Read Samoan Old Version Bible – O LE TUSI PAIA IOSUA, 22 Bible Online

IOSUA, 22 - Samoan Old Version Bible – O LE TUSI PAIA bible

IOSUA, 22

¹Ona valaauina lea e Iosua o sa Reupenā, ma sa Katō, ma le tasi vaega o le itu aiga o Manase,

²ma ia faapea atu ia te i latou, Ua outou anaana i mea uma na fai atu ai Mose le auauna a Ieova ia te outou; ua outou faalogo foi i lo‘u leo i mea uma na ou fai atu ai ia te outou.

³Ua le tuua e outou o outou uso i aso e tele, ua oo i le aso nei; a ua outou anaana i le tausiga o le poloaiga a Ieova lo outou Atua.

⁴O lenei, ua avatua e Ieova lo outou Atua le mapusaga i o outou uso, e pei ona fetalai mai ai o ia ia te i latou; o le mea lea ia outou toe foi atu ai, ma ia outou o i o outou fale ie i le nuu o lo outou tofi, na avatu ia te outou e Mose le auauna a Ieova, i le la itu o Ioritana.

⁵A ia outou matuā anaana e fai le poloaiga ma le tulafono, na fai atu ai Mose le auauna a Ieova ia te outou; tou te alofa atu ia Ieova lo outou Atua, ma savavali i ona ala uma, ma anaana i ana poloaiga, ma pipii lava ia te ia, ma auauna ia te ia ma o outou loto atoa ma o outou agaga atoa.

⁶Ona faamanuia atu lea o Iosua ia te i latou, ma tuuina atu i latou e o; ona latou o ai lea i o latou fale ie.

⁷Na avatu e Mose i le tasi vaega o le itu aiga o Manase le tofi i Vasana; a ua avatu e Iosua i le isi vaeluaga le tofi faatasi ma o latou uso i le itu o Ioritana i sisifo. Ua faamanuia i latou e Iosua, ina ua tuuina atu i latou e o i o latou fale ie.

⁸Ua ia fai atu foi ia te i latou, ua faapea atu, Ina foi atu ia i o outou fale ie ma oloa e tele, ma manu e matuā tele, ma ario, ma auro, ma ‘apa memea, ma uamea, ma ofu e matuā tele lava; ia outou tufatufaina i o outou uso o vete o e na ita ia te outou.

⁹O le fanauga a Reupena, ma le fanauga a Kato, ma le tasi vaega o le itu aiga o Manase, ua toe foi atu i latou, ma o ese i le fanauga a Isaraelu nai Sailo, o i le nuu o Kanana, e o atu i le nuu o Kiliata, o le nuu o latou tofi ua latou maua, e pei o le afioga a Ieova ia Mose.

¹⁰Ua oo atu i latou i le itu o Ioritana, o i le nuu o Kanana, ona faia lea i lea mea e le fanauga a Reupena, ma le fanauga a Kato, ma le tasi vaega o le itu aiga o Manase, o le fata faitaulaga e lata ane i Ioritana, o le fata faitaulaga tele e iloagofie.

¹¹Ua lagona e le fanauga a Isaraelu le tala, ua faapea mai, Faauta, ua faia e le fanauga a Reupena, ma le fanauga a Kato, ma le tasi vaega o le itu aiga o Manase, le fata faitaulaga, e feagai ma le nuu o Kanana, i le itu o Ioritana, i le mea na sopoia e le fanauga a Isaraelu.

¹²Ua lagona e le fanauga a Isaraelu, ona faapotopoto ai lea o le faapotopotoga uma o le fanauga a Isaraelu i Sailo, e o ae e tau ai le taua ma i latou.

¹³Ona auina atu lea e le fanauga a Isaraelu, i le fanauga a Reupena, ma le fanauga a Kato, ma le tasi vaega o le itu aiga o Manase, i le nuu o Kiliata, o Fineaso le atalii o Eleasaro le faitaulaga;

¹⁴ma matai sili e toasefulu faatasi ma ia, taitasi aiga sili ma le matai sili i itu aiga uma o Isaraelu; o i latou taitoatasi o matai sili i aiga o latou tamā, i afe o Isaraelu.

¹⁵Ua oo atu foi i latou i le fanauga a Reupena, ma le fanauga a Kato, ma le tasi vaega o le itu aiga o Manase, i le nuu o Kiliata, ma latou fai atu ia te i latou, ua faapea atu,

¹⁶O loo fai mai le faapotopotoga uma a Ieova, ua faapea mai, Se a lenei mea leaga ua outou agaleaga ai i le Atua o Isaraelu e liliu ese i le aso nei, ne‘i outou mulimuli atu ia Ieova, ina ua outou faia mo outou le fata faitaulaga ina ia outou fouvale i le aso nei ia Ieova.

¹⁷Pe itiiti ea ia te i tatou le agasala na faia ma Peora, e lei faamagaloina ai i tatou ua oo mai i le aso nei, na oo ai le mala i le faapotopotoga a Ieova?

¹⁸A ua liliu ese outou i le aso nei ne‘i mulimuli atu ia Ieova. A outou fouvale i le aso nei ia Ieova, ona toasa mai ai lea o ia i le faapotopotoga uma o Isaraelu a taeao.

¹⁹A e afai e leaga le nuu o lo outou tofi, ia outou sopoia atu i le nuu o le tofi o Ieova, o le mea e tuu ai le malumalu o Ieova, ma fai outou tofi faatasi ma i matou; a e aua tou te fouvale ia Ieova, aua foi tou te fouvale ia te i matou, i lo outou faia mo outou le fata faitaulaga, e faaopoopo i le fata faitaulaga o Ieova lo tatou Atua.

²⁰E lei agasala ea Akana le atalii o Sera i le mea na faatoina, ona oo ai lea o le toasa i luga o le faapotopotoga uma o Isaraelu? E le na o lena tagata e toatasi na oti ona o lana agasala.

²¹Ona tali mai ai lea o le fanauga a Reupena, ma le fanauga a Kato, ma le tasi vaega o le itu aiga o Manase, ua latou faapea mai i alii o afe o Isaraelu, O Ieova,

²²o le Atua o atua; o Ieova, o le Atua o atua, o loo silafia lava e ia, e iloa foi e Isaraelu; pe afai o le fouvale, po o le agasala ia Ieova, (aua ne‘i faaolaina i matou i le aso nei,)

²³na fai ai mo i matou le fata faitaulaga e liliu ese ai, ne‘i mulimuli atu ia Ieova; afai foi e fai ai i ona luga o taulaga mu ma taulaga i mea e ‘ai; afai foi e fai ai i ona luga o taulaga faafetai, ia tauia mai e Ieova lava;

²⁴a e le o lo matou atuatuvale ea i lena mea ua matou fai ai le mea nei, ua faapea ane, Pe a fai mai i se aso a outou fanau i a matou fanau, e faapea mai, Se a ea la outou na ia Ieova le Atua o Isaraelu?

²⁵Auā ua tuuina mai e Ieova o Ioritana e fai ma tuaoi ia te i matou ma outou le fanauga a Reupena ma le fanauga a Kato; tou te le aiā ia Ieova; ona faateaina ai lea e a outou fanau a matou fanau ina ia latou le matatau ia Ieova.

²⁶O le mea lea na matou faapea ai, Se‘i tatou sauni ai mo i tatou ia fai le fata faitaulaga, e le ona ia fai ai se taulaga mu, po o se isi taulaga;

²⁷a ia fai ma molimau ia te i matou ma outou, ma tupulaga e mulimuli mai ia te i tatou, ia auauna i galuega a Ieova i ona luma i a tatou taulaga mu, ma a tatou taulaga, ma a tatou taulaga faafetai; ina ia le fai mai foi a outou fanau i a matou fanau i se aso, Tou te le aiā ia Ieova.

²⁸Ona matou faapea ane lea, Pe a latou fai mai i se aso ia te i tatou, po o tupulaga amuli, ona tatou fai atu ai lea, Faauta i le faatusa o le fata faitaulaga o Ieova na faia e o matou tamā, e le ona ia fai ai taulaga mu, po o isi taulaga; a o le molimau lava ia te i matou ma outou.

²⁹Ia mamao ia te i matou ona fouvale ia Ieova, ma liliu ese ai i le aso nei, ne‘i mulimuli atu ia Ieova, ia fai se fata faitaulaga e fai ai taulaga mu, po o taulaga i mea e ‘ai, po o isi taulaga, e faaopoopo i le fata faitaulaga o Ieova lo tatou Atua o i luma o lona malumalu.

³⁰Ua faalogo Fineaso le faitaulaga, ma alii sili o le faapotopotoga, ma alii o afe o Isaraelu sa faatasi ma ia, i upu ua fai mai e le fanauga a Reupena, ma le fanauga a Kato, ma le fanauga a Manase, ua lelei ia te i latou.

³¹Ua fai atu foi Fineaso le atalii o Eleasaro le faitaulaga, i le fanauga a Reupena, ma le fanauga a Kato, ma le fanauga a Manase, ua faapea atu, Ua tatou iloa i le aso nei o loo ia te i tatou Ieova, auā ua outou le agasala ia Ieova i lenei agasala; o lenei, ua laveaiina e outou le fanauga a Isaraelu ai le aao o Ieova.

³²Ona foi mai ai lea o Fineaso le atalii o Eleasaro le faitaulaga, ma alii sili nai le fanauga a Reupena, ma le fanauga a Kato, ai le nuu o Kiliata, ua o mai i le nuu o Kanana i le fanauga a Isaraelu, ma latou au mai ia te i latou le tala.

³³Ua lelei le tala i le fanauga a Isaraelu; ua faafetai atu foi le fanauga a Isaraelu i le Atua, ma latou le toe tautalatala i se taua e sii atu ia te i latou, e faaumatia le nuu e nonofo ai le fanauga a Reupena, ma le fanauga a Kato.

³⁴Ua faaigoaina e le fanauga a Reupena, ma le fanauga a Kato o le fata faitaulaga, O le Molimau, auā o le molimau lea ia te i latou, o Ieova o ia o le Atua.