina ua e fai mai.

¹⁸Faauta mai, a matou o mai i le nuu, ia e nonoa lenei maea fu‘a mūmū i le faamalama na e tuutuu ifo ai i maua; e te faapotopoto mai ia te oe i lou fale o lou tamā, ma lou tinā, ma ou uso, atoa ma le aiga uma o lou tamā.

¹⁹Ai se tasi e ulu atu i fafo i faitotoa o lou fale, e i luga o lona ulu lona toto, a e magalo i maua; ai se tasi lua te i ai ma oe i le fale, e i luga o maua ulu lona toto pe afai e oo se lima ia te ia.

²⁰A e afai e te ta‘u atu la maua nei feau, ona magalo ai lea o i maua i lau tautoga na e fai mai ma te tauto ai.

²¹Ona fai atu ai lea o ia, Ia faapea ona faia e pei o a oulua upu. Ua ia tuuina atu o i laua e o, ona la o ai lea. Ua nonoa foi e ia le maea mūmū i le faamalama.

²²Ona la o ai lea, na la oo atu i le mauga, ua nonofo ai i aso e tolu, ina seia toe foi mai le tuliloga; na sailia i laua e le tuliloaga i le ala uma, a e lei maua.

²³Ona toe foi mai ai lea o ia tagata e toalua, ua la o ifo i le mauga, ma la sopoia atu le vai, ma o atu ia Iosua le atalii o Nuno, ua faamatalaina atu ia te ia o mea uma na oo ia te i laua;

²⁴na la fai atu foi ia Iosua, Ua tuuina mai lava e Ieova le nuu uma i o tatou lima; i le ma ua faavaivaia o e nonofo uma i le nuu ona o i tatou.